Khuruuj 21

Al-churuut al-bukhussu al-abiid

1«Wa dool al-churuut al-tantiihum le Bani Israaʼiil. 2Kan chareetu abid Ibraani, khalli yakhdim leeku sitte sana wa fi l-sana al-saabʼe, yukuun hurr wa da bala ma yikaffi leeku cheyy. 3Wa kan jibtuuh wiheedah, tikhalluuh yamchi wiheedah. Wa kan jibtuuh be mara, tikhalluuh yamchi maʼaaha sawa. 4Wa kan jibtuuh wa intu bas anteetuuh mara wa wildat leyah awlaad aw banaat, al-iyaal wa ammuhum yifaddulu leeku wa abuuhum kamaan yamchi wiheedah. 5Wa laakin kan al-abid gaal : ‹Ana niriid siidi wa marti wa iyaali wa ma nidoor nabga hurr›, 6fi l-bakaan da siidah yichiil al-abid wa yiwaddiih giddaam al-Rabb wa yigarribah le l-baab aw le uud al-baab wa yigidd adaanah be mukhras. Wa yagood yakhdim leyah ila l-abad.

7«Wa kan raajil baaʼ bineeytah misil khaadim hi ma yatulguuha hurra misil al-raajil al-abid. 8Wa kan al-bineeye di ma ajabat siidha al-charaaha le tabga leyah mara, hu ma yibiiʼha le l-ajaanib achaan da misil hu khaanha. Khalli ahalha yafdooha. 9Wa kan charaaha le yijawwizha le wileedah, da khalli yiʼaamilha misil bineeytah. 10Wa kan siidha akhad mara aakhara, khalli ma yangus akilha wa la lubaasha wa la leelitha. 11Wa kan waahid min al-achya al-talaata dool nagas, hi tamchi hurra min duun tikaffi cheyy.

Al-jaraayim al-yijiibu al-moot

12«Wa kan naadum darab insaan wa katalah, waajib hu kula yaktuluuh. 13Wa laakin kan katalah bala raayah wa l-cheyy da l-Rabb bas jaʼalah leyah, khalli yamchi fi l-bakaan al-ana Allah nihaddidah le yaljaʼ foogah. 14Wa kan naadum yugumm be niiytah didd jaarah wa yaktulah be najaada, hu da yichiiluuh wa yaktuluuh hatta kan lajaʼ fi madbahi kula.

15«Wa kan naadum darab ammah aw abuuh, waajib yaktuluuh.

16«Wa kan naadum khataf insaan wa baaʼah aw ligooh makruub fi beetah, al-khaatif da waajib yaktuluuh.

17«Wa kan naadum ayyar ammah aw abuuh, waajib yaktuluuh.

Gaanuun al-jaraayim al-aakhariin

18-19«Kan rujaal itneen alhaarajo wa l-waahid darab al-aakhar be hajar aw be iidah wa ma katalah laakin hu ragad mardaan wa ma yagdar yugumm barra illa be asa, fi l-bakaan da al-naadum al-darab da, ma yiʼaakhubuuh. Laakin waajib yikaffi le l-mardaan muddit al-ayyaam al-hu ragadaahum wa yikaffi al-ilaaj kula.

20«Wa kan naadum darab abdah aw khaadmah be asa wa katalah, waajib yiʼaakhubuuh. 21Laakin kan gaʼad yoom aw yoomeen hatta maat, al-siid ma yiʼaakhubuuh achaan al-abid aw al-khaadim da hu charaah be gursah.

22«Wa kan naaseen addaawaso wa wagaʼo foog mara khalbaane wa hi ramat sakhiirha laakin hi aafe, fi l-bakaan da al-naadum al-wagaʼ foogha yikaffi al-diiye al-raajilha yatulbah minnah be muwaafagat al-gaadi. 23Wa laakin kan al-mara di maatat aw hassat, sawwi hasab al-gaanuun al-buguul al-nafis be l-nafis 24wa l-een be l-een wa l-sinn be l-sinn wa l-iid be l-iid wa l-rijil be l-rijil 25wa l-haraag be l-haraag wa l-jiraah be l-jiraah wa l-darbe be l-darbe.

26«Wa kan naadum salla een abdah aw khaadmah, waajib yikhalliih yamchi hurr achaan hu salla eenah. 27Wa kan kasar sinn abdah aw khaadmah, waajib yikhalliih yamchi hurr achaan hu kasar sinnah.

28«Wa kan toor taʼan raajil aw mara wa katalah, al-toor da waajib yarjumuuh. Wa lahamah kula ma yaakuluuh. Wa siid al-toor da yukuun bari. 29Wa laakin kan al-toor da awwal kula maʼruuf yatʼan al-naas wa l-naas hazzaro siidah wa siidah ma hafadah wa hu taʼan raajil aw mara wa katalah, fi l-bakaan da al-toor yarjumuuh wa siidah kula waajib yaktuluuh. 30Wa kan talabo minnah diiye le yafda beeha nafsah, waajib yanti al-diiye al-talabooha minnah. 31Wa nafs al-hukum da yahkumu beyah le l-toor al-taʼan bineeye aw wileed. 32Wa kan al-toor taʼan abid aw khaadim, siidah yikaffi le siid al-abid aw al-khaadim 30 hajar fudda wa l-toor da, yarjumuuh.

33«Wa kan naadum fakka biir aw nakat biir wa khallaaha faathe wa wagaʼ foogha toor aw humaar, 34siid al-biir da yikaffi taman al-toor aw al-humaar le siidah. Wa siid al-biir kamaan yichiil al-bahiime al-mayte.

35«Kan toor taʼan toor hana naadum aakhar wa katalah, siyaad al-tiiraan al-itneen dool yibiiʼu al-toor al-hayy wa yilgaasamo tamanah wa l-toor al-mayyit kula yilgaasamooh. 36Wa laakin kan al-toor da awwal maʼruuf yatʼan wa siidah ma hafadah adiil, fi l-bakaan da siid al-toor al-taʼan yikaffi al-toor. Wa hu yichiil al-toor al-mayyit.»

Currently Selected:

Khuruuj 21: ADT19

Highlight

Copy