Aʼmaal al-Rusul 6
6
Al-sabʼa musaaʼidiin
1Wa fi l-wakit da, adad al-talaamiiz gaaʼid yiziid. Wa l-naas al-yihajju kalaam yuunaani gammo yihaaruju al-naas al-yihajju kalaam ibraani. Harajoohum achaan ma gaaʼidiin yantu musaaʼada al-yoomiiye le araamilhum al-miskiinaat.
2Wa l-rusul al-atnaachar naado jamaaʼat al-talaamiiz achaan yilimmu. Wa gaalo leehum : «Aniina al-rusul niʼallumu kalaam Allah le l-naas wa ma waajib leena nikhallu khidmitna di achaan ninazzumu al-musaaʼada. 3Achaan da ya akhwaanna, aʼazulu min ambeenaatku sabʼa rujaal, naas maʼruufiin haalhum adiile wa malaaniin be l-Ruuh al-Khudduus wa induhum fikir adiil. Wa nikallufuuhum be l-khidme di. 4Wa laakin kan leena aniina, ninkarbu fi l-sala wa fi taʼliim kalaam Allah.»
5Wa l-kalaam da ajabaahum kulluhum. Wa azalo Istifaan wa hu muʼmin gawi malaan be l-Ruuh al-Khudduus. Wa azalo Filibbus wa Burkhuur wa Nikanuur wa Tiimuun wa Barmaan wa Niiguula al-min hillit Antaakiya, hu al-awwal dakhal fi diin al-Yahuud. 6Wa gaddamo al-rujaal al-sabʼa dool le l-rusul wa l-rusul saʼalo Allah leehum wa khatto iideehum fooghum achaan yantuuhum al-masʼuuliiye.
7Wa naas ziyaada simʼo kalaam Allah wa adad al-talaamiiz zaad fi Madiinat al-Khudus. Wa katiiriin min rujaal al-diin aamano be Isa al-Masiih.
Al-Yahuud tahamo Istifaan
8Wa Istifaan anmala be rahma wa gudra min Allah wa gaaʼid yisawwi alaamaat wa ajaayib kubaar marra waahid fi ust al-naas. 9Wa naas waahidiin min beet al-sala al-usmah beet al-Maʼtuugiin gammo diddah. Wa Yahuud waahidiin min al-Khayrawaan wa min al-Iskandariiya kula lammo maʼaahum wa aakhariin min balad Kilikiiya wa balad Aasiya. Wa gammo yikhaalutu Istifaan. 10Wa laakin ma himlo kalaamah achaan hu gaaʼid yikallim leehum be gudrat al-Ruuh al-Khudduus wa be ilim min Allah. 11Wa achaan da, anto gurus le kaddaabiin waahidiin le yuguulu : «Simiʼna kalaam Istifaan wa hu gaal kalaam fasil fi Sayyidna Muusa wa fi Allah.»
12Wa be l-tuhma di, harracho al-naas wa l-chuyuukh wa l-ulama didd Istifaan. Wa karabooh wa waddooh giddaam al-majlas. 13Wa jaabo kaddaabiin achaan yachhado foogah be kidib. Wa gaalo : «Al-raajil da yikallim daayman kalaam fasil fi l-beet al-mukhaddas wa fi l-Tawraat. 14Wa simiʼna hu gaal Isa al-min al-Naasira yidammir beet Allah wa yikhayyir aadaatna al-Muusa antaahum leena.»
15Wa wakit kulla naas al-majlas hammaro Istifaan, chaafo wijhah yichaabih wijih malaaʼika.
Currently Selected:
Aʼmaal al-Rusul 6: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
