Lûu 19

Zîsɛ da Zakîɛ

1Nya ƃe Zîsɛ e tɛ̀ Zɛleko, gɛ naa su ƃɔ. 2Nalôŋ tɔnɔ e kɛ̀ naa, ǹáa kɛ́ ƃo a Zakîɛ; e kɛ̀ a ŋuŋ-fela-fei kula-nuu kɛ́tɛ, gɛ ƃo a tɔɔ-nuu. 3E kɔ̀ a gɛɛ e Zîsɛ kaa, kɛ́lɛ, ve pɔ̂ri ni gbɔŋ mɛni ma. Kpɛ́ni fêi, e kɛ̀ a núu kpua. 4Nya ƃe e kirɛ sìɣe tuɛ-pere, e tɛ sakimo-wurii su a gɛɛ e gáa. Kpɛ́ni fêi, Zîsɛ e kɛ̀ pâi tɛɛ̂i a naa-pere. 5Tãi Zîsɛ e pà la naai, e ŋ̀ɛi tɛ̀ ɣelêi, e m̀ó ma, ǹyɛɛi, “Zakîɛ, pîlaŋ a maa felaa; kpɛ́ni fêi, fɛ̂ɛ ŋa sâa tua ípɛrɛi lá.” 6Nya ƃe e pîlaŋ a maa felaa, e ǹyée sée mù a lii-nɛ̃ɛ. 7Díkɛɛ da gáai, díkelee dí díŋuŋ su sàa, dîyɛɛi, “A lí a gɛɛ é kɛ́ a sɔnyɔ̂ŋ-nuu ŋɔŋɔ̃ya.” 8Nya ƃe Zakîɛ e mu siɣe e m̀ó Kúnuu-namui ma, ǹyɛɛi, “Gáa, Kúnuu-namui, ŋa pâi ŋ́gɔ̃liŋ gbûra tɛɛ̂i gôlo-ƃelai pɔ; à kɛ̀ ŋà sɛŋ da kula núu ma a wôya-pere, ŋa pâi bɔɔ-too tɛɛ̂i pôlu náaŋ.” 9Zîsɛ e mò ma, ǹyɛɛi, “Ƃálo-laa a sâa pá bɛ́rɛi ŋi lá. Kpɛ́ni fêi, gáa máŋ a Eberaɣɛ̃ɛ ǹóŋ da. 10Kpɛ́ni fêi, núu-kpune Ǹóŋ e pà a gɛɛ e díkɔ̂ri, e díƃalo, diai kɛ̀ a dílaŋɔɔ̂i.”

Záŋ bîlaŋɔɔi bãŋ puui mai

(Maafîu 25:14-30)

11Díkɛɛ díwoli tɔɔ̂i mɛni-ŋai ŋí mai, Zîsɛ è pɛ̀lɛ sã́ŋ sɔ̂ɔ ma dîa, kpɛ́ni fêi, è kɛ̀ a ǹɛɣɛɛ nâa Zerusâlɛŋ, è kɛ̀ ŋɔ́nɔ díkili ŋá a gɛɛ Ɣâla ŋɔkâloŋ-laai è kɛ̀ pâi lɛ̂i a maa félaa. 12Maa-mɛni ƃe e mò la, ǹyɛɛi, “Laa-maa-nuu tɔnɔ ƃe lì lɔii kôya su a gɛɛ dí gɛ a kâloŋ kɛ́tɛ e pa ŋɔ́nɔ pôlu. 13E ǹyee-mu-ƃelai buu tôli, e pãi puu tɛ̀ɛ dípɔ, ǹyɛɛ dîa, ‘Ka káyee pene zu e lɛɛ zu ŋa pa pôlu.’ 14Kɛ́lɛ, ŋɔlɔii-su-ƃelai dí gbɔ̀ara, dí kela-ŋa tɛ̀ɛ dí pìlaŋ bôlu a gɛɛ dí m̀ó, dîyɛɛ, ‘Kúfe ŋ̀wɛ̂lii nalôŋ ŋi é kɛ́ a kâloŋ kúmɛi.’

15“Nya ƃe e kɛ̀ ti, tãi e pà la pôlu, gɛɛ a kâloŋ, e ǹyée-mu-ƃelai tôli nyii-ŋai e zɛŋ-kaoi tɛ́ɛ dípɔi a gɛɛ e gáa berei da díyee pene la zui. 16Ǹúui duɛ-tuɛi e pà bɔ e m̀o, ǹyɛɛi, ‘Ńâmu, ípãu a pãi puu kɛ́.’ 17Nya ƃe e mò ma, ǹyɛɛi, ‘Ya gɛ́ a ǹɛ́lɛɛ, yée-mu-nuu lɛ́lɛɛ! Kpɛ́ni fêi, ya tenîŋ-mo kɛ́ mɛni-loŋ su, wala-wala-laa a pâi kɛ̂i íyeêi taa puu mɛi.’ 18Ǹúui veerɛi e pà, ǹyɛɛi, ‘Ńâmu, ípãu a pãi lɔ́ɔlu kɛ́.’ 19Nya ƃe e mò ma, ǹyɛɛi, ‘Ya pâi kɛ̂i taa lɔ́ɔlu mɛi.’ 20E kɛ̀ ti gbeli e pà, ǹyɛɛi, ‘Ńâmu, ípãu ká nyii ŋá màa gbìniŋ a seɣe, ŋá ǹáâi kɛ̂i. 21Kpɛ́ni fêi, ŋa kɛ̀ yáôi yâ berei íkaa la a ǹúui ŋɔmɛni kpanaŋɔɔ̂i; ya zɛŋ sîɣe naa nyii ífe ǹáa ni naai, íkɛ zí-sɛŋ ƃá kula ŋá nyii ífe zí ni.’ 22È mò mà, ǹyɛɛi, ‘Íkpɔɔi lá-wooi ƃe ŋa pâi ímɛnii ŋá têei la, wúlu-yee-mu-nuu! Íkɛ a gɔ́lɔŋɔɔ a gɛɛ ŋ́gaa a ǹúui ŋɔmɛni kpanaŋɔɔ̂i, ŋ́gɛ zɛŋ sîɣe naa nyii ḿve ǹáa ní naai, ŋ́gɛ zí-sɛŋ ƃá kula ŋá nyii ḿve zí níi. 23Le ƃe kɛ̀ ífe ŋásɛŋ-kaoi pu ní zɛŋ-kao-laai kɛ́ pɛrɛi kú a gɛɛ tãi ŋà pà la pôlu, ŋá zɔlɔ ƃó bɛlɛɛ geni ma ŋɔ́nɔ?’ 24Nya ƃe e mò diai kɛ̀ tɔɔ ni nâa kɔlɛ mai, ǹyɛɛi, ‘Ka ŋɔpãŋ kúla ǹyêei. Ka dɛɛ nalôŋ pɔ nyii pãi puui káa ǹyêei.’ 25Nya ƃe dí mò ma, dîyɛɛi, ‘Ńâmu, pãi puu káa ǹyêei!’ 26È mò dîa nyɛɛ, ‘Ŋá m̀ó kâa, ǹúui sɛŋ da káa ǹyêei, nya ƃe da a pâi tɛɛ̂i bɔ. Kɛ́lɛ, ǹúui sɛŋ da fe ǹyêei, ǹyaa ƃe ŋɔi ǹyée ŋái da pâi gulâi ǹyêei. 27Kɛ́lɛ, diai a ŋ́gbɔara-ƃelai dífe kɛ́ ni ŋ̀wɛ̂lii a gɛɛ ŋa kɛ́ dímɛi, ka pá a dîa, ka dípaa ŋ́ɛi.’ ”

Nii-nɛ̃ɛ-siai kɛ̀ Zerusâlɛŋ

(Maafîu 21:1-11; Mâki 11:1-11; Zɔ̂ŋ 12:12-19)

28Gɛɛ a nyíŋi ƃói, e lì dítuɛ Zerusâlɛŋ. 29Nya ƃe e kɛ̀ ti, tãi nâa e sèri la Bɛfazi da Bɛtɛni ǹyéei kɔlɛ da dòli a Ŋulɔ-wuru-yeei, e ŋɔpôlu-ƃelai veerɛ tɛ̀ɛ, ǹyɛɛi, 30“Ka lí gbanâŋ lá kátuɛ-pere. Kà sèri naa, ka pâi wɛlɛ-sôo-loŋ kâai gbulɔ̂ŋɔɔ naa nyii núu da fé niî wɔ́lɔ see ni bôlui; ka vúloŋ, ká pá la ƃɛ. 31À kɛ̀ núu da à kámarê kɛ̀, ǹyɛɛi, ‘Le ƃe kɛ̀ ka vúlonîi?’ Ka pâi nyíŋi ƃôi kâai, ‘Kúnuu-namui a ŋ̀wɛ́li kɛ̂i.’ ” 32Nya ƃe, diai e dítɛ̀ɛi, dí lì, dí gáa kpɔ́ nɔ yɛ̂ɛ berei e mò la diai. 33Díkɛɛ kɛ̀ ŋwɛlɛ-sôo-loŋ fúlonîi, namela dí mò dîa, dîyɛɛi, “Le ƃe kɛ̀ ka ŋwɛlɛ-sôo-loŋ fúlonîi?” 34Nya ƃe dí mò, dîyɛɛi, “Kúnuu-namui a ŋ̀wɛ́li kɛ̂i.” 35Dí pà la Zîsɛ pɔ. Dí díseɣe-ŋai pu ŋwɛlɛ-sôo-loŋ pôlu, dí Zîsɛ see mɛi. 36Gɛɛ liî, dí díseɣe-ŋai pɛ̂lɛ berei ma. 37Nya ƃe gɛɛ a lɛɣɛ, gɛ Ŋulɔ-wuru-yeei yeŋ, ŋɔpôlu-ƃela kpɔŋ kélee dí pɛ̀lɛ lii-nɛ̃ɛ kúlaa ma, díkɛ Ɣâla láa maa tɛ a láɣi-woo, berei dí ŋwála-wala-tii kpaya-kpaya-ŋai kélee kàa lai. 38Díyɛɛi, “Lûwa káa gâloŋ ma nyii pà Kúnuu-namui láai sui! Lii-see é kɛ́ Ɣâla-taa, laa-maa-tɛ é kɛ́ ɣelei-pere póŋ-póŋ!” 39Nya ƃe Faresii-ŋai dí kɛ̀ gbɔŋ sui, da-ni dí mò ma, dîyɛɛi, “Kaamɔ̂ɔ, m̀ó ípôlu-ƃelai dîa dí kpera.” 40E zu tòo, ǹyɛɛi, “Ŋá m̀ó kâa, à kɛ̀ nyii-ŋai ŋi da kɛ̀ a dímɛi saa, gɔni-ŋai kpîŋ da pâi lâɣii.”

41Gɛɛ a lɛɣɛ, gɛ daai kaai, e wɔ̀lɔ a gbanaŋɔɔ daai mɛi, 42ǹyɛɛi, “Eêi kɛ̀ kpîŋ îi gɔlɔŋ íɣelêi ŋi su le-mɛni-ŋa ƃa lii-sêe kɛ̀! Kɛ́lɛ, loníi ma ǹoɔɔ̂i íŋɛi. 43Kpɛ́ni fêi, ɣele-ŋa da pâi pâi yâ tãi íkpɔara-ƃela da pâi gala tɔɔ̂i la dí dínâŋ yâ, dí ímaa tinaŋ dí bîlaŋ gîei, dí íkɛ naa ífa pɔ̂ri kulâi, 44dí ítoo ǹɔii ma da ínîa-pɛlɛɛi ígarai su, dífe pâi ísu kɔni tɔnɔ kpîŋ lɛɛ̂i laa ni gîe mɛi. Kpɛ́ni fêi, ífe niî ínaa-kaa-tãi kɔlɔŋ ni.”

Zîsɛ è lì Ŋ̀âla-pɛrɛ Kɛ́tɛi mu

(Maafîu 21:12-17; Mâki 11:15-19; Zɔ̂ŋ 2:13-22)

45Nya ƃe è lɔ̀ Ŋ̀âla-pɛrɛ Kɛ́tɛi mu, é pɛ́lɛ ǹûai kpɛ́ɛ ma kɛ̀ pɔni tɔɔ̂i naai, 46ǹyɛɛ dîa, “Bɔ̃yɛɛ̂i, ‘Da pâi ŋápɛrɛi kɛ̂i a Ɣâla-fɛli-pɛrɛ’; kɛ́lɛ, ka gɛ́ a ŋuma-ƃela-kɛi.”

47Nya ƃe e kɛ̀ Ɣâla-woo lɛ̂i Ŋ̀âla-pɛrɛ Kɛ́tɛi mu a ɣele kélee. Zâla láa soŋ-ƃela kpaya-kpayai da gɔlɔ-pɔ̃yɛ-ƃelai, bɛlɛɛ ǹɔii-namelai dîa, dí kɛ̀ bàa-pere kɔ́rîi; 48kɛ́lɛ, dífe pere kélee da kaa ni dí gɛ la, kpɛ́ni fêi, ǹûai kélee dí kɛ̀ ŋ̀óo pôlu.

Currently Selected:

Lûu 19: KWB

Highlight

Copy