Lûu 13

Ka kálii pene, à wàla kɛ́ ti, káŋuŋ-la a pâi pilîi

1Maa-tãi ti su núu da-ni dí pà dí m̀ó ma e pîlaŋ Galalii-ƃelai dîa nyii-ŋai Pâle e díŋãa sumo a díkpîŋ-salai. 2Nya ƃe e díwoo su tòo, ǹyɛɛ, “Gáa kákili ŋá a gɛɛ Galalii-ƃelai ŋi dí kɛ̀ a sɔnyɔ̂ŋ-ƃela kɛ́tɛ é tɛ́ɛ Galalii-ƃela kpeli-ŋai kélee dîa berei dí mɔ̃lɛ la ŋi? 3Ŋá m̀ó kâa, Kpao; kɛ́lɛ, fɛ̂ɛ ka kálii pene, à wàla kɛ́ ti, kákelee kaŋuŋ-la a pâi pilîi nɔ ti. 4Kpaa máŋ núu puu kao lɔ́ɔlu mɛi saaƃai nyii Selôyɛŋ kɔni-yeŋ-keŋ kôyai e tòo dîa e dípaai, gáa kákili ŋá a gɛɛ dí kɛ̀ a sɔnyɔ̂ŋ-ƃela kɛ́tɛ é tɛ́ɛ Zerusâlɛŋ-ƃela kpeli-ŋai kélee dîa? 5Ŋá m̀ó kâa, Kpao; kɛ́lɛ, fɛ̂ɛ ka kálii pene, à wàla kɛ́ ti, kákelee káŋuŋ-la a pâi pilîi nɔ ti.”

Záŋ bîlaŋɔɔi fîi-wurii ma va ƃâi

6Nya ƃe e záŋ ŋi sɔ̀ɔ dîɛ, ǹyɛɛ, “Nalôŋ tɔnɔ ƃe ƃá-wuru (nyii da kɛ̂ ma fíi) sí ŋɔƃá-kpɔmɔ-kpalaŋ ŋá. Nya ƃe e lì naa a gɛɛ e m̀á kɔri ŋ̀á, kɛ́lɛ, ve da kaa ni ŋ̀á. 7Nya ƃe e mò zí-sɛŋ sí-nuui ma, ǹyɛɛi, ‘Gáa, góraŋ saaƃai ŋi ŋa pá ƃɛ ŋ́gɛ fíi-wurii ŋi m̀á kɔri ŋ̀á, kɛ́lɛ, ḿve tá da kaa ni ŋ̀á. Ye dée. Le ƃe kɛ̀ a pâi lɛɛ̂i naa gɛ́ ǹɔii fíi kpɛɛi?’ 8Nya ƃe e ŋ̀óo su tòo, ǹyɛɛi, ‘Ńâmu, ǹɛɛ naa góraŋ ŋí su. Ŋa pâi m̀aa sinîi, ŋá taa-sua-kpo pu mà. 9À kɛ̀ à ƃà góraŋ nyíti ma, ǹɛ́lɛɛ̂i. Kɛ́lɛ, à wàla kɛ́ tí, gɛ̀ ní ya pɔ̂ri deêi.’ ”

Zîsɛ è nɛnî kɔ́ɔ púɔɔ tɔnɔ ƃàlo a Vii-tɔɔ-ɣelei

10Naa kɛ́ɛ tíi, è kɛ̀ Ɣâla-woo lɛ̂i dîa Ŋ̀âla-fɛli-kerei dɔnɔ mu a Vii-tɔɔ-ɣelei. 11Nɛnî tɔnɔ ƃe kɛ̀ naa nyînaŋ nyɔ́mɔɔ e kɛ̀ bôlu nyii gɛ̀ é kɔ́lɛ a kóraŋ puu kao lɔ́ɔlu mɛi saaƃai. Kpîri-kpaŋ e kɛ̀ mà, va pɔ̂ri kɛ̀ gbîŋ su sã́âi. 12Tãi Zîsɛ è gàa lai, è dòli é m̀ó mà, ǹyɛɛi, “Nɛnîi, ya kula íkɔlɔ-felai su.” 13Nya ƃe e ǹyée pɛ̀lɛ mà. A nàa maa félaa è tɔɔ a zã́a, gɛ́ laa-maa-tɛ tɛ̀ɛ Ɣâla pɔ́. 14Kɛ́lɛ, Ŋ̀âla-fɛli-kerei mɛi-nuui líi e ŋwàna, kpɛ́ni fêi, Zîsɛ e m̀alo a Vii-tɔɔ-ɣelei. È mò ǹûai dîa, ǹyɛɛi, “Ɣele lɔ́ɔlu mɛi da káa naa nyii tíi a pɔ̂ri kɛ̂i zui. Ka pá a maa-ɣele-ŋai tí, ká ƃalo, kɛ́lɛ, káfe pà a Vii-tɔɔ-ɣelei.” 15Gɛ́ɛ tíi, Kúnuu-namui e zu tòo, ǹyɛɛi, “Kákiri-ƃelai! Kákelee káfe kániŋa-sîrɛ kpaa káwɛlɛ-sôoi fuloŋ ŋìri-wurii ma a Vii-tɔɔ-ɣelei, ká lí la yá la gbele-mɛni ma? 16Kɛ́lɛ, ve lɛ́lɛ ní a gɛɛ Eberaɣɛ̃ɛ ŋɔlóŋ-nɛnii nyii Sêtɔŋ e ŋìri a góraŋ puu kao lɔ́ɔlu mɛi saaƃai ŋí é kúla ŋiriɛɛi su a Vii-tɔɔ-ɣelei?” 17Gɛɛ a m̀ɛnii ŋí ƃôi, ŋɔkpɔara-ƃelai kélee ŋumɛ e díkɛ. Nya ƃe ǹûai kélee dí lii-nɛ̃ɛ kùla mɛni lɛ́lɛɛ-ŋai kélee mɛni ma e kɛ̀ gɛ̂i.

Záŋ bîlaŋɔɔi mɛsɛ-kaoi mai

(Maafîu 13:31, 32; Mâki 4:30-32)

18Maa-mɛni ƃe e mò, ǹyɛɛi, “Ɣâla ŋɔkâloŋ-laai káa yɛ̂ɛ le? Kpaa máŋ le ƃe ŋa pɔ̂ri gɔ́ɔnîi ma? 19Gáa nɔ yɛ̂ɛ mɛsɛ-kaoi nyii nalôŋ e zìɣe e bili ŋɔsuâi su; e pɔmûŋ é kɛ́ a wúru, ŋɔni-ŋai ŋelei sui dí dítaa tɔɔ ŋoŋo-ŋai su.”

Záŋ bîlaŋɔɔi gbólo-tɛ-sɛŋ ma

(Maafîu 13:33)

20Nya ƃe e ŋɔ́nɔ mò dîa, ǹyɛɛi, “Ŋa pɔ̂ri Ɣâla ŋɔkâloŋ-laai kɔ́ɔnii le ma? 21Gáa nɔ́ yɛ̂ɛ kpólo-tɛ-sɛŋ nyii nɛnî è ziɣe é bú mɔlɔŋ-fũa bɔki su, é lɛ́ɛ lá zu gélee é tɛ́i.”

Gbôŋ lá kuro-teɛ̂i

(Maafîu 7:13, 14, 21-23)

22Nya ƃe e lì a ŋɔperei gɛ tɛɛ̂i daa-ŋai su da gbanâŋ-ŋai lá, gɛ Ɣâla-woo lɛ gɛɛ kɛ̀ liî Zerusâlɛŋ. 23Nya ƃe núu da e mò ma, ǹyɛɛi, “Kúnuu-namui, diai da ƃáloi, díkaa nɔ a díkpulu-loŋ?” Nya ƃe e díwoo su tòo, 24ǹyɛɛi, “Ka kɔ́ a gbanaŋɔɔ ka lɔ gbôŋ kuro-têi-perei; kpɛ́ni fêi, ŋá m̀ó kâa, núu támaa da pâi kɔ̂i dí lɔ, kɛ́lɛ, pɔ̂ri fé pâi kɛ̂i dîɛ. 25Tãi bɛ́rɛi ǹâmu a mu siɣe la e gbôŋ lá tɛi, ka pâi kɛ̂i tɔɔ ni ŋinii ŋá, kakɛ gbôŋ tua, kakɛ mo kâai, ‘Kúnuu-namui, bɛ́rɛi lá ƃó kûɛ.’ Kɛ́lɛ, a pâi m̀ôi, ǹyɛɛi, ‘Fe ƃɛi kɔ́lɔŋ ka kulâi naai.’ 26Gɛ̀ ní, ka pâi kɛ̂i m̀ôi kâa, ‘Ku kúlaa mìi, ku kúkpele íŋɛi tuɛ, íkɛ Ɣâla-woo lɛ kútaai su-pere-ŋai ma.’ 27Kɛ́lɛ, a pâi m̀ôi, ǹyɛɛi, ‘Ŋá m̀ó kâa, fé ƃɛi kɔ́lɔŋ ka kulâi naai; ka kasu-kula mâ, káai kélee a sɔnyɔ̂ŋ-kɛ-ƃelai!’ 28Nàa ƃe, ka pâi wɔ́lɔ̂i naa, kakɛ kányiŋ ŋá mii, tãi ka Eberaɣɛ̃ɛ kàa la, da Aise, bɛlɛɛ Zeeka ma, da Ɣâla ŋɔlóno-kɛ-ƃelai kélee Ɣâla ŋɔkâloŋ-laai su, kɛ́lɛ, kákpîŋ piliɛɛ ŋinii ŋái. 29Da pâi kulâi voloi ƃelai-pere da niî-pere, dí kula séɣai da yá-ŋûa-pere, dí see teƃele ma Ɣâla ŋɔkâloŋ-laai su. 30Ka gáa, núu da-ni díkaa a gbɛɛ ŋá, kɛ́lɛ, da pâi kɛ̂i a duɛ-tuɛi. Da-ni díkaa a duɛ-tuɛi, kɛ́lɛ, dia ƃe pâi kɛ̂i a gbɛɛ ŋái.”

Dí Ɛɛlɔ kíli ŋá mɛni maa-lia-woo ƃò Zîsɛ ma

(Maafîu 23:37-39)

31Maa aƃai tí su, Faresii-ŋai da-ni dí pà bɔ́, dîyɛɛ ma, “Kula ƃɛ́ í lí a ísiai, kpɛ́ni fêi, Ɛɛlɔ a gbɛtɛ ǹíi su a gɛɛ é ípaa.” 32Nya ƃe è mò dîa, ǹyɛɛi, “Ka lí ká m̀ó gɛlɛ̂ŋ tí ma, ‘Gáa, ŋa nyînaŋ nyɔ́mɔɔ-ŋa kpɛ̂i, ŋ́gɛ gɔlɔ-fela-ŋai ƃàlo sâa da tínaa, kɛ́lɛ, ŋelei zaaƃai ƃe ŋa kpɛɛ̂i la. 33É máŋ kɛ́ ti, fɛ̂ɛ ŋa li a ŋásiai sâa da tínaa, bɛlɛɛ tua-tínaa ma; kpɛ́ni fêi, va pɔ̂ri kɛ̂i a sɛŋ a gɛɛ Ɣâla ŋɔlóno-kɛ-nuu ŋuŋ-la e píli Zerusâlɛŋ pôlu.’ 34Ee Zerusâlɛŋ, Zerusâlɛŋ, yái ƃa Ɣâla ŋɔlóno-kɛ-ƃelai pâa, íkɛ dísɔɔ a kɔni nyii-ŋai da dítɛɛ ípɔ naai! Tãi támaa ƃe ŋa kɛ̀ ŋ̀wɛ̂lii ŋa ínîa-pɛlɛɛi ŋá lɛ́ɣɛ a díkîe yɛ̂ɛ berei tɛ́ɛ-lee a ǹônii lɛ̀ɣɛ la goôŋ mu, kɛ́lɛ, ífe faa ni! 35Gáa, ípɛrɛi a nâa lɛɛ íyeêi a volo! Kɛ́lɛ, ŋá m̀ó yâ, ífe pâi ŋ́gaâi e lɛɛ la zu tãi e seri, íkɛ mo, ‘Lûwa káa ǹúui ma nyii pâi Kúnuu-namui láai sui!’ ”

Currently Selected:

Lûu 13: KWB

Highlight

Copy