Lûu 24

Zîsɛ mu-siɣeɛ saa yêei

(Maafîu 28:1-10; Mâki 16:1-8; Zɔ̂ŋ 20:1-10)

1Kɛ́lɛ, nɔɔkuui ŋɔɣele-kûui duɛ-tuɛ ɣele wàla pɛ-pɛi, dí pà m̀olôŋ lá a ŋ̀úru-ya kúŋ nɛ̃ɛi nyii dí gbɛ̀tɛi. 2Nya ƃe dí nàa kàa vɛ̃ɛ-ƃelai kúlaa m̀olôŋ lá. 3Kɛ́lɛ, tãi dí lɔ̀ la naai, dífe (Dínuu-namui Zîsɛ) pomai kaa ni. 4Nya ƃe e kɛ̀ ti, díkɛɛ díkili ŋá siâi a mɛnii ŋi, ka gáa, sinâa feerɛ dí kɛ̀ tɔɔ ni díkɔlɛ yokpo foloɔ-ŋa su; 5díkɛɛ yaôi, dí díŋuŋ ma pìlaŋ ǹɔii ma. Zinâai dí mò dîa, dîyɛɛi, “Le ƃe kɛ̀ ka nuu-fului kɔ́rîi zaa-ƃelai samai? (Ve ƃɛ, aâ m̀u siɣe.) 6É lɛ́ɛ kákili ŋá berei e mò la kàa gɛɛ kɛ̀ Galalii-lɔii sui, 7a gɛɛ fɛ̂ɛ da núu-kpune Ǹóŋ tɛɛ sɔnyɔ̂ŋ-ƃela pɔ, dí gbamo saa-wuru ma, ŋele-kuui zaaƃa-ɣelei e m̀u siɣe saa yêei.” 8Nya ƃe ŋ̀óo-ŋai e lɛ̀ɛ díkili ŋá. 9Díkɛɛ kulâi molôŋ lái, dí lì pôlu dí m̀ó ŋɔpôlu-ƃela puu kao tɔnɔɔi ma, da núu kpeli-ŋai kélee. 10Dia ƃe kɛ̀ a Mere Madalini, da Zoana, bɛlɛɛ Zĩi ǹee Mere ma. Nɛyâai nyii-ŋai da dîa-ni dí kɛ̀ naai dí mɛni-ŋai ŋi ƃo ŋɔsia-ƃelai dîa; 11kɛ́lɛ, ŋ̀óo-ŋai ŋi dí kɛ̀ nɔ dîa a ƃoo-woo-ŋa. Nya ƃe dífe dísiɣe ni a tɔ̃yâ. [ 12Kɛ́lɛ, Pitɛ e m̀u sìɣe e li a kîrɛ molôŋ lá. E m̀aa pɛ̂lɛ, gɛ nàa kaa, ve sɛŋ da kaa ni fɛ̂ɛ zeɣe kole-ŋai. E lì bɔ naa, gɛ gíli ŋá sia berei mɛnii ŋi a kɛ́ lai.]

Ɛmeyɔ-siai

(Mâki 16:12, 13)

13Ǹúui veerɛ dí kɛ̀ siâi a maa-ɣelei ti, díkɛ li kpanâŋ da lá ǹáa ƃe kɛ̀ a Ɛmeyɔ, nyii kɛ̀ a aƃa feerɛ-sia e kula Zerusâlɛŋ. 14Dí kɛ̀ lônoi gîe-ma e pîlaŋ mɛni-ŋai kélee dîa da kɛ́i. 15Nya ƃe e kɛ̀ ti, díkɛɛ lônoi díkɛ mare-kɛɛ kɛ̀ gîe-mai, Zîsɛ ǹyaa kpîŋ e lɛ̀ɣɛ a dia da dîa-ni díkɛ sia. 16Kɛ́lɛ, sɛŋ da e dí kɛ̀ díŋɛi fé m̀aa kpɛɛ ní. 17E mò dîa, ǹyɛɛi, “Le-mɛni ƃe ŋi ka m̀ôi gîe-ma kakɛ siai?” Nya ƃe dí tɔ̀ɔ tɔŋ a malôŋ-pere. 18Nya ƃe díta tɔnɔ, ǹáa ƃe kɛ̀ a Kiliapa, e ŋ̀óo su tòo, ǹyɛɛi, “Ya nɔ ƃa ŋɔ̃yâ tɔnɔi Zerusâlɛŋ nyii ve mɛnii ŋi kɔlɔŋ a kɛ́ naa a ŋele-ŋai ŋi?” 19Nya ƃe e mò dîa, ǹyɛɛi, “Le-mɛni-ŋa?” Dí mò ma, dîyɛɛi, “É pîlaŋ Nâzarɛ Zisɛi ma, nyii kɛ̀ a lóno-kɛ-nuu kɛ́tɛ ŋɔtíi-kɛɛi su da ŋɔlóno-wooi Ɣâla da ǹûai kélee díŋɛi, 20berei zâla láa soŋ-ƃela kpaya-kpayai da kúgɔmɛnɛ-ƃelai dí dɛ̀ɛ la a gɛɛ dí mɛni lɛ́ɛ ma a gɛɛ e saa, dí gbamo saa-wuru mai. 21Kɛ́lɛ, e kɛ̀ kúkili ŋá a gɛɛ e kɛ̀ pâi Eezuɛ maa teêi. É kúla nyiŋi kélee ma, a kɛ́ nàa a ŋele-kuui zaaƃai nyiŋi kɛ́ɛ a kɛ́i. 22Fulɔi máŋ, Kúkpulu su nɛyâa da-ni dí kúpɛlɛ pù. Dí lì molôŋ lá a ɣele-wala pɛ-pɛ, 23dífe bomai kaa ni. Dí pa pôlu, díkɛ mo a gɛɛ da Ŋ̀âla-taa-kela-ŋai káa zĩa su nyii mò dîa a gɛɛ gáa a vúlui. 24Kúkpulu da-ni dí lì molôŋ lá, dí gáa nɔ́ yɛ̂ɛ berei nɛyâai dí mò lai, kɛ́lɛ, dífe gáa ni.” 25Nya ƃe è mò dîa, ǹyɛɛi, “Óo, ƃoo-ƃela, káai kámɛni ŋá káa la wâlai, káfe m̀ɛni siɣêi a tɔ̃yâ nyii kélee Ɣâla ŋɔlóno kɛ́-ƃelai dí mòi! 26Fɛ̂ɛ Kôrai é mɔ̃lɛ mɛni-ŋai ŋí dîa é lɔ́ ŋɔfólo-laai su, ve tí?” 27Nya ƃe, é síɣe Mose ma da Ɣâla ŋɔlóno-kɛ-ƃelai kélee, mɛnii Ŋ̀âla-kɔlɔi su e pîlaŋ gbîŋ mai, e zu-kulai lɛ̀ dîa.

28Nya ƃe dí kɛ̀ lɛɣɛ̂i gbanâŋ lá ƃɛi dí kɛ̀ liî naai. È gɛ̀ nɔ́ yɛ̂ɛ ǹyaa ƃe è kɛ̀ liî tuɛ-pere, 29kɛ́lɛ, dí gbèra fé a gbanaŋɔɔ, dîyɛɛ, “Kwaa lɛɛ ƃɛ. Kpɛ́ni fêi, ɣele-wulii-tãi a lɛɣɛ, volo-kaoi a kɛ́ yenîi.” Nya ƃe e lɔ̀ dí lɛ́ɛ naa. 30Tãi e sèe la da dîa-ni a gɛɛ dí dílaa mii, e gbóloi siɣe, e lûwa too ma, e zu ɣale e dɛɛ dípɔ. 31Nya ƃe díŋɛi lá e ƃò, dí m̀aa kpɛɛ. È làŋ díŋɛi a maa félaa. 32Dí mò díkîe-ni dîa, dîyɛɛ, “Kúlii e kɛ̀ kérenîi tãi e kɛ̀ lônoi la kúpɔ berei ma, gɛ Ŋ̀âla-kɔlɔi su-kulai lɛ kûai, ve ti?” 33Nya ƃe dí dímu síɣe a maa-aƃai tí, dí lí pôlu Zerusâlɛŋ. Dí ŋɔpôlu-ƃela puu kao tɔnɔi kàa bɛlɛɛ ǹûai dia nyii-ŋai da dîa-ni dí kɛ̀ naa, dí díŋa tɛ naa gîe-mai, 34nyii mò dîa, dîyɛɛi, “Tɔ̃yâ ma, Kúnuu-namui a m̀u siɣe, ǹyaŋ aâ kula Samaŋ ŋɛi!” 35Gɛɛ ti, dí mò mɛnii a kɛ́ berei mai, da berei dí m̀aa kpɛ̀ɛ la gbolo-ɣaleɛi sui.

Zîsɛ è gbîŋ lɛ̀ ŋɔpôlu-ƃelai dîa

(Maafîu 28:16-20; Mâki 16:14-18; Zɔ̂ŋ 20:19-23; Zia-ƃelai Kɛ́-mɛni-ŋai 1:6-8)

36Díkɛɛ kɛ̀ lônoi, Zîsɛ ǹyaa kpîŋ e tɔ̀ɔ dísama. [Nya ƃe e mò dîa, ǹyɛɛi, “Lii-see é kɛ́ káyêei!”] 37Dílaa e fɛ̀ɛ a yao, gɛ ƃo díkili ŋá a gɛɛ da mɔ̂leŋ káa. 38Kɛ́lɛ, e mò dîa, ǹyɛɛi, “Le ƃe kɛ̀ kálii káa kɔ̂i? Le ƃe kɛ̀ mare-kɛɛ a kulâi kálii sui? 39Ka ńyee da ŋ́gɔɔ káa a gɛɛ ńyaa kpîŋ ká ŋí. Ka káyee pɛ́lɛ ḿâ, ka gáa, kpɛ́ni fêi, mɔ̂leŋ lúu fé ma da gao-ŋa yɛ̂ɛ berei ka gáâi ŋ́gaa lai.” [ 40Gɛɛ a mɛnii ŋi ƃói, e ǹyée da gɔ́ɔ lɛ̀ dîa.] 41Kɛ́lɛ, berei dífe laa ni la a dílii-nɛ̃ɛ-perei, dípɛlɛ e pù, é m̀ó dîa, ǹyɛɛi, “Sɛŋ da káa ƃɛ mii-mɛni ma?” 42Dí nyɛ̃ɛ-ŋɔŋ kpua tɛ̀ɛ bɔ, 43nya ƃe e zìɣe, e mii díŋɛi.

Zîsɛ è Ŋ̀âla-wooi su kùla é pîlaŋ gbîŋ maa-mɛni ma

44Nya ƃe è mò dîa, ǹyɛɛi, “Ŋ̀óo-ŋai ká ŋí nyii ŋá mò kâa tãi ŋá kɛ̀ la kákɔlɛi, a gɛɛ mɛnii kélee bɔ̃yɛɛ̂i e pîlaŋ mâ Mose ŋɔtɔ̂ŋ sui da Ɣâla ŋɔlóno-kɛ-ƃelai díkɔlɔi sui, bɛlɛɛ nyii ma ŋ̀ule-woo-kɔlɔi sui, fɛ̂ɛ ŋa-see é kɛ́.” 45Gɛɛ ti, e díkili ŋá pòno a gɛɛ dí táre Ŋ̀âla-kɔlɔi su. 46Nya ƃe e mò dîa, ǹyɛɛi, “Bɔ̃yɛɛ̂i a gɛɛ fɛ̂ɛ Kôrai e mɔ̃lɛ, e m̀u siɣe saa yêei a ŋele-kuui zaaƃa-ɣelei. 47Ǹyaŋ à kɛ̀ ti, ǹáa su lii-pene da sɔnyɔ̂ŋ su-mɛni-lɛɛ a pâi ƃôi sii-ŋa kélee ma, gɔ́ɔ e pîlaŋ Zerusâlɛŋ. 48Káa ƃa mɛni-ŋai ŋi maa-sêre-ŋa. 49Ka gáa, ŋa pâi dɛɛ̂i kápɔ naa nyii Ńâŋ a gono tée lai, kɛ́lɛ, ka lɛɛ daai su e lɛɛ zu kámaa e ɣiri a wala-wala nyii kulâi ŋelei su póŋ-póŋ.”

Zîsɛ tɛ́-pere Ɣâla-taa

(Mâki 16:19, 20; Zia-ƃelai Kɛ́-mɛni-ŋai 1:9-11)

50È lì a dia Bɛtɛni kɔlɛ ma. Nya ƃe e ǹyée tɛ̀ dímɛi-pere, e lûwa too dîa. 51Nya ƃe e kɛ̀ ti, gɛɛ kɛ̀ lûwa toôi diai, e kùla dísama, (e tɛ Ɣâla-taa). 52Nya ƃe (dí vɛ̀li) dí li pôlu Zerusâlɛŋ a lii-nɛ̃ɛ kɛ́tɛ. 53Dí kɛ̀ kpɔ́ nɔ Ŋ̀âla-pɛrɛ Kɛ́tɛi mu a ɣele kélee, díkɛ laa-maa-tɛ tɛɛ Ɣâla pɔ, díkɛ lûwa too ma.

Currently Selected:

Lûu 24: KWB

Highlight

Copy