Khuruuj 1
1
Bani Israaʼiil bigo abiid fi Masir
1Daahu asaame awlaad Yaakhuub al-maʼruuf be Israaʼiil al-macho maʼa abuuhum fi Masir.#1:1 awlaad Yaakhuub al-macho fi Masir Al-taariikh da talgooh fi Takwiin 46. Wa ayyi waahid minhum macha maʼa aayiltah. 2Wa humman Raʼuubiin wa Chimʼuun wa Laawi wa Yahuuza 3wa Yassaakar wa Zabuluun wa Banyaamiin 4wa Daan wa Naftaali wa Gaad wa Achiir. 5Wa zurriiyit Yaakhuub, kulluhum adadhum 70. Wa fi l-wakit daak, wileedah Yuusuf kamaan gaaʼid fi Masir khalaas. 6Wa baʼadeen, Yuusuf maat. Wa kulla akhwaanah wa naas zamanhum maato. 7Wa Bani Israaʼiil wildo wa zaado wa bigo katiiriin wa chudaad marra waahid wa malo al-balad.
8Wa baʼadeen, malik jadiid rikib fi Masir wa hu ma irif cheyy fi Yuusuf. 9Al-malik da gamma gaal le naasah : «Chiifu, Bani Israaʼiil dool hassaʼ bigo katiiriin wa chudaad minnina. 10Hassaʼ da, khalli nalgo halal le nadharo adadhum ma yiziid. Kan ma ke da, yoom waahid kan al-harib gammat, humman yindammo le udwaanna wa yihaarubuuna wa yamurgu min baladna wa yikhalluuna.»
11Wa khalaas, al-Masriyiin gammo khatto kubaaraat al-mukallafiin be khidmit al-ubuudiiye achaan yitaʼʼubu Bani Israaʼiil be l-khidme al-gaasiye. Be misil da bas, Bani Israaʼiil bano mudun Fituum wa Raʼamsiis achaan yabgo makhaazin le Firʼoon malik Masir. 12Wa l-Masriyiin gaaʼidiin yitaʼʼubuuhum bilheen. Wa laakin be da kula, Bani Israaʼiil bigo katiiriin wa chatto fi l-ard. Achaan da, al-Masriyiin khaafo bilheen min Bani Israaʼiil 13wa khalaas gammo yiʼabbuduuhum be gu. 14Wa marraro leehum al-haya be l-khidme al-gaasiye misil ajjiniin al-tiine wa salliliin al-diringeel wa hiraatit al-ziraaʼa. Wa l-Masriyiin gaaʼidiin yajburuuhum fi l-khidme di be gu.
Al-malik yaktul al-awlaad
15Fiyah awiin wallaadaat itneen hana l-Ibraaniyiin. Al-waahide usumha Chifra wa l-aakhara usumha Fuuʼa. Wa malik Masir naadaahin 16wa gaal leehin : «Asmaʼan zeen. Kan tiwallidan awiin al-Ibraaniyiin, fakkiran fi marigiin al-sakhiir. Kan wileed, aktulanah. Wa kan bineeye kamaan, khallanha tiʼiich.» 17Wa laakin al-awiin al-wallaadaat deel khaayfaat min Allah. Wa ma tabbagan kalaam al-malik wa laakin khallan al-awlaad. 18Wa khalaas, al-malik naadaahin battaan wa gaal : «Maala khalleetan al-awlaad ma kataltanhum ? Maala sawweetan misil da ?» 19Wa hinna gaalan leyah : «Ya l-malik, awiin al-Ibraaniyiin ma misil awiin al-Masriyiin. Hinna indihin gudra wa yaldan gubbaal al-wallaada ma taji.»
20Wa be misil da bas, Bani Israaʼiil bigo katiiriin wa chudaad. Wa l-Rabb anta rahma le l-awiin al-wallaadaat deel 21achaan hinna khaayfaat min Allah wa hu antaahin zurriiye.
22Wa khalaas, al-malik gamma anta amur le chaʼabah wa gaal leehum : «Azgulu fi l-bahar ayyi wileed Ibraani al-dahaabah wildooh. Illa l-banaat bas khalluuhin.»
Currently Selected:
Khuruuj 1: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
