Zɛlemaya 51
51
Yâwɛɛ è Babeloŋ ŋɔmɛnii kpɔ̂luii da làa mà
1Yâwɛɛ è mò ǹyɛɛ, “Ŋa pâi fãa tɛɛ̂i nyíi pâi Babelɔŋ lɔii sú karâi da ǹaa-ƃela kéleei. 2Ŋa pâi ŋɔ́ya-ŋa tɛɛ̂i dí Babelɔŋ su kara yɛ̂ɛ berei da mɔlɔŋ-kala fɛ̀ɛ la lâa sui. Tãi Babelɔŋ lɔii su kara tãi a pâi serîi lai, ŋɔkpɔara-ƃelai da pâi kɔ́ pɛlɛ̂i m̀a ǹyée kélee mɛi dí ǹaa lɛɛ a bûŋ. 3Káfe ǹɛɛ naa dí kɔ́-kuluƃa-ŋai dí dítɔ̃a-ŋai píli a dɔnɔ kpîŋ, kpaa máŋ dí dí kɔ́ kɔseɣe-ŋai tóo dîa. Káfe dínyaŋ-kpa-ŋai su-mɛni lɛ̀ɛ a dɔnɔ kpîŋ. Ka dí kɔ-kuluƃa-ŋai kélee kpɔ́ páa. 4Diai ka pâi dípaâi, dípoma a pâi lɛɛ̂i naa. Diai ka pâi díŋwânai, da pâi saâi bere-lêei-ŋai dîa daa lêe-ŋai su. 5Ǹyãai ŋ́gaa a Ŋ̀wála-wâla-kélee Yâwɛɛi, ḿve niî ḿbôlu tɔ̀ɔ ní Eezuɛ da Zuda-ƃelai dîa, berei máŋ dí sɔnyɔ̂ŋ kɛ̀ là a ńyãa dí lɔii gwaa kéleei. Ŋ́gaa a Eezuɛ Ŋɔɣâla Maa Waai. 6Ka pú kákula Babelɔŋ lɔii su. Ka pú ká káŋuŋ ma ƃó. Káfe lɛ̀ɛ naa káfa lâ saa lâ Babelɔŋ sɔŋ sú. Ŋa nâa ŋ́gbîŋ kpɛtɛ a gɛɛ ŋá ŋɔmɛni nyɔ́mɔɔi gbà kula. Ŋa gula-maa kɛ̂i yɛ̂ɛ bereii ŋɔmɛni nyɔ́mɔɔi káa lai. 7Babelɔŋ è wɔ́lɔ kɛ̀ ńyee-ŋa yɛ̂ɛ gôo-kpele kɔpu. È gɛ̀ ǹûai kélee dí ŋɔŋwãai kpéle. Ǹyaŋ ŋwãai kpîŋ a ǹɔii-ŋuŋ-ŋai kélee kɛ́ díŋuŋ-su a kɛ́ dùãa, dífe ŋɔ́nɔ díkili-pere pɔ́. 8Babelɔŋ a toôi a maa félaa. Zu a karâi. Ka wɔ́lɔ m̀aa mɛ̂ni ma. Ka sále kɔ́ri m̀aa mɛ̂ni ma. Tãi da a pâi ƃalôi. 9Ŋ̀ɔ̃ya-ŋai díkaa naai dîyɛɛi, ‘Kúkɔ̀ a gɛɛ kú kpɔŋ mâ tɛɛ Babelɔŋ pɔ́, kɛ́lɛ pere fé kɛ́ ní naa. Gɛ̀ ní kwaa pere kɔ̂rii a gɛɛ kwaa pú kúli kú-pɔ taai. Ɣâla a Babelɔŋ kùla ma kɛ́ a ŋɔwála-wala-laai kélee. Ǹyaŋ a Babelɔŋ su kara kpɔ́ kpúŋ’ ”
10Yâwɛɛ è mò ǹyɛɛ, “Ŋánûai dí làɣi dîyɛɛi, ‘Yâwɛɛ a kúmɛnii gbà kula. Kwaa lí kú m̀ó kúnûai dîa Zerusâlɛŋ m̀ɛnii nyíi Kúɣalai Yâwɛɛ a gɛ̂i.’ ”
11Yâwɛɛ è Midia kaloŋ-ŋai líi mù sìɣe kpɛ́ni fêi, a ŋ̀wɛ̂li é Babelɔŋ lɔii su-kara. Berei ŋí ƃé a pâi kpa kulâi la dîa Ŋɔɣâla-pɛrɛ Kɛ́tɛi wólo mɛ̂ni ma.
Gɔ-kuluƃa-ŋai mɛi ǹúui è mò ǹyɛɛ, “Ka kásɔa-ŋai síɣe a gɛɛ ŋ̀á lí. Ka kásɔla ŋáɣale kɔli-kalaŋ-ŋai kpɛtɛ. 12Ŋɛi-kɛ-maa kɛ́ a gɛɛ ǹûai dí kɔ́ pɛ́lɛ Babelɔŋ ma. Gɔ-kuluƃa-ŋai kíli kúla. Ziɣãŋ mɛi káa ƃelai tɛ́ɛ dítii-kɛɛi su. Nûa tɛ̀ɛ a gɛɛ dí gbã́ tée.”
M̀ɛnii Yâwɛɛ è mò a gɛɛ a pâi a Babelɔŋ-ƃelai, aâ gbâa nâa gɛ́. 13Ya-lee támaa káa ǹɔii ŋí su da tɔɔ-sãa támaa, kɛ́lɛ ŋɔkɛ ŋ̀éniɛi su aâ tée. 14Ŋ̀wála-wâla kélee Yâwɛɛ aâ vóo a gbîŋ a gɛɛ a pâi pâi a kɔ-kuluƃa támaa a gɛɛ dí kɔ́ pɛlɛ Babelɔŋ m̀a yɛ̂ɛ góto-kpulu kɛ́tɛ. Ǹyaŋ da pâi lâɣii a zu-kɛtɛ ǹyée-mɛi ɣále mɛ̂ni ma.
Laa-maa tɛ̂ wule toɔ́ɔ Ɣâla ma
15Yâwɛɛ è ǹɔii kpɛ̂tɛ a ŋɔwála-wala-laai,
ŋɔtárei ƃé è ŋ̀éniɛi kpɛtɛ la,
é ŋ̀ele-kɔlɔŋ fúlomo.
16A gɛ̀ ǹyái nyíi gáa ŋ̀ele-kɔlɔŋ mu-perei kɛ́ kɛ̀ zìkɛ-zikɛ gɛ́ tôo.
A gɛ́ ŋ̀ele-kɔlɔŋ kolei a kûla ǹɔii kpera-ŋa.
A gɛ̀ ŋ̀ele-gbâna kɛ́ kɛ̀ mãla-mãla duna-yai mu,
é vãai kúla ǹâai kɛ̂i.
17À kɛ̀ ya núu-kpune kɔ̀ɔŋ Ɣâla ma, núu káa nɔ́ kpɛ́ni-kpɛni.
Diai da Ɣâla da kpɛ́ni-ŋa kpɛ̀tɛi, dí líi a tôo pôlu,
kpɛ́ni fêi, ŋ̀âla-ŋai da díkpɛtɛi, dífe a tɔ̃yâ ɣala-ŋa, fúlu-laa fé díyêei.
18Dífe sɛŋ-su, m̀ɛni ma, núu da fa ǹyée sèe dímu.
Ǹûai da pâi dísu karâi a tãi Yâwɛɛ a pâ la a gɛɛ é dí mɛnii ŋá teei.
19Zeeka Ŋɔɣâlai fé ƃóloŋ ní dîa.
Nya ƃe sɛŋ kélee kpɛ̀tɛ,
ǹyaŋ è Eezuɛ sìɣe zu a gbîŋ ŋɔnûa.
Ǹáa ƃa Ŋ̀wála-wâla kélee Yâwɛɛ.
Yâwɛɛ ŋɔkpɔ́-kpɔi
20Yâwɛɛ è mò ǹyɛɛ,
“Babelɔŋ, yá ƃa ŋákpɔ-kpɔi nyíi gáa a ŋá kɔ́ kɔ́ kɔli-sɛŋ.
Ŋá ísìɣe ŋ́gɛ lɔii-ŋuŋ ŋa da kâloŋ-laa ŋa wòlo a yá,
21ŋ́gɛ soo-ŋa da dí-sia-ƃela tàa-taa a yá,
ŋ́gɛ kɔ́kɔ-keleŋ ŋa da dísia-ƃela tàa-taa a yá,
22ŋ́gɛ nɛ̃yâa da sinâa pàa,
ŋ́gɛ núu-pɔlɔ-ŋa da nyáŋkpa-ŋa pàa,
ŋ́gɛ sinâa-nɛ̃yɛa da nɛ̃yâa-nɛ̃ya pàa,
23ŋ́gɛ ƃála mɛi-kaa-ƃela da díƃala-ŋai pâa,
ŋ́gɛ kpâlaŋ ŋá tii-kɛ-ƃela da díkpâlaŋ-ŋátíi kɛ́ sôo-ŋai pàa,
ŋ́gɛ núu láa-tuɛ ƃela da tíi kɛ́-ƃela kpaya-kpaya ŋa pàa.”
Babelɔŋ kula maa kɛ́ mɛni
24Yâwɛɛ è mò ǹyɛɛ, “Ka pâi ŋ́gâai mɛni kpa kùla Babelɔŋ ma m̀ɛnii kélee è gɛ̀ a Zerusâlɛŋ mɛ̂ni ma. 25Babelɔŋ, íkaa yɛ̂ɛ ǹyee kɛ́tɛi nyíi a ŋ̀éniɛi gwaa kélee su karai, kɛ́lɛ, íkaa nâa a Ńyãa Yâwɛɛ ŋ́gbɔara-nuu. Ŋa pâi ísonîi ŋá ítoo kpɔ́ ǹɔii mâ, ŋá ílɛɛ lâani luu su. 26Núu da kpîŋ fé pâi íkpôloŋ-ŋa kɔnii da siɣêi é pɛ́rɛ tɔ́ɔ la. Ya pâi kɛ̂i yɛ̂ɛ fɛ̃ɛ kpâlaŋ wɔ́lɔ-wɔlɔ da wɔlɔ-wɔlɔ. Ńyãa Yâwɛɛ ƃé mò tí.
27“Ŋɛi-kɛ-maa kɛ́ a gɛɛ gɔ́i é tée. Gɔ́kɔ turii fɛ́ɛ a gɛɛ ǹɔii-ŋuŋ-ŋai kélee dí ŋ̀óo mɛ́ni. Ǹɔii-ŋuŋ-ŋai kpɛtɛ a gɛɛ dí kɔ́ pɛ́lɛ Babelɔŋ ma. M̀ó gâloŋ-ŋai kúla Alalai, Minii, da Asikena dí gɔ́i tée. Gɔ-kûluƃa-ŋai mɛi-nuu lɛ́ a gɛɛ dítɔɔ gɔ́i láa-tuɛ. Pá a zoo-ŋai nyíi-ŋai dítamaai yɛɛ gotó-kpulu kɛ́tɛi. 28Ǹɔii-ŋuŋ-ŋai kpɛtɛ a gɛɛ díkɔ pɛ́lɛ Babelɔŋ ma. Midia kaloŋ-ŋai da ǹúu láa-tuɛ ƃelai da díi kɛ́-ƃela kpaya-kpayai tóli da gɔ-kuluƃa-ŋai díkaa díyee-mu ǹɔii-ŋuŋ-ŋai sui. 29Ǹɔii è kpɛ̃liŋ kpɛ́ni fêi, Yâwɛɛ a ŋɔmɛni kpɛtɛɛ ŋa-see kɛ̂i a gɛɛ é Babelɔŋ kɛ́ yɛ̂ɛ fɛ̃ɛ-kpâlaŋ su ƃɛ́i fúlu-sɛŋ da fa pɔ̂ri kɛ̂i naai. 30Babelɔŋ kɔ-kuluƃa-ŋai dâa kpera kɔ̂i. Da lɛɛ dí kɔ́ siɣãŋ su. Díwala-wala-laai su aâ saa da kɛ́ nɔ́ yɛ̂ɛ nɛyâa. Da ziɣãŋ wólo dítaa-leei ma da bɛ́rɛ-ŋai kéreŋ. 31Kéla-ŋa díkaa kîrɛ siɣêi díkîe-ni pôlu dí kɛ̀ lì dí kɛ́ mò Babelɔŋ kaloŋ ma a gɛɛ nûa dâa daa-lêei síɣe m̀éla kélee ma. 32Gɔ-kuluƃa-ŋai da ǹyái tíyenîi sòŋ da díkili tɔɔ-maa kwaai ma kéreŋ. Babelɔŋ kɔ-kuluƃa-ŋai da yao kpɔ́ a ŋ̀ánaa. 33Ǹaa fé pâi tûai díkpɔara-ƃelai dí kɛ́ díyee mɛi ɣâle, dí kɛ́ ƃɔ̀rɔŋ dîa yɛ̂ɛ núu a kɛ̀ ƃɔ́rɔnîi mii-sɛŋ-táŋ gàra ma. Ńyãai ŋ́gaa a Ŋ̀wála-wâla kélee Yâwɛɛ nyíi gáa a Eezuɛ Ŋɔɣâlai, Ńyãa ƃé mò tí.”
34Babelɔŋ kaloŋ è Zerusâlɛŋ su-tee,
é m̀ii,
È daa lêei su ƃò yɛ̂ɛ zimi-zɔŋ,
é gbele yɛɛ sɛŋ sîrɛ.
Zãâi nyíi è kɛ̀ ŋ̀wɛ̂lii, è zìɣe,
é gbéli píli kwaa kôyaa ma.
35Tɔɔ Zãiyɔŋ-ƃela dí mó dîyɛɛi,
“Tɔɔ m̀ɛni nyɔ́mɔ-ŋai Babelɔŋ è wɔ́lɔ gɛ̀ a kúai,
é kɛ́ a m̀aa mɛ̂ni.”
Tɔɔ Zerusâlɛŋ-ƃela dí mó dîyɛɛi,
“Tɔɔ mɔ̃lɛ-laa kú tɛ̀ɛ zui, gélee é kɛ́ a Babelɔŋ maa mɛ̂ni.”
Yâwɛɛ a pâi kpɔnîi Eezuɛ m̀a
36Nya ƃe Yâwɛɛ è mò Zerusâlɛŋ ƃelai dîa ǹyɛɛi, “Ŋa pâi tɔɔ̂i kámaa mɛ̂ni ma, ŋá kákpɔara-ƃelai kɛ́, m̀ɛnii dí gɛ̀ a káai, fela-fei kɛ. Ŋa pâi Babelɔŋ ƃelai díya-leei ŋuŋ-kulâi kpâlai, ŋa díya-lêe-ŋai kpála. 37Dílɔii a pâi lɛɛ̂i a pilêŋ ŋá ƃɛ́i fɛnɛ-sãa da pâi dí kɛ̀-ɣeniɛi kɛ̂i naai. Ǹaa a pâi kɛ̂i a kwaa mâ mĩli-miliɛɛ. Núu da fé pâi seêi naa. Ǹyaŋ, diai kélee pâi ǹaa kâai, da pâi yaôi. 38Babelɔŋ-ƃelai da pâi kpêɣei yɛ̂ɛ yala-sulu, dí kɔ̃ɔŋ su-woo kɛ́ tɛ̀ yɛ̂ɛ yala-sulu lònii. 39Puru káa dí kɛ̂i? Gɛ̀ ní ŋa pâi kúu kɛ̂i dîa, ŋá gɛ́ dílɔɔ kpéle dí lii-nɛɛ kula. Tãi da pâi liî la a gɛɛ dí nyíi, dífe pâi díŋɛi láa ƃôi. 40Ŋa pâi liî a dia dípaa-ƃela pɔ́ yɛ̂ɛ ƃála lônii, ƃoli-ŋa da ƃála sîrɛ ŋa. Ńyãa Yâwɛɛ ƃé mò tí.”
Babelɔŋ ŋɔmɛni ŋá téɛɛi
41M̀ɛnii Yâwɛɛ è mò é pîlaŋ Babelɔŋ mai ƃa, “Daa-lêei nyíi ŋ̀éniɛi kélee a kâa ǹáa maa tɛ̂i, da ǹaa soŋ. Babelɔŋ a nâa kɛ́ a yao mâ kwaa ma ǹɔii-ŋuŋ-ŋai sáma. 42Yúo a túmo-tûmo a Babelɔŋ mɛi pɛ́lɛ, a tôo a díŋ kɛ́tɛ. 43Daa-ŋai da nâa kɛ́ a yao mâ kwaa ma. Da nâa kɛ́ yɛ̂ɛ fɛ̃ɛ-kpâlaŋ nyíi yá fé zui, ƃɛ́i núu seêi fé naa, kpaa máŋ é sía naai. 44Ŋa pâi Babelɔŋ ɣalai Bêe kula-maa kɛ̂i. Ŋa pâi zãâi è zìɣei kélee kpɔ́ kulâi ǹyêei. Ǹyaŋ, lɔii-ŋuŋ da fé ŋɔ́nɔ pâi vɛlîi.
“Babelɔŋ ŋɔsiɣãŋ a wólo. 45Eezuɛ-ƃela, ka pú kákula naa. Ka pú kákula ŋá lii ŋwâna kɛ́tɛi perêi. 46Káfe yào, kálii é tóo pôlu duŋ-ŋai ka m̀ɛnii mɛ̂ni ma. Kóraŋ kélee, ka tuŋ da kpɛ́ni ŋa tàa-taa, ka tuŋ da kpɛ́ni-ŋa mɛni é pîlaŋ la berei mâ lɔii-ŋuŋ ŋa su kâloŋ-ŋa díkaa kɔ̂i la díkîe-ni pɔi. 47M̀ɛni ma, tãi káa pâi tãi ŋa pâi kɔ̂i la Babelɔŋ ŋɔɣâla-ŋai pɔ. Ŋa pâi ǹɔii ŋumɛi, ŋá zu-ƃela kélee páa. 48Zãâi nyíi-ŋai díkaa ǹɔii mâ, kpaa máŋ ŋ̀elei-sui, da pâi lii-nɛ̃̂ɛ kulâi a zu-kɛ́tɛ tãi da pâi m̀ɛnîi la a gɛɛ Babelɔŋ a too, a gɛɛ ǹûai kúla yá-ŋûa perei da zu-karai. 49Babelɔŋ è gɛ̀ núu támaa é sáa ŋ̀éniɛi gwaa kélee ma. M̀ɛni ma, Babelɔŋ a pâi toôi kpɛ́ni fêi, è gɛ̀ Eezuɛ-ƃela támaa dísaa. Ńyãa Yâwɛɛ ƃé mò tí.”
Ɣâla è worɛ̂ tɛɛ Eezuɛ-ƃelai pɔ́naa kɛ̀ Babelɔŋ
50Yâwɛɛ è lòno ŋɔnûai pɔ́ kɛ́ Babelɔŋ ǹyɛɛi, “Káai kélee kùla gɔ́i yêei ká lɛ́ɛ a káfului, kà lí loníi ma. Káfe maa kpɛ̂ŋ kɛ̀. Berei máŋ ká kɛ̂i kôyaai la kápɔ-taai mai, ka kákili-ŋa sía é pîlaŋ ḿâ, Ńyãa Yâwɛɛ, Zerusâlɛŋ kíli é tóo ká ŋá. 51Ká mò kâa, ‘Da ƃâa kula kûa, kwa ŋumɛ. Wála-wala-laa kélee kpɔ́ da fé kúyêei, kpɛ́ni fêi, ŋɔ̃ya-ŋa da kúkwaa maa waa-ŋai ma kula kúyêei Ŋ̀âla-pɛrɛ Kɛ́tɛi mu.’ 52M̀ɛni ma tãi káa pâi a gɛɛ ŋá Babelɔŋ ŋɔɣâla-ŋai kula maa kɛ́. Ǹyaŋ diai kélee ŋa pâi díŋwânai, da pâi kɛ̂i wɔ̂lɔi ǹɔii gwaa kélee ma. 53À nɛ̃ɛ ma Babelɔŋ é tɛ́ ŋ̀elei su é ŋɔkɔ́kɔ siɣãŋ tɔ́ɔ naa, ŋa pâi nûa tɛɛ̂i naa dí ǹaa wólo. Ńyãa Yâwɛɛ ƃé mò tí.”
Babelɔŋ su-kara mɛ̂ni da kpɛ́ni
54Yâwɛɛ è mò ǹyɛɛ,
“Ka káwoli tɔ́ɔ a Babelɔŋ wɔ́lɔ-woo,
a malôŋ see ƃôi ǹɔii su-kara mɛ̂ni ma.
55Ŋa Babelɔŋ su karâi ŋá gɛ́ é m̀ɛi sáa.
Gɔ-kuluƃa-ŋai dí pìli naa yɛ̂ɛ yà ŋɔzìkɛ-zikɛ tíŋ,
dí pɛ́lɛ ǹaa mà a dílaɣi-woo su-kɛtɛ.
56Dí pà a gɛɛ dí Babelɔŋ su-kara.
Da ŋɔkɔ-kuluƃa-ŋai sóŋ,
da díkerâŋ-ŋai su ɣále.
Ŋ́gaa a Ɣâla nyii a mɛni nyɔ́mɔ kula maa kɛ̂,
ǹyaŋ ŋa pâi Babelɔŋ kula-maa kɛ̂i yɛ̂ɛ berei è tùa lai.
57Ŋa pâi gɛ̂i ǹáa-tuɛ-ƃelai dílɔɔ kpéle, é dí kɛ́,
da ŋɔtáre-ƃelai, ŋɔnúu-mɛi-ƃelai, é pɛlɛ ŋɔkɔ-kuluƃa-ŋai da dí láa túɛ-ƃelai dîa.
Da pâi lâai dí nyíi, kɛ́lɛ dífe pâi díŋɛi-la ƃôi.
M̀ɛnii ŋí ƃé Ńyãai a Gâloŋ ŋá m̀o, Ńyãai a Ŋ̀wála-wâla kélee Yâwɛɛi.
58Babelɔŋ nyíi ŋ̀wála-walaai, ŋɔsiɣãŋ a pâi wôloi é tóo ǹɔii ma.
Ŋɔsiɣãŋ la-ƃerei kpòŋ a pâi kêrenîi kpɔ́ kpúŋ,
Ǹɔii-ŋuŋ-ŋai dítii kélee káa kpɛ́ni-kpɛni.
Ŋɔŋ a dítii-ŋai kélee kpɔ́ su-kara.
Ńyãa Ŋ̀wála-wâla kélee Yâwɛɛ ƃé mò tí.”
Zɛlemaya è worɛ̂ tɛ̀ɛ Babelɔŋ
59Seraiya ƃé kɛ̀ a Gâloŋ Zɛdikaya ŋɔtíi-kɛ-nuui nyíi a kâa tíi kɛ̀ Zɛdikaya kpono mâi. Seraiya è kɛ̀ a Neria ǹóŋ. Neria ǹyaŋ kɛ́ ƃò a Masea ǹóŋ. Zɛdikaya kɛ́ɛ gâloŋ-laai su Zuda mɛi ŋɔkóraŋ ǹáaŋ su, Seraiya da Zɛdikaya dí kɛ̀ liî Babelɔŋ. Nya ƃe ŋá kili-ŋa pôno da-ni tɛ̀ɛ bɔ́. 60Ŋá kɔlɔ pɔ̃yɛɛ ŋá m̀ɛni-ŋai kélee ƃó é pîlaŋ m̀ɛni-ŋai pâi kɛ̂i a Babelɔŋ dîa, da m̀ɛni da kpɛ́ni-ŋai pâi kɛ̂i lai. 61Ŋá mò Seraiya ma ńyɛ̃ɛ, “Tãi ya sèri la Babelɔŋ, é kɛ́ kpɔ́ a íma kpâ í gɔlɔi-ŋí lóno ǹûai dîɛ a zu ponoɔɔ. Ífe ŋ̀óo da lɛ̀ɛ pôlu. 62À kɛ̀ tí, Ɣâla fɛli yɛ̂ɛ, ‘Yâwɛɛ, í mò yɛ̂ɛ ya pâi gwaai ŋí ma su karâi a gɛɛ fúlu-sɛŋ da fé lɛ̀ɛ naa, é máŋ kɛ́ yɛ̂ɛ núu-kpune, kpaa máŋ fɛnɛ-sɛŋ. Í mò a gɛɛ ǹaa a pâi kɛ̂i a fɛ̃ɛ-kpâlaŋ su wɔ́lɔ-wɔlɔ da wɔlɔ-wɔlɔ.’ 63Tãi ya kpɛ̂ɛ la a gɔlɔ-ŋí lónoɔɔ, ǹûai dîɛi, kɔni kpulɔ̂ŋ m̀a í doo Yufeletii Ya-leei su. 64Mó yɛ̂ɛ, ‘M̀ɛnii ŋí ƃé pâi kɛ̂i a Babelɔŋ. A pâi yenîi ǹyái káo ma. Ǹyaŋ vé ŋɔ́nɔ pâi tɛ̂i pôlu. Kpɛ́ni fêi Yâwɛɛ a pâi zu karâi.’ ”
M̀ɛnii Zɛlemaya è mòi gbɛɛ-ŋái ká ŋí.
Currently Selected:
Zɛlemaya 51: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia