Lomaŋ 3
3
1Gɛ̀ ní lé ƃé Zûu-ŋai dia tɔnɔ ƃe díŋuŋ ma ƃoɔɔ̂i Zɛ̃tai-ŋai fêi? Kpaa máŋ lé mɛni lɛ́lɛɛ ƃé gáa núu kpɛtɛɛ mɛni sui? 2Ǹɛ́lɛɛ̂i pere sîi kélee su. M̀aa-ŋuŋ, Ɣâla è ŋɔwóoi lɛ̀ɛ Zûu-ŋai yêei. 3Zu-kulai ƃa lé à kɛ̀ díta-ni fé sã́a ní? Díkɛɛ dífe sã́a ní a pɔ̂ri gɛ̂i Ɣâla fa kɛ̀ a zã́a? 4Vé tí a dɔnɔ kpîŋ! Tɔɔ Ɣâla maa-mɛni é kɛ́ a tɔ̃yâ, berei máŋ núu-kpune mɛni fé la a tɔ̃yâi, yɛ̂ɛ berei bɔ̃yɛɛ̂i lai,
“Nûa da pâi ítolîi a tɔ̃yâ-nuu ílono-woo-ŋai ma.
Ɣele da ímɛnii ŋá tèe lai, ímɛnii a pâi lɛ̂lɛɛi.”
5Kɛ́lɛ, à kɛ̀ kúŋwana-lɔ̂ɔ tuai a Ɣâla ŋɔtɔ̃yâ laa-lai lɛ̀, gɛ̀ ní kwa pâi kɛ̂i lé? Kwa pâi m̀ôi a gɛ́ɛ Ɣâla fa mɛni lɛ́lɛɛ kɛ̀, à kɛ̀ a tɔ̂ŋ kpɛ̀ kûa? (Ŋa lônoi a núu-kpune lóno pere.) 6Vé tí a dɔnɔ kpîŋ! À kɛ̀ tí, gɛ̀ ní, Ɣâla a pɔ̂ri ŋ̀éniɛi ŋɔmɛnii ŋá tée pere kɛ̂i leŋ? 7Kɛ́lɛ, à kɛ̀ ŋálɛɛ kɛ́ɛ a pâ a Ɣâla ŋɔtɔ̃yâ laa-lai fíyeŋ ŋá, gɛ̀ ní lé mɛni ƃé da ŋámɛnii ŋá teêi la a gɛ́ɛ ŋ́gaa a sɔnyɔ̂ŋ-nuui? 8Káfa m̀o kâa “Kwaa mɛni nyɔ́mɔɔ kɛ́ mɛni lɛ́lɛɛ é kúla zu” Nûa da-ni da mò a kúlaa a lɛ́ɛ dîyɛɛ kú mò tí. Kɛ́lɛ Ɣâla káa a tɔ̃yâ Ɣala. A pâi dímɛnii ŋá têe tí-ti ƃôi.
Núu da fé a tɔ̃yâ-nuu
9Nyíŋí su-kulâi ƃa lé? Zu-kulâi ƃa kúai a Zûu-ŋai kúa nɔ́ ƃóɔɔ̂i Zɛ̃tai-ŋai fêi? Vé tí kpɔ́ a dɔnɔ kpîŋ, Ŋaâ gbâa m̀ó a m̀aa-nuŋ a gɛ́ɛ núu kélee káa sɔnyɔ̂ŋ ŋɔwála-walai mu, Zûu-nuu da Gurii-nuu. 10Yɛ̂ɛ berei Ŋ̀âla-kɔlɔi a m̀o lai:
“Tɔ̃yâ-nuu da kélee fé ŋɔ́nɔ naa.
11Núu da fé ŋɔ́nɔ mɛni ŋá kâai
kpaa máŋ é Ɣâla kɔ́ri.
12Núu kélee da dípôlu tɔɔ mɛni lɛ́lɛɛ ma da pɛ̀lɛ mɛni nyɔ́mɔɔ-ŋa kɛ́ɛ ma.
Mɛni lɛ́lɛɛ da kélee kɛ́ nuu fé ŋɔ́nɔ ma a dɔnɔ kpîŋ.
13Díkɔ̂ŋ-ńa káa yɛ̂ɛ ƃolôŋ lá ƃóɔɔ.
Díwoo káa a núu pɛ̀lɛ woo-ŋa tee-tee,
gɛ́ ƃò a núu maa yao woo-ŋa, gɛ́ ƃò yɛ̂ɛ kali ŋwana.
14Díla naɣâŋ-laa káa yɛ̂ɛ ŋ̀ale-maa káa.
15Dímaa félaai ŋwana-lɔ̂ɔ kɛ̂i dí núu paa.
16Ƃɛ́i kélee da lì naai da su-kara da mɛni kpɔ̂lu káa díperêi.
17Dífe berei kɔ́lɔŋ dí díkɛ-ɣeniɛi kɛ́ la lii-sêe sui.
18Dífa yào Ɣâla ma.”
19Kú gɔ́lɔŋ a gɛ́ɛ m̀ɛnii kélee bɔ̃yɛɛ̂i dɔ̂ŋ sui gáa nɔ́ diai mɛni ma díkaa dɔ̂ŋ mui. Dɔ̂ŋ a m̀ɛni-ŋai ŋí ƃò gɛ́ɛ é núu kpera káfalo kɛ̂i, a gɛ́ɛ é ǹɛɛ naa Ɣâla é ǹɛ́ a gɛ́ɛ ŋ̀éniɛi su-ƃelai da sɔnyɔ̂ŋ kɛ́. 20Dɔ̂ŋ mɛi káa nɔ́ fa gɛ̀ Ɣâla é núu síɣe a tɔ̃yâ-nuu. Dɔ̂ŋ a sɔnyɔ̂ŋ lɛ̀ nɔ́ kûa.
Tɔ̃yâ-laa a pâ laa-laa sârai
21Kɛ́lɛ, berei Ɣâla a núu sìɣe la ŋɔtɔ̃yâ nuui a nâa lɛ́. Va gɛ̀ tí dɔ̂ŋ mɛi káa mɛni ma, berei máŋ dɔ̂ŋ da Ɣâla ŋɔlóno kɛ́-ƃelai da ǹɛ la berei Ɣâla a ǹyée see la kúmui. 22Ɣâla a núu sìɣe a tɔ̃yâ nuu ŋɔlaa-lai mɛni ma Zîsɛ Kôrai sârai. Va su-ɣɛɛ kɛ̀. 23Núu kélee da sɔnyɔ̂ŋ kɛ́ dímaa kôya Ɣâla ma. 24Ɣâla a núu kélee ŋuŋ ma ƃò a ŋɔƃɛlɛ-see sama-sɛŋ Zîsɛ Kôrai sârai. 25Ɣâla è nɛ̀ a zu ponoɔɔ a gɛ́ɛ é sâla kula a ŋ̀ãai a gɛ́ɛ dí zɔlɔ ƃó laa-la su. Ɣâla è nyíŋi kɛ̀ a gɛ́ɛ e ŋɔtɔ̃yâ laa-lai lɛ́, kpɛ́ni fêi, è tèe sɔnyɔ̂ŋ pɔlɔ-ŋa dîa Ŋɔɣâla lii-kpelei su. 26È gɛ̀ a tãi ŋí a gɛ́ɛ é ǹɛ́ a gɛ́ɛ ǹyaa kpîŋ gáa a tɔ̃yâ-Ɣala a gɛ́ɛ ŋɔ́nɔ a diai tòli a tɔ̃yâ-ƃela nyíi-ŋai da lâa a Zisɛi.
27Gɛ̀ ní lé ƃa kwa maa yoŋka têei? Sapoi ƃa lé nyíŋi mɛni ma? Zu-kulâi ƃa kwa dɔ̂ŋ da mɛi kâa? Kpao, kɛ́lɛ, a gɛ́ɛ kwa laa-la. 28Kúlaâi Ɣâla a núu tòli a tɔ̃yâ-nuu laa-la sârai e kúla dɔ̂ŋ mɛi káa pôlu. 29Ɣâla káa nɔ́ a Zûu-ŋai dia tɔnɔ Díɣâla? Vé a Zɛ̃tai-ŋai Díɣâla máŋ? Ooei, gáa a Zɛ̃tai-ŋai Díɣâla máŋ. 30Ɣâla káa nɔ́ tɔnɔ. A pâi Zûu-ŋai siɣêi a tɔ̃yâ-ƃela yɛ̂ɛ berei dílaa-lai káa lai, é Zɛ̃tai-ŋai síɣe a tɔ̃yâ-ƃela yɛ̂ɛ berei dílaa-lai káa lai. 31Kwa pɔ̂ri ŋaŋ dɔ̂ŋ pilîi a naa-lai ŋí? Vé tí a dɔnɔ kpîŋ! Kúfa bìli, kɛ́lɛ, kwa zòŋ a gbanaŋɔɔ.
Currently Selected:
Lomaŋ 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia