Khuruuj 24

Chuyuukh Bani Israaʼiil chaafo Allah

1Wa baʼad da, Allah gaal le Muusa : «Atlaʼo leyi fi l-jabal, inta wa Haaruun wa awlaadah Nadaab wa Abiihu wa 70 chuyuukh min Bani Israaʼiil. Wa asjudu min baʼiid. 2Wa khalli inta Muusa wiheedak bas taji leyi ana Allah. Wa kan le l-aakhariin kamaan, ma yaju gariib. Wa khalli al-chaʼab ma yatlaʼo maʼaak.» 3Khalaas, Muusa gabbal kallam al-chaʼab be kulla kalaam Allah wa gawaaniinah. Wa kulla l-chaʼab raddo leyah be hiss waahid wa gaalo : «Aniina nisawwu kulla cheyy hasab kalaam Allah.»

4Muusa katab kulla kalaam Allah. Wa ambaakir fajur, Muusa bakkar wa bana madbah fi gaʼar al-jabal. Wa battaan khazza 12 hajar ale hasab adad gabaayil Bani Israaʼiil. 5Wa Muusa rassal subyaan min Bani Israaʼiil wa humman gaddamo le Allah dahiiye muharraga wa dabaho tiiraan dahaaya salaama. 6Wa Muusa sabba nuss al-damm fi mawaaʼiin. Wa nussah al-aakhar kamaan, rachcha beyah al-madbah. 7Wa chaal kitaab al-muʼaahada al-hu katabah wa garaah le l-chaʼab. Wa humman gaalo : «Aniina nisawwu kulla cheyy hasab kalaam Allah wa nitiiʼuuh.» 8Wa Muusa chaal al-faddal min al-damm wa rachcha beyah al-chaʼab wa gaal : «Daahu damm al-muʼaahada al-Allah sawwaaha maʼaaku hasab kulla kalaamah al-gaalah leeku.»

9Muusa wa Haaruun wa awlaadah Nadaab wa Abiihu wa 70 chuyuukh min Bani Israaʼiil talaʼo al-jabal. 10Wa chaafo Allah Ilaah Bani Israaʼiil. Wa tihtah cheyy misil ard min al-yaakhuut al-akhdar wa da chaffaaf misil al-sama. 11Wa laakin al-Rabb ma madda iidah le yahlik kubaaraat Bani Israaʼiil. Humman chaafo al-Rabb wa baʼad da, akalo wa chirbo giddaamah.

Muusa gaabal Allah fi jabal Siinaaʼ

12Wa Allah gaal le Muusa : «Atlaʼ leyi fi raas al-jabal wa agood fi l-bakaan da. Wa nantiik liihaan itneen hana hajar al-ana katabt fooghum al-wasaaya wa l-gawaaniin le l-naas yilʼallamoohum.» 13Wa Muusa chaal maʼaayah musaaʼidah Yachuuʼ wa talaʼo fi jabal Allah. 14Wa gabul ma yatlaʼo, Muusa gaal le chuyuukh Bani Israaʼiil : «Arjoona hini lahaddi nigabbulu leeku. Daahu Haaruun wa Huur gaaʼidiin maʼaaku. Kan induku muchkila, amchu leehum.»

15Wa khalaas, Muusa talaʼ al-jabal wa l-sahaabaay saddat al-jabal marra waahid. 16Wa majd Allah gaʼad fi jabal Siinaaʼ. Fi muddit sitte yoom, al-sahaabaay saddat al-jabal. Wa fi l-yoom al-saabiʼ, Allah naada Muusa min ust al-sahaabaay. 17Wa fi uyuun Bani Israaʼiil, majd Allah anchaaf misil al-naar al-gaaʼide taakul fi raas al-jabal. 18Wa Muusa dakhal fi ust al-sahaabaay wa talaʼ battaan foog fi l-jabal. Wa gaʼad fi raas al-jabal 40 nahaar wa 40 leele.

Currently Selected:

Khuruuj 24: ADT19

Highlight

Copy