1 Yuuhanna 3
3
Iyaal Allah
1Chiftu kikkeef abuuna yihibbina ? Mahabbat Allah leena kabiire bilheen wa be sababha hu yinaadiina iyaalah. Wa sahiih bigiina iyaal Allah. Naas al-dunya ma irfoona achaan ma irfo Allah. 2Ya l-mahbuubiin, hassaʼ haaliiyan aniina iyaal Allah. Wa kikkeef nukuunu baʼadeen da, Allah lissaaʼ ma bayyanah leena. Laakin naʼarfu kadar wakit Ibn Allah yibiin battaan, nichiifuuh hu zaatah be nafsah wa aniina nabgo mislah. 3Wa ayyi naadum al-indah acham misil da fi l-Masiih, yitahhir galbah tamaam misil Ibn Allah hu taahir.
4Ayyi naadum al-gaaʼid yaznib, hu yikhaalif wasaaya Allah. Al-zanib hu mukhaalafat wasaaya Allah. 5Iriftu kadar Ibn Allah baan achaan yamha zunuubna. Wa foogah hu, zanib ma fiih abadan. 6Kan naadum gaaʼid saabit foogah, hu ma yisawwi zanib. Wa ayyi naadum al-yisawwi zanib, hu abadan ma chaaf Ibn Allah wa la irifah.
7Ya iyaali, ma tikhallu naadum waahid yukhuchchuku. Al-naas al-yisawwu amal saalih, humman saalihiin misil Ibn Allah hu saalih. 8Wa ayyi naadum al-gaaʼid yisawwi zanib, hu hana Ibliis achaan Ibliis gaaʼid yaznib min al-bidaaya. Wa khalaas Ibn Allah ja fi l-dunya achaan yakhrib amal Ibliis kulla ke. 9Al-naas al-bigo iyaal Allah ma yaznubu achaan tabiiʼat Allah gaaʼide fooghum. Ma yagdaro yaznubu achaan bigo iyaal Allah. 10Wa naʼarfu yaatumman iyaal Allah wa yaatumman iyaal Ibliis be l-cheyy al-yisawwuuh. Kulla l-naas al-ma yitaabuʼu al-haal al-saalhe, humman ma iyaal Allah misil al-naas al-ma yihibbu akhwaanhum.
Arraayado ambeenaatku
11Daahu al-kalaam al-simiʼtuuh min al-bidaaya. Waajib nirraayado ambeenaatna. 12Wa ma waajib nabgo misil Gaabiil.#3:12 Gaabiil Hu wileed abuuna Adam. Hu gamma katal akhuuh Haabiil. Al-taariikh da talgooh fi Takwiin 4. Hu naadum hana Ibliis al-chariir wa katal akhuuh. Wa maala katalah ? Hu katalah achaan hu zaatah gaaʼid yisawwi al-fasaala wa laakin akhuuh gaaʼid yisawwi al-adaala.
13Ya akhwaani, ma tiʼajjubu kan naas al-dunya yakrahooku. 14Kan nirraayado ambeenaatna, da bas al-daliil al-yiʼakkid kadar maragna min haalat al-moot wa dakhalna fi haalat al-haya. Ayyi naadum al-ma yihibb akhwaanah yagood fi l-moot. 15Wa ayyi naadum al-yakrah akhuuh, hu kattaal dimam wa taʼarfu kadar kan naadum kattaal dimam, al-haya al-abadiiye ma tasbit foogah.
16Isa al-Masiih fadaana be ruuhah wa da bas wassaf leena maʼana al-mahabba. Wa khalaas, waajib nihibbu akhwaanna lahaddi nafdoohum be ruuhna. 17Kan naadum indah maal al-dunya wa yichiif akhuuh taʼbaan wa yisidd eenah wa ma yisaaʼidah, kikkeef nuguulu mahabbat Allah gaaʼide foogah ? 18Ya iyaali, khalli ma nirraayado be kalaam khuchuumna bas laakin khalli nirraayado be l-fiʼil wa be l-mahabba al-sahiihe.
Damaanna giddaam Allah
19Wa kan niriidu akhwaanna, be misil da naʼarfu aniina naas hana l-hagg. Wa be l-fikir da, guluubna yagoodu be amaan giddaam Allah. 20Kan guluubna yuluumuuna fi ayyi cheyy, Allah hu akbar min guluubna wa hu yaʼarif kulli cheyy.
21Ya l-mahbuubiin, kan guluubna ma yuluumuuna fi ayyi cheyy, aniina indina al-damaan giddaam Allah. 22Wa nalgo min Allah ayyi cheyy al-nasʼalooh minnah achaan nitaabuʼu wasiiyaatah wa nisawwu al-cheyy al-yarda beyah. 23Wa di hi wasiiytah, waajib niʼaamunu be usum Ibnah Isa al-Masiih wa nirraayado ambeenaatna misil hu amaraana beyah. 24Kulla l-naas al-yitaabuʼu wasiiyaatah gaaʼidiin saabtiin foogah wa hu gaaʼid saabit fooghum. Wa naʼarfu akiid kadar hu gaaʼid saabit foogna wa da naʼarfuuh min al-Ruuh al-Khudduus al-hu nazzalah foogna.
Currently Selected:
1 Yuuhanna 3: ADT19
Highlight
Share
Copy
Want to have your highlights saved across all your devices? Sign up or sign in
Arabe tchadien (alphabet latin) Bible © Alliance Biblique du Tchad, 2019.