1 Tasaluuniiki 3
3
Ziyaarat Timuutaawus
1Aywa, aniina muchtaagiin leeku. Wa wakit fagadna saburna khalaas, chilna niiye achaan nagoodu wiheedna fi madiinat Atiina. 2Wa rassalna leeku akhuuna Timuutaawus al-yakhdim maʼaana sawa le Allah fi ballikhiin bichaarat al-Masiih. Wa rassalnaah le yichajjiʼku wa yigawwi iimaanku 3achaan naadum waahid minku ma yibarjil be sabab al-taʼab al-gaaʼid foogku. Intu zaatku taʼarfu kadar mukhaddar leena al-naas yitaʼʼubuuna. 4Wa wakit lissaaʼna gaaʼidiin maʼaaku, gulna leeku kadar al-taʼab yaji foogna kullina. Wa khalaas, bigi misil gulna wa da taʼarfuuh. 5Achaan da, wakit fagadt al-sabur marra waahid, rassalt leeku Timuutaawus achaan nidoor naʼarif kan intu saabtiin fi iimaanku walla la. Wa fi l-wakit daak, ana gaaʼid nihimm leeku. Fi fikri, akuun Ibliis al-yijarrib al-naas annasar foogku wa l-taʼab al-ana tiʼibtah foogku macha fi l-riih saakit.
Al-khabar min Timuutaawus
6Laakin hassaʼ bas, Timuutaawus gabbal minku wa jaab leena khabar halu. Ooraana be iimaanku wa mahabbitku wa gaal fikirku foogna daayman fikir zeen wa intu muchtaagiin leena misil aniina muchtaagiin leeku. 7Wa be misil da, ya akhwaani, intu chajjaʼtuuna be iimaanku wa raggadtu guluubna fi usut taʼabna wa suʼuubaatna. 8Awwal al-hamm katalaana laakin min simiʼna intu saabtiin fi Rabbina, khalaas al-haya bigat leena haluuwe battaan. 9Min chiddit al-farha, ma naʼarfu kikkeef nachkuru Allah fi chaanku. Aywa fi chaanku intu, nafraho giddaam Allah be farha kabiire bilheen. 10Leel wa nahaar nasʼalo Allah be chidde achaan yilimmina battaan maʼaaku wa niziidu leeku kulla cheyy al-lissaaʼ mugassir leeku fi iimaanku.
11Wa hassaʼ, khalli Allah abuuna zaatah wa Rabbina Isa yisahhulu leena al-derib achaan najuuku. 12Wa leeku intu, khalli al-Rabb yiziid mahabbitku wa yikattirha achaan tirraayado ambeenaatku be ziyaada wa tihibbu kulla l-naas misil aniina nihibbuuku. 13Wa khalli al-Rabb yisabbit guluubku achaan tukuunu saalihiin wa bala eeb giddaam abuuna Allah fi l-yoom al-Rabbina Isa yaji foogah maʼa jamaaʼtah al-saalihiin.
Currently Selected:
1 Tasaluuniiki 3: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.
