Azaya 5
5
Ŋ̀ulei bîlaŋɔɔi gbɔmɔ kpâlaŋ mai
1Tɔɔ ŋá wule tóo ŋáwɛli kɛ́-maa nuui ma.
Ŋáwɛli kɛ́-maa wulei pîlaŋɔɔi ŋɔkpɔmɔ kpâlaŋ ma.
Ŋáwɛli kɛ́-maa nuui ŋɔkpɔmɔ kpâlaŋ è kɛ̀
lɔii lɛ́lɛɛ ma yée pɛ́rɛ ma.
2Ŋáwɛli kɛ́-maa nuui è gwaai ma sìŋ,
é gɔni-ŋai kélee kúla naa.
È kpɔmɔ kpâa lɛ́lɛɛ-ŋa sì naa.
È yeŋkêŋ tɔ̀ɔ gbâlaŋ sâmai.
È lóa tèe ƃɛ́i a pâi kɛ̂i gbɔmɔ-ƃai táŋ-nîi naai.
È maa kpɛ̂ŋ kɛ̀ a gɛɛ gbɔmɔ-ƃai kpɔlu tãi é seri,
kɛ́lɛ gbɔmɔ-ƃai kélee è kɛ̀ a gbona-kpônaa.
3Nya ƃe ḿbarâŋ-nuui è mò ǹyɛɛi, “Káai a Zerusâlɛŋ da Zuda-ƃelai, ka káwoli tɔ́ɔ ḿâ. Ka kɛ́ a kúloai mɛni ŋá-tee ƃela kwa ŋákpɔmɔ kpalaŋ kúloai. 4Lé tii kpîŋ ƃé gbɔmɔ kpâlaŋ ŋí ŋá ḿve niî gɛ́ níi? Kɛ́lɛ tãi ŋa lì la naai, ḿve ƃa lɛ́lɛɛ káa ní. Nyii ŋá gàa naai, è kɛ̀ a kpona-kpônaa ńyii ŋ́ili fé kɛ ni m̀ai.
5“Ŋa pá nɛɛ̂i naa ká m̀ɛnii kɔ́lɔŋ ŋa pâi gɛ̂i a ŋá kpɔmɔ kpâlaŋ. Gbakii dínaŋɔ̂ɔi m̀ai, ŋa pâi ŋ̀ôlo-wôloi. Fɛnɛ-sãa da pâi kɛ̂i dílaa miî naa díkɛ ǹaa tàŋ-taŋ. 6Ŋa pâi ǹɛɛ̂i naa galai yée é tɛ́ɛ m̀a. Ḿve pâi ǹaa kpɛtɛ̂i, kpaa máŋ ŋá galai fála naa. Ǹaa a pâi kɛ̂i nɔ́ a m̀ɛi-pɛlɛɛ a tânaŋ da ŋalêŋ kpɔlɔ. Ŋa pâi m̀ôi ŋ̀elei su ma a gɛɛ vé ŋɔ́nɔ nɛ̀ɛ naa tuna é pú naa.”
7Gbɔmɔ kpâlaŋ ŋí káa a Ŋ̀wála-wâla kélee Yâwɛɛ pɔ́ɔ.
Eezuɛ-ƃelai ƃa gbɔmɔ kpâlaŋ è zìi.
Zuda-ƃelai ƃa ǹaa si-sãa lɛ́lɛɛ-ŋai.
A ŋ̀wɛ̂li nûa díkɛ teniŋ-ƃô mɛni-ŋa kɛ̀,
kɛ́lɛ díkaa nɔ́ núu paâi.
A ŋ̀wɛ̂lii díkɛ tɔ̃yâ mɛni kɛ̀,
kɛ́lɛ maloŋ too-maa wɔlɔ-woo nɔ́ ƃé a mɛni lá da díluanîi.
Azaya è lòno é pîlaŋ wôya mɛni kɛ́ɛ ma
8Kpalo-ƃêlaai diai dîa da kɛ̂ pɛrɛ-ŋa tɔ̂ɔi gîe kɔlɛ, díkɛ lɔii kpîniŋ támaa maa sôŋ kwaa-ŋa ma díkɛ ǹya díkɛ bù dípɛrɛ-ŋai da dílɔii-ŋai dîa, dífa ǹɛɛ naa núu da kpɛ́ni-ŋa dí da sɔlɔ ƃôi. Da ŋ̀wɛli nɔ́ dí tèe-tee díkɛ ƃò seêni ǹɔɔi pûŋ sâmai dí tèe-tee. 9Kɛ́lɛ, Ŋ̀wála-wâla kélee Yâwɛɛi, a môi ǹyɛɛi, “Tɔ̃yâ ma, bɛ́rɛ kpaya-kpaya lɛ́lɛɛ-ŋai ŋí kélee da pâi lɛɛ̂i a dípûŋ. 10Dí máŋ kpɔmɔ ƃâ kpaa lɛ́lɛɛ sí éekà lɔ́ɔlu ma, ŋwã̂ai tìŋ tɔnɔ nɔ́ ƃé da pâi zɔlɔ ƃôi naa. Da kulûŋ puu kpalaŋ ŋá-tii kɛ̀, mɔlɔŋ-kûluŋ tɔnɔ nɔ́ ƃé da pâi dêei naa.”
11Kpalo-ƃêlaai diai dîa da dí mù sìɣe a ɣele wâla pɛ̀pɛ dí lɛ́ɛ lɔɔ kpelêi é lɛ́ɛ la zu ɣele wûlii é kɛ́, ǹɔɔi é dí kɛ́. 12Da kɛ̂ kɔnîŋ ɣalêi, díkɛ gbùŋ-gbuŋ tùa, díkɛ ƃɔɔ fɛ̂ɛ, díkɛ lɔɔ kpêle díkuu-ŋai su. Kɛ́lɛ dífa târe m̀ɛni-ŋai su Yâwɛɛ a gɛ̂i. 13M̀ɛni ma, da pâi liî a dia luɛ-lâa su. Dílaa túɛ-ƃelai da pâi saâi a puru, dínûai dísaa a kpele wɛ̂li. 14Puru ŋánaa káa saa-táa kɛ̂i. A ǹá táa kpɔ́ a zu kɛ́tɛ a gɛɛ é Zerusâlɛŋ nua kpaya-kpayai kpéle da ǹyóo-yoo-ƃelai da kɛ̂ lii-nɛ̃ɛ kulâi naai.
15Ƃaa kûla-maa a pâi sɛ̂lɛnii núu-kpune ma. Ŋume a pâi yoŋka-ƃelai paâi. 16Kɛ́lɛ Ŋ̀wála-wâla kélee Yâwɛɛi maa fa wɔ́lɔ yèŋ. Gáa a Ɣâla Maa Waa. A ŋɔteniŋ ƃô-laai lɛ̂ ŋɔmɛni ŋá-teɛɛ sã́ai su nyii a gɛ̀ ŋɔnûai samai. 17Ƃála lônii-ŋa da pâi kɛ̂i dílaa miî daa pîleŋ-ŋai ŋá, ƃoli lônii-ŋa dia máŋ díkɛ díkɔnɔ̃ŋ sɔlɔ ƃô naa.
18Kpalo-ƃêlaai diai dîa da sɔnyɔ̂ŋ ɣàla a lɛ́ɛ pere, díkɛ sɔnyɔ̂ŋ ɣàla a kéleŋ ɣála ɣɛlii. 19Da kɛ̂ môi dîyɛɛ, “Tɔɔ Eezuɛ Ŋɔɣâlai é m̀ɛnii kɛ́ wɛ̀ a maa félaa. Tɔɔ é ŋɔkono-teei ŋàa-see kɛ́ wɛ̀ a maa félaa a gɛɛ kú nàa káa kúa kpîŋ. Tɔɔ Eezuɛ Ŋɔɣâla Maa Waai é ŋɔmɛni kpɛtɛɛi ŋàa sèe kɛ́. Tɔɔ kú m̀ɛni káa gáa gíli-ŋai.”
20Kpalo-ƃêlaai dîa. Da mɛni lɛ́lɛɛ sìɣe a mɛni nyɔ́mɔɔ, dí kɛ́ mɛni nyɔ́mɔɔ sìɣe a mɛni lɛ́lɛɛ. Kpíni káa díyêei a kwaa ponoɔɔ. Kwaa ponoɔɔ kɛ́ ƃò díyêei a kpíni. Sɛŋ nɛ̃ɛ ŋwânai dí lá. Sɛŋ ŋwánaa nɛ̃ɛ dí lá.
21Kpalo-ƃelaai diai dîa da díkpîŋ tarei sîɣe nɔ́ a táre lɛ́lɛɛ é tɛ́ɛ núu kélee ŋ̀ɔi ma.
22Kpalo-ƃelaai diai dîa da díkpîŋ sìɣe a wála-wala-ƃela lɔɔ kpele mɛni mai, dílii kpeléɛɛ lɔɔ sumoɔ́ɔ kpelêi. 23Kpalo-ƃêlaai diai dîa da yèe pɛlɛ ǹá sɛŋ-kao sòŋ, díkɛ nûa dímɛni-sâa ŋá tèe a wôya-perei. 24M̀ɛni ma, berei kpɔ́ ŋɔŋ a ŋuŋƃe kpâla da kala kpâla kèreŋ lai, bere ƃé Ɣâla a pâi gɛ̂i la a dia. Díkɔɔ a pâi lûlai dímu, díyee é kpála-kpàla dîa. A pâi kɛ̂i tí, kpɛ́ni fêi, da díyee kúla Ŋ̀wála-wâla kélee Yâwɛɛi nyii gáa a Eezuɛ Ŋɔɣâla Maa Waai ŋɔtɔ̂ŋ-ŋai mu. 25M̀ɛnii ŋí ƃa gɛ́ Yâwɛɛ a ǹíi ŋwána ŋɔnûai dîa. A dísu-kara a lii ŋwâna-pere. A gɛ́ ǹyée kpaya-kpayai da kpɛ̃lîŋ. Ǹûai poma a táa-tâa bere lêe-ŋai dîa. Berei máŋ gáa tí lai, Yâwɛɛ ŋɔlii ŋwânai ŋáa fé niî yeŋ ní ǹyaŋ a pâi dí kula maa kɛ̂i.
26A pâi ŋɛi-kɛ-maa maa-ŋa lɛ̂i ǹɔii-ŋûŋ-ŋai dîa nyíi-ŋai dínaa kôya-koyaai a gɛɛ dí pá. Diai ǹɔii kóyɛŋ mai, a pâi dítôlii a koro-wôo. Da pâi pâi Zerusâlɛŋ a kîrɛ. 27Díta fíi fé pâi kpɛɛ̂i kpaa máŋ é karêŋ. Díta fé pâi nyiî a ŋuŋ, kpaa máŋ nyii é tɛ́ɛ la. Díta ŋɔbɛ̂tii fé pâi têei, kpaa máŋ ŋɔkpáŋ-kpalii ɣɛli é tée. 28Dísɔla-ŋai ŋá séneɛ̂i, díkerâŋ-ŋai ŋá tɛ́ɛ. Díkɔ kɔ́-soo-ŋai sôlo kpanaŋɔ̂ɔi yɛ̂ɛ kɔni-ƃela-ŋa. Díkɔ kɔ́-keleŋ-ŋai da kîrɛ sìɣe yɛ̂ɛ tínaŋ fãa su-kpanaŋɔɔ. 29Díkɔ kuluƃa-ŋai da kɛ̂ lâɣii yɛ̂ɛ yala-sulu-ŋa da sua sôŋ díkɛ lì la díkɛ kpèɣe mɛi nyíi núu da fa pɔ̂ri gulâi díyêei.
30Maa ɣêlei tí, díkpeɣe wôo a pâi kɛ̂i Eezuɛ mɛi yɛ̂ɛ yúo too tîŋ. Malôŋ mɛni tee-tee a pâi kɛ̂i naa. Ŋ̀elei su a pâi kɛ̂i a gbíniɛɛ.
Currently Selected:
Azaya 5: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
