Azaya 8
8
Azaya ǹóŋ maa sɔlɔ ƃó mɛni káa a ŋɛi kɛ́-maa ǹûai mɛ̂ni ma
1Nya ƃe Yâwɛɛ è mò ḿâ ǹyɛɛi, “Kɔlɔ-pɔ̃yɛ kpôŋ tɔnɔ siɣe í ǹáai ŋí pɔ̃yɛ ma kpɔ́ a gbaya-gbaya: Makɛ-sala-siba.”#8:1 Makɛ-sala-siba laai ŋí su kulâi ƃa, “Too-mâa kɛ́-nuu maa félaa, sɛŋ siɣe-nûu maa félaa.” 2Nya ƃe ŋá táre-ƃela feerɛ marê kɛ̀ a gɛɛ díkɛ a ŋaserê-ŋa. Dáre-ƃela feerɛi ŋí ƃé kɛ̀ a Ɣâla ŋɔlóno kɛ́-nuui zâla láa soŋ-nûui Yuraya da Zɛberekaai ǹóŋ Zɛkɛraya.
3Nyíŋi pôlu ma, ŋánɛnîi è koo sîɣe é lóŋ-surɔ̂ŋ maa sɔlɔ ƃó. Nya ƃe Yâwɛɛ è mò ḿâ ǹyɛɛi, “Ǹáa sée a Makɛ-sala-siba. 4Ǹôloŋ ŋí é lɛ́ɛ pâi pɔrîi ǹee láa tôlii a ‘Yaai,’ kpaa máŋ é ǹâŋ láa tóli a ‘Datá,’ zãâi Asiria kaloŋ è gùla yêei kɛ̀ Dɛmɛika da Sameria kɔi sui, da pâi gélee kulâi ǹyêei.”
Asiria kaloŋ a pâi
5Yâwɛɛ è ŋɔ́nɔ lòno ḿbɔ ǹyɛɛi, 6“Zuda-ƃelai ŋí da díyee kúla ḿû ńyãai ŋ́gaa yɛ̂ɛ Siloa ya-ɣɛli-ŋai nyii-ŋai da ɣîliŋ a gɔlɔ saa mai. Da gbɛtɛ̂i a gɛɛ dí pá Gâloŋ Lesiŋ da Gâloŋ Peka pɔ́ naa kpɔŋ mâa mɛni ma. 7M̀ɛni ma, ńyãai a Ǹuu-namui, ŋa pâi dílɔ̂i Asiria kaloŋ yêei. A pâi pâi a ŋɔkɔ́ kuluƃa-ŋai. Da pâi tínanîi dîa yɛ̂ɛ Yufeletii Ya-leei a nûa maa tînaŋ. 8Ǹya fɛ̂ɛi a pâi tɛ̂i é kóyɛŋ núu kâraŋ ma, é tɛ́ɛ Zuda é ǹaa sãai kélee mɛi pɛ́lɛ.”
Ɣâla káa kúkɔlɛ. A ǹɔii maa kɔ̃̂ɔ yɛ̂ɛ ƃerei tɛ́ɛ kɔ̃ɔ-lee a ǹônii maa kɔ̃̂ɔ la a ŋɔwála-wâlai.
9Ǹɔii-ŋuŋ-ŋai su-ƃela, ka pú kákîe ma ká tɔ́ɔ a gbanaŋɔɔ. Ka káwoli tɔ́ɔ káai ǹɔii-ŋuŋ kôya-koyaa-ŋai sui. Ka kákpîŋ kpɛtɛ kɔ́ kɔ mɛni ma. Kɛ́lɛ yao é kɛ́ kákponôi. Tɔ̃yâ ma yao é kɛ́ kákponôi. 10Ka mɛni kpɛtɛɛ-ŋa kɛ́ kɛ́lɛ díŋaa-see fé pâi kɛ̂i. Ka m̀ɛni-ŋai ƃó díkaa kálii sui, kɛ́lɛ gélee a pâi kɛ̂i nɔ́ kpɛ́ni-kpɛni, kpɛ́ni fêi, Ɣâla káa kúkɔlɛ.
Yâwɛɛ è Ɣâla Azaya lia-wôo ƃò
11Yâwɛɛ è ńia-wôo ƃò a gbanaŋɔɔ a gɛɛ fé ńyee pìli ǹûai tûa-perei da su. È mò ḿâ ǹyɛɛi, 12“Ífe íyee pìli ǹûai dí kíri mɛni kpɛtɛɛi da su. Ífe fúlɔi máŋ yào m̀ɛni-ŋai dîa da yâo dîai. 13Kɛ́lɛ ńyãai a Ŋ̀wála-wâla kélee Yâwɛɛi, ḿaa waâi, ńyãa ƃé í yao ḿâ, ḿaa mɛ̂ni ǹyao kɛ́ ƃò íkɔlɔ̂i. 14Ŋámaa wâa-laai su kɛ̂tɛi. Ŋ́gaa yɛ̂ɛ kɔni nyíi nûa da kâreŋ la díkɛ tooi. Ŋ́gaa yɛ̂ɛ ƃáre Zuda da Zerusâlɛŋ-ƃelai mɛ̂ni ma. 15Ǹyaŋ núu támaa da pâi karênii a gɔnii ŋí dísu é kara. Núu támaa da pâi kɔ̂i a m̀árei ŋí.”
Núu lónoɔ zaa-ƃelai pɔ́ maa lia-woo
16Káai a ḿbôlu-ƃelai, fɛ̂ɛ ká ŋ̀orɛ̂-woo-ŋai lâai kɛ́ ká m̀ɛi káa nyii-ŋai Ɣâla è dɛ̀ɛ ḿbɔi. 17Yâwɛɛ a gbîŋ loo ŋɔnûai dîa, kɛ́lɛ ŋá kili tɔɔ-maai a pâi kɛ̂i nɔ́ m̀a.
18Kwa ǹîa pɛlɛɛi nyii-ŋai Yâwɛɛ a dítɛɛ ḿbɔi, kúkaa a ŋɛi kɛ́-maa Eezuɛ-ƃelai sáma Ŋ̀wála-wâla kélee Yâwɛɛi mɛ̂ni ma nyii ŋɔkɛ-naai káa Zãiyɔŋ Yeei mai.
19Nûa da pâi m̀ôi yâ a gɛɛ í lí tɛli kpɛ́-ƃela da m̀ɔ̂leŋ tɛli kpɛ́-ƃelai pɔ́ nyii-ŋai da lôno ninîŋ-woo su da ɣelêi-perei. Da pâi môi dîyɛɛi, “Berei máŋ gáa tí lai, nûa da pɔ̂ri mɔ̂leŋ-ŋa marê kɛ̂i worɛ̂-woo mɛni ma, dí zaa-ƃelai marê kɛ́ vúlu-ƃela mɛni ma.”
20Kɛ́lɛ díwoo su-too yɛ̂ɛi, “Ka káwoli tɔ́ɔ m̀ɛnii ma Yâwɛɛ a ǹɛ̂i kâai. M̀ɛni-ŋai m̀ɔlêŋ-ŋai da zaa-ƃelai da mò kâai, dífa kákùla mɛnîi.”
Mɛni kpɔ̂lu tãi
21Da pâi siâi-siai ǹɔii gwaa kélee. Da pâi kɛ̂i siâi puru kɛ́ dípaa, dílii toɔɔ pôlu. Puru a kɛ̀ dípaâi, da pâi dílii ŋwânai díkɛ wóo nyɔ́mɔɔ-ŋa ƃò díkâloŋ da Díɣâlai ma. Díŋɛi a pâi kɛ̂i ŋ̀elei su pere. 22Da pâi díŋɛi pîlanii ǹɔii ma. Dífe pâi sɛŋ da kpɛ́ni kâai naa fɛ̂ɛ nɔ́ mɛni kpɔ̂lu, lii too pôlu, da kpíni su pîlaŋɔɔ nyii díkaa liî zu a diai.
Currently Selected:
Azaya 8: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
