Maka 6
6
M̀ɛnii Yâwɛɛ è mò é pîlaŋ Eezuɛ mai
1M̀ɛnii mɛ́ni Yâwɛɛ a môi é pîlaŋ Eezuɛ mai.
Óo Yâwɛɛ, m̀ɛnii ƃó Eezuɛ a gɛ́ a yái. Tɔɔ ǹyée kpaya-kpayai da ǹyée pɛlɛ-pɛlɛɛi dí m̀ɛnii mɛ́ni ƃa môi.
2Yée kpaya-kpaya-ŋa, káai kákaa a ǹɔii kɔ́ɔ pîlanii wɔ́lɔ-wɔlɔ da wɔlɔ-wɔlɔi, ka káwoli tɔ́ɔ m̀ɛnii ma Yâwɛɛ a môi. Mɛni káa Yâwɛɛ lá é pîlaŋ ŋɔnûai dîai. A pâi Eezuɛ ŋɔsɔnyɔ̂ŋ lɛ̂i.
3Yâwɛɛ ǹyɛɛ, “Óo ŋánûi, lé ƃé ŋa gɛ́ a káai? Lé mɛni kpɔlu ƃé ŋa pá la kapɔi? Ka ŋóo su tòo. 4Ŋá kákùla Ize lɔii su ŋá káŋuŋ maa ƃó luɛ-laa su. Ŋá Mose, Eelɔŋ da Miriaŋ tɛ̀ɛ a gɛɛ dítɔɔ ká túɛ. 5Óo ŋánûa, gíli é lɛ́ɛ káŋa m̀ɛnii Môa kaloŋ Bala è gbɛ̀tɛ a gɛɛ é gɛ́ a kaai, da berei Beo ǹóŋ Balaaŋ è ŋ̀óo su tòo lai. M̀ɛnii kɛ̀ berei su é síɣe Akasia é lí Geegai. Nyíŋi kélee é lɛ́ɛ kákili ŋá a gɛɛ ká gɔ́lɔŋ m̀ɛnii ŋá gɛ̀ a gɛɛ ŋá ká ŋuŋ-ma ƃôi.”
Zɛŋ Yâwɛɛ a ŋ̀wɛ̂lii
6Lé ƃé ŋa pɔɔ̂ri pâi la Yâwɛɛ pɔ́ nyii gáa ŋ̀elei sui, tãi ŋa pâ la vɛlîi? Ŋa pɔ̂ri pâi ŋ̀ɛ́i túɛ a niŋa-loŋ nyii gáa a kóraŋ tɔ̂nɔ a gɛɛ ŋá gúla a kéreŋ sâla? 7Yâwɛɛ líi a pɔ̂ri lâai à kɛ̀ ŋà pà bɔ́ a ƃála sîrɛ wála támaa, mii wulɔ kɛ́ɛ yɛ̂ɛ ya-lêe wála puu? Ŋa pɔ̂ri ńoŋ maa-ŋuŋ tɛɛ̂i bɔ́ a ŋásɔŋyɔ̂ŋ-ŋai fela fêi? 8Kpào, Yâwɛɛ a m̀ɛni lɛ́lɛɛ-ŋai lɛ́ kûa nyii a ŋ̀wɛ̂lii kú gɛi. M̀ɛnii a ŋ̀wɛ̂lii kúyêei ǹyaa ká ŋí: Kú tɔ̃yâ mɛni kɛ́, kú núu malôŋ káa a tãi kélee, kú kúmaa yéŋ Ɣâla ŋɛ́i woo mɛni su.
9Gáa a táre mɛni a gɛɛ núu é yao Yâwɛɛ ma. A tóli ƃôi daa-lêei su, “Ka káwoli tɔ́ɔ káai ká ŋáa tɛɛ̂i ma daa-lêei sui! 10Tɔɔ-sãa díkaa zɔnyɔ̂ŋ-ƃelai dípɛrɛ-ŋai mu nyii dífe zɔlɔ ƃó ní a tiniŋ ƃô perei. Da seŋ kɔ̂ɔŋ a nyɔ́mɔɔ nyii ŋ̀wɛ̂li fé ḿâi. 11Ŋa pɔ̂ri diai su-mɛni lɛɛ̂i léŋ da sɛŋ kɔ̂ɔŋ a wôya perei? 12Káai a dɔ́ɔ-ƃelai ka gôlo-ƃelai dí-sãai kula díyêei ǹyaŋ kákelee ká kɛ́ ƃò a lɛ́ɛ-ƃela. 13Mɛ̀ni ma ŋa nâa pɛlɛ ká kula-maa kɛ́ɛ ma, ŋá tée kâa ká sɔnyɔ̂ŋ mɛni ma. 14Ka pâi mii-sɛŋ miî, kɛ́lɛ ká líi fé pâi lâai, puru a pâi kɛ̂i nɔ́ kâa. Ka pâi sɛŋ kɔ̂rii, kɛ́lɛ ká fé pâi pɔrîi m̀ɛi kâai. Zɛŋ kélee káyêei, ŋa pâi zu karái a kɔ́. 15Ka pâi sí-sɛŋ sîi, kɛ́lɛ káfe pâi m̀á kulâi. Ka pâi wúlɔ kúlai wúlɔ-wuru su, kɛ́lɛ káfe pâi da miî. Ka pâi ŋwã̂ai kpɛtɛ̂i, kɛ́lɛ káfe pâi da kpelêi. 16Nyíŋi a pâi kɛ̂i, kpɛ́ni fêi, ka pîlaŋ gâloŋ Oŋri ŋɔtûa-pere nyɔ́mɔɔ-ŋai pôlu da ǹóŋ Eɣa nyii máŋ è kɛ̀ a kâloŋ. Ka pîlaŋ dímɛni kpɛ́tɛɛ nyɔ́mɔɔ-ŋai pôlu ǹyaŋ ŋa pâi ká su karâi, núu kélee é ká kpɔara. Núu kélee a pâi ŋ̀ɛ́i naŋînii ká mɛi.”
Currently Selected:
Maka 6: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
