Neeuŋ 3
3
1Kpalo-ƃêlai ŋãa taai ma,
ǹáa fɛ̂ɛ a lɛ́ɛ kɛ́ɛ,
ƃɛ́i kɔsôŋ sãa tâmai naa,
ǹyaŋ da pâi gulâi díyêei.
2Vaai tíŋ,
gɔ́-kɔ keleŋ kɔ́ɔ mu tiŋ,
zoo-ŋai pili tîŋ da
gɔ́ kɔ́ keleŋ ɣála tiŋ kulâai!
3Zoo sia-ƃelai díkɛ nɔ́ lì,
m̀óa sɔ̂kpɔ-ŋai díkɛ kɛ̀ mãla-mãla,
zɔla-ŋai díkɛ fòlo,
núu pôma támaa púɔɔ nyii núu fa pɔ̂ri lônoi,
díkɛ kàreŋ a dia!
4Ŋ̀úlu-wulu kɛ́ nɛnii ŋɔwulu-wulu kɛ́ɛi su,
a núu ɣála ma ŋɔtûa pere nyɔ̂ŋ su,
gɛ́ lɔii ŋûŋ-ŋa pìli mɛnîi ŋɔwulu-wulu kɛ́ɛi su
da diai díkaa gɔlɛ mai.
5Ŋ̀wála-wâla kélee Yâwɛɛ a môi ǹyɛɛi,
“Ninivɛ, ńdɔɔ̂i yâ,
ŋa pâi ímaa sêɣe tɛ̂i ɣelei ŋá bɛlɛ íŋɛi,
ŋá ǹɔii ŋûŋ-ŋai kɛ́ dí íkaŋ káa,
ŋá gɛ́ lɔii kpîniŋ-ŋa dí íŋumɛi káa.
6Ŋa pâi ímaa nɔ̃̂ɔi,
ŋá íkɛ a nyɔ́mɔɔ,
ŋá íkɛ a ɣɛ́lɛ maa sɛŋ.
7Ŋa pâi ǹûai kélee kɛ̂i da íkaa dí dípôlu tɔɔ yâ
díkɛ mò dîyɛɛ, ‘Ninivɛ su a kara.
Gbɛ̂ɛ ƃé pâi wɔ̂lɔi m̀ɛni mai?
Mí ƃé ŋa pâi nûa kâai naa dí díŋaa kpɛ̂i?’ ”
8Ninivɛ, ímaa mɛni kpanaŋɔ̂ɔi é tɛ́ɛ Tɛbi taa leei ma nyii gáa a Ize ŋɔtaa-lêe kɛ́tɛi? Ǹâai Ya-leei tínaŋɔ̂ɔi ma yɛ̂ɛ siɣãŋ m̀ɛi káa mɛni ma. 9Itiopia da Ize lɔii ƃe kɛ̀ a ŋɔwála-walai, ǹyaŋ dífe kpera ní kpɔ̂nii dîa. Ǹûai kɛ̀ Pô lɔii sui da Lebia-ŋai ƃé kɛ̀ a ŋɔkpɔŋ maa-ƃelai. 10Berei máŋ è kɛ̀ tí lai, dí Tɛbi taa-leei wôlo dí lí a zu-ƃelai luɛ la su. Dí ǹîa-pɛlɛɛi pâa, dí lí a díkɔ̃liŋ kélee, dí ǹúu ŋuŋ tuɛ-ƃelai kélee pú yɔlɔ ŋá.
11Yá máŋ ya pâi kɛ̂i yɛ̂ɛ lɔɔ kpele-nuu. Pɔri fé pâi kɛ̂i yɛ̂. Ƃa pâi kpɔ̂ŋ mâ wɛ̂lii íkpɔara-ƃelai yêei. 12Ítɔɔ sãai kélee káa yɛ̂ɛ fîi wuru a ƃa, dí dúmo é pú dí mii. 13Ka ƃɛ́ káa, kákɔ-kuluƃa-ŋai díkaa yɛ̂ɛ nɛyâa kásama. Kásiɣãŋ-ŋai láa ƃóɔɔ kákpɔara-ƃelai túɛ. Ŋɔŋ a pâi kasiɣãŋ lá sãai kélee kérenîi. 14Ka yá tĩyɛ gɔ́i é lɛ́ɛ pâi kásiɣãŋ maa tínanîi. Ka kákpîŋ kpɛtɛ kásiɣãŋ mɛi káa mɛni ma. Ka pɔ̂rɔ yɔ́ɔŋ ká bileki-ŋa kpɛtɛ ká bûi kɛ́ ziɣãŋ tɔɔ mɛni ma. 15Berei máŋ ká nyíti kɛ̀ lai, ŋɔŋ a pâi kákerenîi, ƃóa-sɔ̂kpɔ kɛ́ kásu tèe-tee yɛ̂ɛ berei gotó a sɛŋ têe lai.
Kátâmai yɛ̂ɛ gotó kpaa máŋ zãi! 16Kápɔni tɔɔ-ƃelai da táma yɛ̂ɛ berei pɛ́mɛlɛŋ-kao tâmaai lai. Kɛ́lɛ kátɔɔ sãai da pâi koônii yɛ̂ɛ gotó a kooŋ. 17Kálônii díkaa yɛ̂ɛ zai-ŋa, kákɔlɔ pɔ̃yɛ-ƃelai díkɛ ƃò yɛ̂ɛ gotó-ŋa ƃé pɛlɛ̂nii kóraŋ ma a ɣele wâla, vóloi a kùla, dí koôŋ dí lí ƃɛ́i núu da fé naa kɔ́lɔŋ.
18Óo Asiria kaloŋ, ílɔii-kpîniŋ mɛi káa-ƃelai da saa. Inuu kpaya-kpayai díkaa nyiî wɔ́lɔ-wɔlɔ da wɔ́lɔ-wɔlɔ. Ínûai táa-taai ǹyée-ŋai su, núu da fé naa é pá a dia ŋɔ́nɔ pôlu. 19Lii-sêe fé íyêei, ísɛŋ sôlii maa su a kɛ̂tɛi. Diai kélee da ímaa tûŋ mɛnii, da díyee ŋa lòkwa. Núu da káa naa ífe nii mɛni nyɔ́mɔɔ kɛ́ ní la?
Currently Selected:
Neeuŋ 3: KWB
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
© 2012 Bible Society in Liberia