Aʼmaal al-Rusul 16

Buulus naada Timuutaawus

1Wa Buulus macha giddaam le hillit Darba. Wa baʼadeen ja fi hillit Listara. Wa fi Listara, tilmiiz waahid gaaʼid usmah Timuutaawus. Ammah Yahuudiiya muʼmine be l-Masiih wa abuuh Yuunaani. 2Wa kulla l-akhwaan fi Listara wa Iguuniya yachhado kadar hu naadum adiil. 3Wa Buulus dawwar Timuutaawus yaji yakhdim maʼaayah. Kulla l-Yahuud fi l-bakaan da irfo kadar abu Timuutaawus Yuunaani wa achaan da, Buulus gamma tahharah hasab aadaat al-Yahuud. 4Wa Buulus wa l-akhwaan al-maʼaayah gammo raakho min hille le hille wa ooro al-muʼminiin be kharaar hana l-rusul wa l-kubaaraat al-fi Madiinat al-Khudus wa wassoohum achaan yitaabuʼu kalaamhum. 5Wa be misil da, kulla jamaaʼaat al-muʼminiin bigo gawiyiin fi l-iimaan wa kulla yoom adad naashum gaaʼid yiziid.

Naadoohum fi balad Magiduuniya

6Wa l-Ruuh al-Khudduus ma antaahum izin yiballukhu al-bichaara fi balad Aasiya.#16:6 balad Aasiya Fi l-zaman da, Aasiya usum hana balad sakhayre al-tinlagi hassaʼ fi kharib Turkiya. Wa khataro fi Firigiiya wa Khalaatiya. 7Wa wakit lihgo huduud hana balad Misiiya, chaalo derib hana balad Bisinya wa laakin Ruuh Isa daharaahum ma yadkhulu foogha. 8Wa khalaas, chaalo derib hana hillit Turuwaas wa chaggo balad Misiiya. 9Wa fi l-leele di, Buulus riʼi wa fi l-ruʼya, chaaf raajil min naas Magiduuniya. Wa l-raajil gaaʼid yinaadi Buulus wa yuguul : «Taʼaal hini fi Magiduuniya wa aawinna.»

10Wa baʼad Buulus chaaf al-ruʼya di, aniina#16:10 aniina Da yiwassif kadar Luukha kaatib al-kitaab da, hu kula bada al-safar maʼa Buulus. fihimna kadar Allah naadaana achaan niballukhu al-bichaara le l-naas al-fi balad Magiduuniya. Wa tawwaali, gammeena chilna al-derib. 11Wa gammeena min Turuwaas wa gataʼna al-bahar wa lihigna jaziirat Saamutraaki. Wa ambaakir, macheena giddaam wa nazalna fi hillit Niyaabulus. 12Wa min hinaak, macheena fi madiinat Filibbi. Wa hi hille al-banooha al-Roomaaniyiin fi l-mantaga al-awwalaaniiye hana Magiduuniya. Wa gaʼadna hinaak ayyaam.

13Wa yoom al-sabt, maragna barra min al-hille wa macheena jamb al-waadi achaan hasabna da bas al-bakaan al-yisallu foogah al-Yahuud. Wa gaʼadna tihit wa kallamna le l-awiin al-lamman. 14Wa been al-awiin fi mara waahide taajriiye hana gumaach khaali wa hi min hillit Siyaatiira. Hi ma min banaat al-Yahuud wa laakin gaaʼide taʼabud Allah maʼaahum wa usumha Liidiya. Wakit gaaʼide tasmaʼ kalaam Buulus, al-Rabb fatah galibha achaan tukhutt baalha le kalaamah wa tiʼaamin. 15Wa baʼad khattasooha maʼa kulla naas beetha, hi saʼalatna be chidde achaan nabgo diifaanha. Wa gaalat : «Kan sahiih intu hasabtuuni muʼmine be Rabbina, taʼaalu agoodu fi beeti.» Wa talabat minnina ziyaada lahaddi macheena gaʼadna fi beetha.

Buulus wa Siila fi l-sijin

16Wa yoom waahid, aniina maachiin fi bakaan al-sala wa khaadim waahide jaat leena. Hi mara jannaaniiye wa tichiif le l-naas. Wa siyaadha ligo min junuunha gurus katiir. 17Wa gammat titaabiʼ Buulus wa aniina al-raaykhiin maʼaayah wa gaaʼide tihajji be hiss aali wa tuguul : «Al-naas dool abiid Allah al-Aali wa jo achaan yiballukhu leeku kikkeef tanjo.» 18Wa yoom katiir hi gaaʼide titaabiʼna lahaddi Buulus ziʼil wa anlafat leeha wa kachcha le l-cheetaan al-gaaʼid foogha wa gaal : «Be usum Isa al-Masiih, naamurak. Amrug minha.» Wa tawwaali, al-cheetaan marag minha.

19Wa wakit siyaadha chaafo al-gurus al-yalgooh minha angataʼ, karaboohum le Buulus wa Siila wa karroohum fi ust al-hille fi bakaan al-malamma, giddaam al-kubaaraat. 20Wa gaddamoohum le l-hukkaam wa gaalo : «Al-rujaal dool Yahuud. Humman yisawwu machaakil fi hillitna. 21Humman gaaʼidiin yiʼallumu al-naas aadaat mamnuuʼa leena aniina al-Roomaaniyiin. Waajib leena naaboohum wa ma nitaabuʼuuhum.»

22Wa kulla naas al-hille ziʼilo wa kallamo didd Buulus wa Siila. Wa l-hukkaam charrato khulgaan Buulus wa Siila wa amaro al-askar achaan yudugguuhum be asa. 23Wa daggoohum dagg chadiid wa dassoohum fi l-sijin. Wa amaro haras hana l-sijin achaan yahrishum adiil. 24Wa fi chaan al-amur da, al-haras waddaahum fi l-bakaan al-daakhal fi lubb al-sijin wa gayyadaahum min rijleehum fi l-hatab al-tagiil.

25Wa fi ust al-leel, Buulus wa Siila gaaʼidiin yisallu wa yamdaho wa yachkuru Allah wa l-masaajiin gaaʼidiin yasmaʼoohum. 26Wa tawwaali, al-ard anhazzat chadiid wa asaas al-sijin rajaf wa kulla l-biibaan anfataho wa kulla guyuud al-masaajiin anhallo. 27Wa l-haras gamma min al-noom wa chaaf kulla l-biibaan faathiin wa fi fikrah, al-masaajiin jaro khalaas wa salla seefah achaan yaktul nafsah.#16:27 yaktul nafsah Fi l-gaanuun al-roomaani, kan al-masaajiin yinbalsu min al-sijin, ikhaabhum yagaʼ fi raas al-haras. Achaan da, al-haras dawwar yaktul nafsah. 28Wa laakin Buulus naadaah be hiss aali wa gaal leyah : «Ma tisawwi le nafsak cheyy fasil. Aniina kullina gaaʼidiin.»

29Wa l-haras naada achaan yijiibu leyah deyy wa dakhal ajala fi l-sijin. Wa gaaʼid yarjif min al-khoof wa macha wagaʼ giddaam Buulus wa Siila. 30Wa khalaas, maragaahum barra. Wa saʼalaahum wa gaal : «Ya saadaati, waajib nisawwi chunu achaan nanja ?» 31Wa raddo leyah wa gaalo : «Aamin be l-Rabb Isa wa tanja, inta wa naas beetak.»

32Wa gammo ballakho kalaam al-Rabb le l-haras wa le kulla naas beetah. 33Wa fi l-wakit da bas, fi ust al-leel hu waddaahum fi bakaan indah almi wa khassal leehum awaawiirhum. Wa tawwaali, humman khattasooh maʼa kulla naas beetah. 34Wa baʼad da, al-haras wadda Buulus wa Siila fi beetah wa faddalaahum wa gaddam leehum akil. Wa hu wa kulla naas beetah firho bilheen achaan aamano be Allah.

35Wa wakit al-wata asbahat, al-hukkaam rassalo askar waahidiin achaan yuguulu le l-haras yatlig Buulus wa Siila. 36Wa l-haras oora Buulus be kalaamhum wa gaal : «Al-hukkaam rassalo kalaam achaan natligku wa khalaas, amurgu hassaʼ wa amchu be l-salaam.»

37Laakin Buulus aba wa gaal : «Daggoona giddaam al-naas bala chariiʼa wa dassoona fi l-sijin ! Wa aniina indina jinsiiya roomaaniye. Wa hassaʼ yidooru yatulguuna be achiir ? Abadan ! Khalli humman zaathum yaju hini wa yatulguuna !»

38Wa l-askar gabbalo le l-hukkaam wa ooroohum be l-kalaam al-Buulus gaalah leehum. Wa l-hukkaam khaafo wakit irfo induhum jinsiiya roomaaniye. 39Wa jo saamahoohum. Wa l-hukkaam maragoohum min al-sijin wa talabo minhum achaan yamurgu min al-hille. 40Wa Buulus wa Siila marago min al-sijin wa macho beet Liidiya wa lammo maʼa l-akhwaan wa chajjaʼoohum. Wa baʼad da, marago min al-hille.

Currently Selected:

Aʼmaal al-Rusul 16: ADT19

Highlight

Copy