Khuruuj 17
17
Al-Rabb marag almi min al-hajar
1Kulla mujtamaʼ Bani Israaʼiil rahalo min saharat Siin misil Allah amaraahum beyah wa zahafo chiyya chiyya lahaddi nazalo fi Rafidiim bakaan al-ma indah almi yacharbooh. 2Fi l-bakaan da, humman gammo yaharju le Muusa wa gaalo : «Antiina almi nacharbooh !» Wa Muusa radda leehum wa gaal : «Maala taharjuuni ? Wa maala tijarrubu Allah ?» 3Wa l-chaʼab al-atach sawwaahum be ziyaada wa gammo yuluumu Muusa wa gaalo : «Maala maragtina min Masir le taktulna aniina wa iyaalna wa bahaayimna be l-atach ?»
4Wa fi l-bakaan da, Muusa chaka le Allah wa gaal : «Chunu nisawwi le l-chaʼab dool ? Faddal chiyya bas yarjumuuni.» 5Wa Allah gaal leyah : «Amchi giddaam al-chaʼab wa chiil maʼaak waahidiin min chuyuukh Bani Israaʼiil. Wa chiil fi iidak asaatak al-darabt beeha bahar al-Niil wa amchi 6talgaani giddaamak fi l-hajar al-gaaʼid fi jabal Huuriib.#17:6 jabal Huuriib Hu al-maʼruuf be jabal Siinaaʼ. Adrub al-hajar da wa yamrug minnah almi le l-chaʼab yacharbo.» Wa Muusa sawwa al-cheyy da giddaam chuyuukh Bani Israaʼiil. 7Wa samma al-bakaan da Massa wa Mariiba (maʼanaatah al-tajriba wa l-huraaj) achaan Bani Israaʼiil harajooh le Muusa wa jarrabo Allah wa gaalo : «Allah gaaʼid maʼaana walla la ?»
Al-Amaalikh haarabo Bani Israaʼiil
8Askar al-Amaalikh jo wa haarabo Bani Israaʼiil fi Rafidiim. 9Wa Muusa gaal le raajil waahid min Bani Israaʼiil al-usmah Yachuuʼ : «Yalla ! Chiil rujaal wa amrug haarib leena al-Amaalikh ! Wa ambaakir, ana nagiif fi raas al-hajar wa asaat Allah fi iidi.» 10Wa Yachuuʼ macha le yihaarib al-Amaalikh misil Muusa gaalah leyah. Wa laakin Muusa wa Haaruun wa Huur talaʼo foog fi raas al-hajar. 11Wa wakit Muusa yarfaʼ iidah foog, Bani Israaʼiil yakhalbu. Wa laakin wakit Muusa yidalli iidah, al-Amaalikh yakhalbu. 12Wa wakit iideen Muusa bigo tugaal min al-aya, Haaruun wa Huur chaalo hajar wa khattooh tihtah wa hu gaʼad foogah. Wa ayyi waahid minhum lazam iid waahide hana Muusa. Wa khalaas, iideenah bigo saabtiin lahaddi l-harraay wagaʼat. 13Wa be darb al-seef, Yachuuʼ annasar nasur kaamil fi askar al-Amaalikh.
14Wa khalaas, Allah gaal le Muusa : «Aktib kulla l-cheyy da fi kitaab achaan ma yinnasi. Wa khalli Yachuuʼ kula yasmaʼah achaan ana nuguchch kulla l-Amaalikh min al-ard wa battaan naadum ma yihajji beehum.» 15Wa Muusa bana madbah wa sammaah Allah hu Raayti al-Marfuuʼa. 16Wa gaal : «Al-Amaalikh rafaʼo iideehum didd Allah. Wa hu yihaaribhum min zurriiye le zurriiye.»
Currently Selected:
Khuruuj 17: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
