Khuruuj 11

Muusa hajja be moot awlaad al-bikir

1Wa Allah gaal le Muusa : «Ana ninazzil al-waba al-akhiir fi l-malik wa fi l-Masriyiin. Wa baʼad da, hu yikhalliiku tamurgu min hini. Ma bas hu yikhalliiku tamurgu laakin yatrudku marra waahid min baladah ! 2Wa hassaʼ, guul le Bani Israaʼiil waajib ayyi raajil yatlub min jaarah wa ayyi mara tatlub min jaaritha achya hana fudda wa dahab.» 3Wa Allah sawwa Bani Israaʼiil ligo rida al-Masriyiin. Wa Muusa kula naadum muhimm fi Masir wa fi uyuun khaddaamiin al-malik. Wa kulla l-naas gaaʼidiin yikarrumuuh.

4Wa Muusa gaal le l-malik : «Daahu Allah gaal : ‹Fi ust al-leel ana nuchugg balad Masir. 5Wa ayyi wald bikir al-fi Masir yumuut min wald al-bikir hana Firʼoon al-gaaʼid fi kursi al-muluk lahaddi wald al-bikir hana l-khaadim al-tarhak al-gameh. Wa kulla awlaad al-bikir hana l-bahaayim kula yumuutu. 6Wa fi Masir yabga baki chadiid al-ma bigi yoom waahid wa battaan ma yabga. 7Laakin fi bakaan Bani Israaʼiil, kalib waahid kula ma yanbah foog naadum walla foog bahiime. Wa be da, taʼarfu kadar ana Allah nifannid been Bani Israaʼiil wa l-Masriyiin.›» 8Wa Muusa gaal battaan : «Kulla khaddaamiinak yaju yasjudu giddaami wa yachhadooni wa yuguulu : ‹Amchi inta wa kulla chaʼabak !› Wa illa baʼad da bas, ana namchi.» Wa Muusa marag min bakaan al-malik zaʼlaan bilheen.

9Wa awwal, Allah gaal le Muusa : «Al-malik ma yasmaʼku ! Wa fi chaan da, niziid ajaaybi fi Masir.» 10Khalaas, Muusa wa Haaruun sawwo al-ajaayib al-katiiriin dool giddaam al-malik laakin Allah gawwa raasah wa l-malik aba ma khalla Bani Israaʼiil yamurgu min Masir.

Currently Selected:

Khuruuj 11: ADT19

Highlight

Copy