Zôna 3
3
Ninivɛ-ƃelai dí dílii pène
1Nya ƃe Yâwɛɛ è mò Zôna mà a veerɛ-ɣelei ǹyɛɛi, 2“Ímu siɣe í lí Ninivɛ nyii gáa a daa-lêe kɛ́tɛi, í mɛnii ƃó nàa-ƃelai dîa ŋa pâi m̀ôi yâi.” 3Nya ƃe Zôna è mu sìɣe é lí Ninivɛ yɛ̂ɛ berei Yâwɛɛ è mò la mài. Ninivɛ è kɛ̀ a taa-lêe kɛ́tɛ nyii núu a kâa fólo saaƃa sìɣe é lɛ́ɛ m̀êlai. 4Zôna kɛ́ɛ a Ninivɛ siai kɔ́ɔ pîlaŋ a ɣele-kûu tɔnɔ siai, è pɛ̀lɛ doɔ́ɔ ma a lolo ǹyɛɛi, “A lɛɛ a fólo buu náaŋ a gɛɛ Ninivɛɛ su é kara.”
5Ǹyaŋ Ninivɛ-ƃelai dí làa a Ɣâla. Nya ƃe dí gbɛ̀tɛ a gɛɛ ǹûai kélee píli sûŋ su dí maloŋ tôo-maa sêɣe ɣiri dîa é ǹɛ́ a gɛɛ da dí pôlu tɔɔ dísɔnyɔ̂ŋ-ŋai dîa é síɣe ǹúu kpaya-kpayai dîa é tóo bɛlɛ-pɛlɛɛi dîa.
6M̀ɛnii ŋí duŋ è sèri Ninivɛ kaloŋ ma. Nya ƃe è mu sìɣe ŋɔkâloŋ see-sɛŋ ŋá é ŋɔkâloŋ yokpoi kúla mà é maloŋ tôo-maa sêɣe ɣiri ma é sée luu su nyii ǹɛ a gɛɛ a bôlu tɔɔ ŋɔsɔnyɔ̂ŋ ma. 7Gâloŋ da ŋɔnúu kpaya-kpayai dí dɛɛ a tɔ̂ŋ a gɛɛ dí doo a lolo dîyɛɛi, “Núu kpaa máŋ fɛnɛ-sɛ̂ŋ da kélee fé ǹáa mìi, kpaa máŋ é yá kpéle. 8Kɛ́lɛ fɛ̂ɛ nuu-kpune da fɛnɛ-sãa dí maloŋ tôo-maa sêɣe ɣiri dîa, dí wɔ́lɔ kpɔ́ a zu kɛ́tɛ Ɣâla ma. Tɔɔ núu kélee é bôlu tɔɔ ŋɔsɔnyɔ̂ŋ ma da ŋɔŋwana-lɔ̂ɔi. 9Gbɛ̂ɛ ƃé gɔ́lɔŋ a gɛɛ tãi da Ɣâla a pâi ǹíi maa fálenîi é kúkula ŋɔlii-ŋwâna kɛ́tɛi su a gɛɛ kúfe sàa?”
10Tãi Ɣâla è mɛnii kâa la ǹûai da gɛ̂i, berei dí dípôlu tɔ̀ɔ la dítûa-pere nyɔ̂ŋ-ŋai dîai, è ǹíi ma fâleŋ m̀ɛni nyɔ́mɔɔi mɛni ma è kɛ̀ pâi gɛ̂i a diai. Ve ŋɔ́nɔ mɛni nyɔ́mɔɔ kɛ́ ní a dia.
Currently Selected:
Zôna 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
