Lûu 21

Bɔɔ-nɛ̂nii ŋɔsama-sɛŋ

(Mâki 12:41-44)

1Zîsɛ e ŋɛi mu sìɣe e dɔɔ-ƃelai kaa, díkɛ dísama-sãai too zɛŋ-kao laai-kɛ-kwaai ma; 2nya ƃe e pɔɔ-nɛni kôloɔ tɔnɔ kàa nyii e sɛŋ-kao kpua-kpua feerɛ too zu. 3Nya ƃe e mò, ǹyɛɛi, “Tɔ̃yâ ma, ŋá m̀ó kâa, bɔɔ-nɛni kôloɔi ŋi e dámaa tòo zu é tɛ́ɛ díkelee dîa; 4kpɛ́ni fêi, díkelee dí dòo zu yɛ̂ɛ berei gɛ́tɛ̂i la díyêei, kɛ́lɛ, ŋɔkôlo-laai su a zɛŋ-kaoi kélee tɛ́ɛ kɛ̀ ǹyêei.”

Zîsɛ è Ŋ̀âla-pɛrɛ Kɛ́tɛi kara-mɛni ƃò ǹaa tuɛ

(Maafîu 24:1, 2; Mâki 13:1, 2)

5Tãi da-ni dí lòno la e pîlaŋ Ŋ̀âla-pɛrɛ Kɛ́tɛi ma berei dí dɔ̀ɔ la a ǹɛ́lɛɛ a kɔni lɛ́lɛ-lɛ́lɛɛ-ŋa da zama-sɛŋ-ŋai, e mò, ǹyɛɛi, 6“É máŋ kɛ́ ti, zãâi ŋi ka díkaâi, ɣele-ŋa da a pâi pâi tãi kɔni tɔnɔ kpîŋ fé pâi lɛɛ̂i ƃɛ gîe mɛi. Da pâi díkelee toôi ǹɔii ma.”

Mɛni kpɔ̂lu da kpɔara káa pâi

(Mâki 13:3-13; Lûu 21:7-19)

7Nya ƃe dí m̀arê kɛ̀, dîyɛɛi, “Kaamɔ̂ɔ, tãi nênɛ ƃe nyiŋi a pâi kɛ̂i lai? Le-ŋɛi-kɛ-maa ƃe pâi kɛ̂i tãi mɛni-ŋai ŋi da pâi kɛ̂i lai?” 8E mò dîa, ǹyɛɛi, “Ka kámɛi káa a gɛɛ núu da fé kápɛlɛ. Kpɛ́ni fêi, núu támaa da pâi pâi ńaai su, dí kɛ́ mò dîyɛɛ, ‘Ńyãa ƃa ǹyaa!’ díkɛ mò ŋɔ́nɔ dîyɛɛ, ‘Tãi a seri!’ Káfe pìlaŋ dípôlu. 9Tãi kà kɔ-kɔ-tuŋ mɛ̀ni la da mɛni kpɔ̂lui, káfe yào; fɛ̂ɛ mɛni-ŋai ŋi a pa fulɔi, kɛ́lɛ, gbɛɛ ŋá fé pâi pâi a naa maa felaa.”

Ŋ̀ɛi-kɛ-maa-ŋai pâi kɛ̂i ŋ̀éniɛi kɛ́ tela kpɛɛi

10Nya ƃe e mò dîa, ǹyɛɛi, “Lɔii a pâi tɔɔ̂i lɔii ma, kâloŋ-laa kɛ́ tɔɔ kâloŋ-laa ma; 11lɔii-kpɛ̃liŋɔɔ kɛ́tɛ da puru kpaya-kpaya, bɛlɛɛ núu-paa kɔlɔ-fela-ŋa dîa da pâi kɛ̂i kwaa támaa ma; mɛni maa-pɔlɔ-pɔlɔ-ŋa da ŋɛi-kɛ-maa-ŋa da pâi kulâi Ɣâla-taa. 12Kɛ́lɛ, nyíŋi kélee é lɛ́ɛ pâi kɛ̂i, da pâi díyee pɛlɛ̂i kâa, dí káŋɛi maa nɔ̃́ɔ. Da pâi kátɛɛ̂i Ŋ̀âla-fɛli-kêre-ŋai mu da gbini-pɛrɛ-ŋai mu. Da pâi pâi a káa kâloŋ-ŋa da gɔmɛnɛ-ƃelai ŋɛ́i túɛ ńaai mɛni ma. 13Nyíŋi ƃe pâi kɛ̂i a káwɔ̂-tãi a gɛɛ ka sêre-faa kɛ́. 14Ka gbɛtɛ kálii su a gɛɛ káfe kákili ŋá sìa tuɛ-pere berei ka pâi zu toôi lai, 15kpɛ́ni fêi, ŋa pâi lá-gbɔ da táre tɛɛ̂i kápɔ nyii kákpɔara-ƃelai kélee dífe pâi pɔrîi dítɔɔ kámɛni ma, kpaa máŋ dí kála sîa too. 16Kánâŋ-ni máŋ da kálee-ni, kálee-kaa-surɔŋ, kánûa, da káƃarâai da pâi kátɛɛ̂i. Da pâi káta-ni-ŋai paai. 17A kɛ̀ ti, ǹûai kélee da pâi kákpɔarâi ńaai mɛni ma. 18Kɛ́lɛ, káŋuŋ-leɣai gáa káŋuai dɔnɔ kpîŋ ŋuŋ-la fé pâi pilîi. 19Kálii-kpele-pere ƃe ka pâi káfulu-laai sɔlɔ ƃôi la.

Zîsɛ è Zerusâlɛŋ su-kara mɛ̂ni ƃò

(Maafîu 24:15-21; Mâki 13:14-19)

20“Kɛ́lɛ, tãi kà Zerusâlɛŋ kàa la maa tinaŋɔɔ a ǹɔii maa kpɛ́-ƃelai, gɛ̀ ní, ka gɔ́lɔŋ a gɛɛ ŋɔsu-karai a lɛɣɛ. 21Gɛ̀ ní, diai díkaa Zuda, tɔɔ dí pu dí li ǹyée-ŋai su. Tɔɔ diai daai sui dí kúla naa. Tɔɔ diai díkaa kpâlaŋ ŋái dífe li naa; 22kpɛ́ni fêi, nyii-ŋai ŋi káa a mɛni-pɔɔi-kula ɣele-ŋa a gɛɛ mɛni-ŋai kélee bɔ̃yɛɛ̂i ŋa-see é kɛ́. 23Kpalo ƃélaâi dîa diai díkoo káa diai, da diai ŋíni tɛɛ̂i díkwatara-ŋai pɔ a ŋele-ŋai ti! Kpɛ́ni fêi, mɛni-kpɔ̂lu kɛ́tɛ a pâi pâi ŋ̀éniɛi su da lii-ŋwana ǹûai ŋi dîa; 24da pâi lɛɛ̂i m̀óa-sɔkpɔ-ŋai yée mu, dí li a dia a pelesinɛ ǹɔii-sii-ŋai kélee su; à kɛ̀ ti, Zɛ̃tai-ŋai da pâi Zerusâlɛŋ tánîi díkɔɔ mu e lɛɛ zu Zɛ̃tai-ŋai dítãi ŋa-see é kɛ́.

Núu-kpune Ǹóŋ pá-pere

(Maafîu 24:29-31; Mâki 13:24-27)

25“Ŋɛi-kɛ-maa-ŋa da pâi kɛ̂i voloi su, da ŋ̀áloŋ, da bɛmɛlɛŋ-kaoi ma. À kɛ̀ ti, yao kɛ́tɛ a pâi kɛ̂i zîi-ŋai sama dípɛlɛ e pu a yuo too tiŋ kpaya-kpayai, bɛlɛɛ nya-ɣiliŋ-ŋai dîa, 26núu a pâi foâi a yao da maa-kpɛ̃liŋ e pîlaŋ mɛni-ŋai ma pâi ŋ̀éniɛi sui; kpɛ́ni fêi, ŋwála-wala-laa-ŋai ŋelei sui da pâi kɛ̂i túmôi. 27Gɛ̀ ní, da pâi núu-kpune Ǹóŋ kâai gɛ pa ɣele-kɔlɔŋ kole su a wala-wala-laa da folo-laa kɛ́tɛ. 28Kɛ́lɛ, mɛni-ŋai ŋi dí pɛlɛ kɛ́ɛ ma, ka káŋɛi tɛ́ ɣelei, ka káŋuŋ mu siɣe. Kpɛ́ni fêi, kámaa-teɛɛ a lɛɣɛ.”

Zɛŋ-lɛ́ɛi é pîlaŋ fîi-wurii tɛ́nîŋɔɔi ma

(Maafîu 24:32-35; Mâki 13:28-31)

29Nya ƃe e sã́ŋ sɔ̀ɔ dîɛ: “Ka fîi-wurii da ŋ̀úru-ŋai kélee káa. 30Tãi nɔ́ kà gàa dítɛniŋɔɔ̂i, káa kpîŋ ka gàa a gɛɛ fólo-laa-ƃoɔ-tãi a lɛɣɛ. 31Gɛ̀ ní máŋ, tãi kà mɛni-ŋai ŋi kàa kɛ̂i, ka gɔlɔŋ a gɛɛ Ɣâla ŋɔkâloŋ-laai a lɛɣɛ. 32Tɔ̃yâ ma, ŋá m̀ó kâa, ŋ̀éniɛi ŋi su-ƃelai dífe pâi kpɛɛ̂i e lɛɛ zu gélee ŋa-see é kɛ́. 33Ŋelei da ǹɔii da pâi kpɛɛ̂i. Kɛ́lɛ, ŋ́ooi fé pâi wɔ́lɔ kpɛɛ̂i.

Ka kámɛi káa

34“Ka kámɛi káa a gɛɛ kálii fé wiɛ a sɛŋ-miɛɛ da lɔɔ-kpeleɛ da vúlu-laai ŋi ŋɔlii-sɛlɛŋ-ŋai a gɛɛ maa-ɣelei ti fé lâa pa la nɔ kàa a maa félaa yɛ̂ɛ ƃáre a bɔara. 35Kpɛ́ni fêi, a pâi pâi ǹúui kélee ma díkaa ǹɔii gwaa kélee mai. 365Kɛ́lɛ, ka kámɛi káa a tãi kélee. Ka Ɣâla fɛli a gɛɛ kákponôi e kpanaŋ, ka kula mɛni-ŋai ŋi kélee su pâi, a gɛɛ ka tɔɔ núu-kpune Ǹóŋ ŋɛi.”

Zîsɛ è mɛni lɛ̂ Ŋ̀âla-pɛrɛ Kɛ́tɛi mu

37Nya ƃe ɣele kélee è kɛ̀ Ɣâla-woo lɛ̂i Ŋ̀âla-pɛrɛ Kɛ́tɛi mu. À kɛ̀ tí, kpíni kélee gɛ́ lì, gɛ́ nyìi ǹyéei ma da kɛ̂ ma Ŋulɔ-wuru-Yeei. 38Nya ƃe ɣele-wâla nɛ̃ɛ-nɛ̃ɛ ǹûai kélee dí pà bɔ́ Ŋ̀âla-pɛrɛ Kɛ́tɛi mu a gɛɛ dí ŋ̀óo mɛni.

Currently Selected:

Lûu 21: KWB

Highlight

Copy