Aʼmaal al-Rusul 18

Buulus fi madiinat Kuruntus

1Wa baʼad da, Buulus marag min madiinat Atiina wa macha fi madiinat Kuruntus. 2Wa hinaak ligi naadum Yahuudi usmah Akiila min balad Buntus. Wa hu dahaabah ja fi Kuruntus maʼa martah usumha Biriskiila. Jo min madiinat Rooma al-fi Itaaliya achaan al-sultaan Kuluudi anta amur wa gaal kulla l-Yahuud yamurgu min Rooma. Wa Buulus macha sallamaahum. 3Wa hu gaʼad fi beethum wa bada yakhdim maʼaahum achaan Buulus kula usta fi nafs al-khidme misilhum. Khidmithum yisawwu al-khiyam. 4Wa kulla yoom al-sabt, hu yamchi fi beet al-sala wa yinaakhich maʼa l-Yahuud wa l-Yuunaaniyiin achaan yijiibhum fi l-derib. 5Wa wakit Siila wa Timuutaawus jo min balad Magiduuniya, Buulus khalla khidimtah wa gamma yiballikh al-bichaara kulla yoom. Wa yihajji le l-Yahuud wa yachhad kadar Isa bas al-Masiih. 6Laakin al-Yahuud abo ma dawwaro chahaadtah wa bado yiʼayyuruuh. Wa Buulus hatta khalagah minhum wa gaal : «Intu masʼuuliin min al-yaji foogku. Ana bari minku. Min al-yoom niballikh al-bichaara le l-naas al-ma Yahuud.»

7Wa khalaas, Buulus khalla beet al-sala wa bada yiʼallim fi beet hana naadum usmah Tiitus Yustus. Hu yaʼabud Allah laakin hu ma Yahuudi. Wa beetah gaaʼid jamb beet al-sala hana l-Yahuud. 8Wa masʼuul hana beet al-sala da, usmah Kiriisbus. Wa hu wa kulla naas beetah aamano be l-Rabb Isa. Wa naas katiiriin fi Kuruntus simʼo kalaam Buulus wa aamano be l-bichaara wa khattasoohum.

9Wa yoom waahid be l-leel, al-Rabb Isa ja le Buulus fi ruʼya wa gaal leyah : «Ma takhaaf. Kallim wa ma taskut. 10Ana gaaʼid maʼaak. Wa ma fi naadum yagdar yisawwi leek cheyy fasil achaan indi naas katiiriin fi l-hille di.» 11Wa Buulus gaʼad fi Kuruntus sana wa nuss wa gaaʼid yiʼallim kalaam Allah le l-naas.

Buulus giddaam al-haakim Khaaliyuun

12Wa wakit Khaaliyuun bigi haakim fi balad Akhaaya, al-Yahuud astafago ambeenaathum achaan yikhaalufu Buulus. Wa gammo waddo Buulus fi l-mahkama. 13Wa gaalo : «Al-raajil da gaaʼid yiharrich al-naas achaan yaʼabudu Allah be ibaada al-tikhaalif al-gaanuun.»

14Wa Buulus gamma achaan yihajji wa laakin Khaaliyuun hajja le l-Yahuud wa gaal : «Ya l-Yahuud, kan kalaamku fi l-naadum da tuhma hana jariime walla zulum, waajib nasbur wa nasmaʼ kalaamku. 15Laakin tihajju fi tafsiir hana kalimaat wa asaame bas wa fi kalaam hana chariiʼitku. Wa waajib intu tihillu al-muchkila di ambeenaatku. Fi l-kalaam al-misil da, ana ma nidoor nagtaʼ chariiʼa.»

16Wa khalaas taradaahum min al-mahkama. 17Wa kulla l-naas karabo Suustaan masʼuul beet al-sala wa gammo daggooh giddaam al-mahkama wa laakin Khaaliyuun gaaʼid saakit, ma hajja cheyy.

Buulus macha yichiif madiinat Afasus

18Wa Buulus gaʼad fi Kuruntus mudda tawiile. Wa baʼad da, hu sallam al-akhwaan achaan yidoor yisaafir. Dawwar yamchi fi Suuriya be safiina. Wa Biriskiila wa Akiila kula macho maʼaayah. Wa fi hillit Kankhiriiya gubbaal ma yarkab fi l-safiina, Buulus zayyan raasah achaan sawwa nazir giddaam Allah. 19Wa wakit wislo fi madiinat Afasus, Buulus khalla Biriskiila wa Akiila. Wa macha dakhal fi beet al-sala hana l-Yahuud wa naakhach maʼaahum. 20Wa l-Yahuud talabo minnah achaan yagood maʼaahum chiyya. Wa laakin hu aba 21wa macha khallaahum wa gaal : «In cha Allah, nigabbil leeku yoom aakhar.»

Wa marag min Afasus wa rikib fi safiina wa saafar. 22Wa nazal fi khachum al-bahar hana Geesariiya wa macha fi Madiinat al-Khudus wa sallam jamaaʼat al-muʼminiin wa baʼad da, macha fi hillit Antaakiya. 23Wa gaʼad hinaak ayyaam. Wa baʼad da, gamma faat fi buldaan Khalaatiya wa Firigiiya raayikh min hille le hille. Wa Buulus gaaʼid yichajjiʼ kulla l-talaamiiz achaan yagoodu saabtiin fi l-iimaan.

Abuluus fi mudun Afasus wa Kuruntus

24Wa fi l-wakit da, Yahuudi waahid usmah Abuluus ja fi madiinat Afasus. Hu min al-Iskandariiya wa yaʼarif yiʼallim adiil wa hu aalim chadiid fi l-Kitaab. 25Wa gubbaal ma yaji fi Afasus, Abuluus allamooh derib al-Rabb Isa. Wa gamma kallam be chidde wa gaaʼid yiʼallim al-naas be kalaam sahiih be l-achya al-bukhussu Isa. Wa laakin hu irif khattisiin Yahya bas. 26Wa gamma yikallim fi beet al-sala bala khoof. Wa wakit Biriskiila wa Akiila simʼo kalaamah, waddooh fi beethum wa fassaro leyah derib Allah be ziyaada.

27Wa Abuluus dawwar yisaafir fi balad Akhaaya wa l-akhwaan chajjaʼooh wa katabo jawaab le l-talaamiiz al-gaaʼidiin hinaak achaan yakurbuuh adiil. Wa wakit hu wisil hinaak, hu gamma yiʼallim al-naas. Wa be misil da, aawanaahum bilheen le l-naas al-aamano be l-Masiih be rahmat Allah. 28Wa Abuluus gaaʼid yikhaalif al-Yahuud giddaam naas al-hille be kalaam gawi. Wa fassar leehum min al-Kitaab wa akkad kadar Isa bas al-Masiih.

Currently Selected:

Aʼmaal al-Rusul 18: ADT19

Highlight

Copy