Aʼmaal al-Rusul 10

Ruʼyat Karniili

1Wa fi hillit Geesariiya, fiyah naadum waahid usmah Karniili. Hu askari Roomaani wa kabiir fi 100 askar min al-firkha al-Itaaliiye. 2Hu naadum takhi wa hu wa kulla naas beetah khaayfiin min Allah. Hu yanti sadakha katiir le l-masaakiin wa daayman gaaʼid yasʼal Allah.

3Wa yoom waahid misil al-saaʼa talaata baʼad al-duhur, ruʼya jaat le Karniili. Wa fi l-ruʼya di, hu chaaf waahid min malaaʼikat Allah jaayi leyah fi beetah. Wa l-malak kallam leyah wa gaal : «Ya Karniili !» 4Wa wakit chaaf al-malak, hu khaaf bilheen wa saʼalah wa gaal : «Chunu, ya sayyidna ?» Wa l-malak radda leyah wa gaal : «Allah khibil salaawaatak wa l-sadakha al-anteetha. Wa hu jaahiz le yurudd leek. 5Wa hassaʼ bas rassil rujaal fi hillit Yaafa achaan yinaadu Simʼaan al-binaaduuh Butrus achaan yaji leek. 6Hu deef hana Simʼaan al-dabbaakhi al-beetah jamb al-bahar.»

7Wa wakit al-malak al-kallam leyah faat, Karniili naada khaddaamiin itneen wa naada naadum takhi min al-askar al-gaaʼidiin daayman maʼaayah. 8Wa ooraahum be l-cheyy al-bigi wa rassalaahum le Yaafa.

Ruʼyat Butrus

9Wa ambaakir be duhur wakit al-rujaal al-talaata dool maachiin fi l-derib garrabo le hillit Yaafa, Butrus talaʼ fi raas al-beet achaan yisalli. 10Wa juuʼ chadiid sawwaah wa dawwar yaakul. Wa wakit gaaʼidiin yijahhuzu leyah akil, cheyy misil ruʼya ja leyah.

11Wa fi l-ruʼya di, chaaf al-sama faatih wa cheyy misil gitʼe kabiire mafluula wa makruuba min jawaanibha al-arbaʼa naazle fi l-ard. 12Wa l-gitʼe di malaane be kulla nafar al-haywaanaat al-fi l-ard wa l-zawaahif wa l-tuyuur. 13Wa Butrus simiʼ hiss gaaʼid yinaadiih wa yuguul : «Ya Butrus, gumm ! Adbah wa aakul !» 14Wa laakin Butrus radda leyah wa gaal : «La, ya Rabbi ! Abadan ma akalt cheyy haraam wa la cheyy nijis.» 15Wa l-hiss kallam leyah battaan wa gaal : «Al-cheyy al-Allah tahharah, ma tuguul nijis.» 16Wa l-cheyy da bigi talaata marraat wa tawwaali al-gitʼe anrafaʼat fi l-sama.

17Wa Butrus alʼajjab wa bada yasʼal fi nafsah chunu maʼana al-ruʼya al-chaafaaha. Wa fi l-wakit da bas, al-rujaal al-Karniili rassalaahum ligo beet Simʼaan al-dabbaakhi wa jo wagafo fi khachum al-beet. 18Wa gaaʼidiin yasʼalo naas al-beet wa yuguulu : «Simʼaan al-yinaaduuh Butrus da, hu deef fi bakaanku walla ?»

19Wakit Butrus gaaʼid yifakkir fi maʼana al-ruʼya di bas, al-Ruuh al-Khudduus kallam leyah wa gaal : «Asmaʼ, fi talaata rujaal gaaʼidiin fi khachum al-beet. Yasʼalo minnak. 20Dalli tihit wa laagiihum wa amchi maʼaahum wa ma tichakkik fooghum. Ana bas rassaltuhum leek.»

21Wa addalla tihit wa macha leehum wa gaal : «Ana bas al-naadum al-tidooruuh. Jiitu le chunu ?» 22Wa raddo leyah wa gaalo : «Karniili rassalaana. Wa Karniili da hu kabiir askar wa raajil saalih wa khaayif min Allah. Wa kulla l-Yahuud yachhado leyah hu naadum adiil. Wa waahid min malaaʼikat Allah ja leyah wa gaal waajib Karniili yinaadiik tamchi beetah achaan yasmaʼ kalaamak.»

23Wa Butrus dayyafaahum wa ragado fi l-beet. Wa be fajur, Butrus gamma wa macha maʼaahum. Wa waahidiin min al-akhwaan min Yaafa kula macho maʼa Butrus.

Butrus fi beet Karniili

24Wa ambaakir, wislo fi Geesariiya wa Karniili gaaʼid yarjaahum maʼa akhwaanah wa rufgaanah al-marra waahid. 25Wa wakit Butrus gaaʼid yadkhul fi l-beet, Karniili gaabalah wa sajad leyah. 26Wa Butrus rafaʼah wa gaal : «Gumm foog ! Ana insaan mislak inta bas.»

27Wa Butrus dakhal fi l-beet wa gaaʼid yihajji maʼaayah wa macha daakhal wa ligi naas katiiriin laammiin. 28Wa gaal leehum : «Intu taʼarfu fi diin al-Yahuud haraam le Yahuudi yilimm maʼa naadum ma Yahuudi. Wa la yisallimah fi beetah kula. Wa laakin Allah ooraani ma waajib nuguul ayyi naadum nijis walla ma taahir be sabab gabiiltah. 29Wa achaan da, wakit naadeetuuni, ana ma gult kalaam wa jiit leeku. Wa hassaʼ ooruuni naadeetuuni le chunu ?»

30Wa Karniili radda leyah wa gaal : «Indina arbaʼa yoom, al-saaʼa misil al-wakit da, ana fi beeti wa gaaʼid nisalli sala hana l-saaʼa talaata. Wa fajʼatan, raajil laabis khalag abyad misil al-barraaga baan giddaami. 31Wa gaal leyi : ‹Ya Karniili, Allah simiʼ salaawaatak wa fakkar fi l-sadakha al-inta anteetha. 32Wa hassaʼ rassil rujaal fi Yaafa achaan yinaadu Simʼaan al-binaaduuh Butrus achaan yaji leek. Hu deef hana Simʼaan al-dabbaakhi al-beetah jamb al-bahar.› 33Wa tawwaali, ana rassaltuhum achaan yinaaduuk wa chukran be jaytak. Wa khalaas, kullina gaaʼidiin hini giddaam Allah achaan nasmaʼo kulla l-kalaam al-Allah amarak beyah.»

34Wa Butrus gamma yikallim leehum wa gaal : «Khalaas dahaaba ana fihimt kadar sahiih ke, Allah ma yichiif gabiila waahide akheer min gabaayil aakhariin. 35Wa Allah yakhbal naadum min ayyi gabiila kan yakhaaf minnah wa amalah saalih. 36Wa akiid, Allah rassal le Bani Israaʼiil bichaarat al-salaam al-yantiiha be Isa al-Masiih, Rabb hana kulla l-naas. 37Wa intu taʼarfu kulla cheyy al-bigi fi daar al-Yahuudiiya. Al-cheyy al-bigi da bada fi daar al-Jaliil baʼad Yahya naada al-naas achaan yikhattishum. 38Wa taʼarfu kadar Allah nazzal al-Ruuh al-Khudduus fi Isa al-min al-Naasira wa darrajah Masiih wa antaah gudra. Wa Isa sawwa al-kheer fi ayyi bakaan wa chafa kulla l-naas al-Ibliis azzabaahum achaan Allah kaan maʼaayah.

39«Wa aniina chuhuud fi kulla cheyy al-Isa sawwaah fi daar al-Yahuud wa fi Madiinat al-Khudus. Wa khalaas, allagooh fi l-saliib wa katalooh. 40Wa baʼad talaata yoom, Allah gawwamah min al-moot wa bayyanah le l-naas. 41Wa laakin ma bayyanah le kulla l-naas, illa le l-chuhuud al-hu azalaahum min awwal. Wa da leena aniina al-akalna wa chiribna maʼaayah baʼad hu baʼas min ust al-maytiin. 42Wa Isa amaraana achaan niballukhu al-bichaara le l-chaʼab wa nachhado leyah wa nuguulu Isa bas al-naadum al-Allah jaʼalah le yihaasib al-naas al-hayyiin wa l-maytiin. 43Wa kulla l-anbiya yachhado le Isa wa yuguulu ayyi naadum al-yiʼaamin beyah, yalga khufraan al-zunuub be usmah.»

44Wa wakit Butrus lissaaʼ gaaʼid yikallim leehum ke bas, al-Ruuh al-Khudduus nazal fi kulla l-naas al-gaaʼidiin yasmaʼo kalaamah. 45Wa l-muʼminiin al-min al-Yahuud al-jo maʼa Butrus alʼajjabo marra waahid achaan chaafo Allah anta al-Ruuh al-Khudduus le l-naas al-ma Yahuud kula. 46Wa simʼoohum wa humman gaaʼidiin yikallumu be lukhkhaat aakhariin wa yahmudu Allah be farha. Wa Butrus gaal : 47«Fi naadum yadharna min al-almi achaan ma nikhattusu al-naas dool walla ? Allah antaahum humman al-Ruuh al-Khudduus misil antaah leena.»

48Wa Butrus amaraahum le akhwaanah achaan yikhattusuuhum be usum Isa al-Masiih. Wa baʼad khattasoohum khalaas, Karniili wa akhwaanah talabo min Butrus yagood maʼaahum ayyaam.

Currently Selected:

Aʼmaal al-Rusul 10: ADT19

Highlight

Copy