Azaya 28
28
Yâwɛɛ a pâi Eezuɛ kula maa kɛ̂i
1Kpalo ƃêlaai Eezuɛ láa túɛ-ƃelai dîa. Díkaa a lɔɔ ŋánaa kpele-ƃela. Díyoŋkaai, dísu mɛni kɛ́tɛɛ. Kɛ́lɛ díkɛtɛ-laai maa mɛ̂ni a kpɛɛ̂i nûa kíli ŋá. Lɔɔ ŋánaa kpeleɛɛ a dímaa fálenîi yɛ̂ɛ da wúru poa kùla ŋ̀á fólo kɛ́ tòo ma. Díkpeleɛ̂i díkɛ ƃò lâani yɛ̂ɛ nûa da sàa. 2Ǹuu-namui a pâi Asiria kɔ kɔ́-ƃela wála-wala-ŋai tɛɛ̂i a gɛɛ dí kɔ́ pɛ́lɛ dîa. Gɔ́ kɔ́-ƃelai ŋí díkaa yɛ̂ɛ fãa su-kpanaŋɔɔ nyíi a tuna tùaŋ da ya-ɣîliŋ su kpanaŋ é dítɛɛ ƃéla da kpɛ́ni-ŋa ma perei. Da pâi dílɔii penêi dí bɛlɛ. 3Nûa da pâi ƃɔ́rɔnîi Eezuɛ láa túɛ-ƃelai ŋí da lɔɔ kpêle a ŋ̀ánaai, díyoŋkaa, dísu-mɛ̂ni kɛ́tɛi dîa dí dítaŋ-tâŋ. 4Díta maa mɛ̂ni kíli fé pâi wɔ́lɔ lɛɛ̂i núu da kíli ŋá. Dímaa mɛ̂ni a pâi kɛ̂i nɔ́ yɛ̂ɛ sí-sɛŋ ƃà maa-ŋuŋ. Ǹyaa ƃe nûa da gùla nɔ́ tãi támaa dí m̀ii ŋ̀á ma dí nia mɛni ma.
5Ɣele da a pâi pâi Ŋ̀wála kélee Yâwɛɛ ŋɔnûai kélee pâi lɛɛ̂i ɣele mai, a pâi kɛ̂i yɛ̂ɛ kâloŋ ƃɔrɔ lɛ́lɛɛ dímɛni ma. 6A pâi táre tɛɛ̂i m̀ɛni-saa ƃó-ƃelai pɔ́. A pâi wála-wala tɛɛ̂i diai pɔ́ da daa-lêe-ŋai maa kpɛ̂i.
Azaya da Ɣâla ŋɔlóno kɛ́-ƃelai nyii-ŋai da kâa lɔɔ ŋánaa kpele Zuda lɔii sui
7Ɣâla ŋɔlóno kɛ́-ƃelai da zâla láa soŋ-ƃelai dia máŋ da díkpelêi nɔ́. Da lɔɔ kpânaŋ ŋánaa-ŋa kpelêi díkɛ kɛ̀ tàka-taka. Ǹɔɔi a díŋuŋ su kɛ́ wúlee yɛ̂ɛ ƃoo-ƃela. Ɣâla ŋɔlóno kɛ́-ƃelai dífe m̀ɛni-ŋai ŋá kâai nyii Ɣâla a ŋ̀á lɛ̀ dîa zĩ̂a sui. Dífa ŋɔ́nɔ pɔri da maa mɛ̂ni ŋá lɛ̂i núu da kélee ma. Lɔɔ kpeleɛ́ɛ a gɛ́ zâla láa soŋ-ƃelai dífe ŋɔ́nɔ pɔrîi mɛni-sâa da kélee ƃôi dí ŋ̀á tée a ǹɛ́lɛɛ. 8Ǹɔɔi a gɛ̀ díkɛ díkɔŋ pîli têƃele-ŋai dîa da see mai. Díkɔŋ pîlii a gwaa-ŋai ma yiki da kɛ naai é ǹaa kúŋ nyɔ́ŋ.
9Da kɛ̂ díŋuŋ su-woo saâi é pîlaŋ ḿâ. Da kɛ̂ m̀ôi dîyɛɛi, “Ɣâla ŋɔlóno kɛ́-nuui tí a gbîŋ kâai yɛ̂ɛ gbɛ̂ɛ? Gbɛ̂ɛ ƃé gbáaŋɔɔ̂i ŋɔworɛ̂-wooi mɛ̂ni mai? Ŋɔworɛ̂-wooi káa nɔ́ zia-lonii mɛni ma nyii-ŋai díkaa-ƃela da dítɛ nɔ́ gbìŋ ŋá a ninai. 10Gáa nɔ́ m̀ɛni tɔnɔi ƃôi kûa gîe mɛi. Gáa nɔ́ môi kûa ɣɛli ma a tãi-ŋa wóo fii-kpɛɛ-ŋa su.”
11Kɛ́lɛ káfe káwoli tɔɔ̂i ḿâ. Ɣâla a pâi lɔii-ŋuŋ da kpɛ́ni-ŋa su-ƃela tɛɛ̂i nyii-ŋai dísîi-wooi káa a da kpɛ́nii, dí sɛŋ lɛ́ kâa dísîi-wooi su. 12A kákɛ̂i kɛ́ ma, a gɛ́ lii-sêe kɛ́ ƃò káyêei, kɛ́lɛ káfe káwoli tɔɔ̂i m̀a. 13Yâwɛɛ a gbɔɔi-kpɔɔi tãi siɣêi gɛ́ sɛŋ lɛ̂ kâa tɛi-tɛi. Kà wàla káwoli tɔ́ɔ, ka pâi karênii a kákpɔɔi kɔɔi. Ǹyaŋ kà kàreŋ, ka pâi toôi ƃáre ŋá, ká káŋwana, dí kásoŋ, díka pili kpini-pɛ̂rɛ mu.
Zãiyɔŋ taa-leei ŋɔsônoŋ su kɔnii
14M̀ɛni ma, káai a Zerusâlɛŋ-ƃelai láa túɛ-ƃela yoŋkaa-ŋai, ka m̀ɛnii mɛ́ni Yâwɛɛ a m̀ôi kâai. A m̀ôi ǹyɛɛi, 15“Ka yoŋka-têei ká kɛ́ m̀o a yoŋka-pere kâa ka zaa-ƃelai ka mɛni kpɛtɛɛ kɛ́ gîe ma saa-táa, ka káwoo míi ka dîa ni. Ka lâai la mɛni nyɔ́mɔɔ da fa pɔ̂ri ŋɔ́nɔ kákɛ̂i. Lɛ́ɛ ƃé ka gáa a kámaa kɔ̃ɔ sɛŋ. 16M̀ɛni ma, ńyãa Ǹuu-namui Yâwɛɛ ŋa m̀ôi ńyɛ̂ɛi, ‘Ka gáa, ŋa pâi Zãiyɔŋ tɔɔ̂i kpɔ́ núu da fa pɔ̂ri ziɣêi dɔɔ̂i. Ŋa pâi zônoŋ su kɔnii kɛ̂i a kɔni sɔ̃ɔ kpanaŋɔɔ. Ŋa pâi ŋ̀óo ŋuŋ ŋí pɔ̃yɛ̂i maa kɔnii ma, “Laa-laa kpanaŋɔɔ ƃa lii-kpêle.” 17Tɔ̃yâ-laa da teniŋ-ƃô-laa ƃé ŋa pâi gɛ̂i a zônoŋ su kɔnii ŋí kɔ̂ɔŋ sãa.’ ”
Sãɔɔ a pâi kálɛɛ mɛni-ŋai kákili tɔɔ̂i dîai su-karâi, ya-fɛ̂ɛ é lí a káyêei sãa kélee. 18M̀ɛni kpɛtɛɛi ka saa-ni ká gɛ̀ saa-táa, ká káwoo míi, m̀aa mɛ̂nii ŋàa-see fé pâi kɛ̂i yɛ̂ɛ berei ká gbɛ̀tɛ lai. Mɛni-kpɔ̂lu a pà, a pâi káyee mɛi ɣâlei. 19A pâi kɛ̂i pâi a ɣele kélee da kpíni kélee. A pâi kámɔ̃lɛ̂i a fólo da kpíni. Ɣâla ŋɔtuŋ lɛ́lɛɛi maa worɛ-wooi maa tûŋ a pâi kɛ̂i káwôlii yɛ̂ɛ ŋɔŋ. 20A pâi kɛ̂i yɛ̂ɛ núu yée-láa mu-siɣɛɛ ƃé lâani gbìŋ kpua ŋá, pɛlɛ-mɛi sêɣe su kuro-téɛɛ kɛ́ ƃò ǹyêei. Va pɔ̂ri gbìniŋ ní la. 21Yâwɛɛ a pâi pâi lii-ŋwâna su a gɛɛ é ká kula maa kɛ́ yɛ̂ɛ berei è wɔ́lɔ gɛ̀ la a Pɛriziŋ yèei ḿa da Gibeɔŋ tiŋ-tiŋ sui. M̀ɛni kula maai ŋí a pâi kɛ̂i yɛ̂ɛ mɛni kula maa nina. A pâi gɛ́ mɛni mĩli-miliɛ-ŋai kélee lá-kulâi.
22Káfe ǹia-woo ƃôi ŋí mɛni sìɣe a lɛ́ŋ. Ka zìɣe a lɛ́ŋ, m̀ɛni-kpɔ̂lui ŋí a pâi kɛ̂i a gbanaŋɔɔ a sɛŋ núu da fé pâi pɔrîi pûi é kúla ǹyée mu. Ŋ̀wála-wâla kélee Ɣalai a m̀ó ḿâ a gɛɛ a pâi Zuda lɔii gwaa kélee su-karâi.
Ɣâla ŋɔtárei
23Ka káwoli tɔ́ɔ. Ka káwoli tɔ́ɔ m̀ɛnii ma ŋa m̀ôi kâai. 24Sí-sãa sí-nuu fa kɛ̂ nɔ́ zí-sãai sîi kpɛtɛ̂i a ɣele kélee. 25A zí-sãai kélee sîi kpɛ̀tɛ é kpɛ́ɛ ma. À gɛ̀ tí, a zí-sãai sî yɛ̂ɛ berei dí sîi káa lai. A zîi tɔnɔ sì é dínaŋ gélee ma. 26È ŋɔsí-sãai sí pere kɔ́lɔŋ a tɛɛ-ŋa. È gɛ́-pere kɔ́lɔŋ, kpɛ́ni fêi, Ɣâla ƃa déniŋ tɔ̀ɔ. 27Ŋɔsí-sãai ƃá kula pêre maa târe káa ǹyêei tɛi-tɛi. A da-ŋa ƃá kùla ŋ̀á a ƃóa-ŋa. Gɛ́ da-ŋa ƃá kùla ŋ̀á a gbêɣa-ŋa, da-ŋa a wúru-ŋa da sãâ da kpɛ́ni-ŋa. 28Da sí-sɛŋ ƃa kpɛ̀tɛ mìi mɛ̂ni ma. Núu fa kɛ̂ nɔ́ sí-sɛŋ tɔnɔ kpɛtɛ̂i wɔ́lɔ-wɔlɔ da wɔ́lɔ-wɔlɔ m̀ii mɛ̂ni ma. Zí-sãa sí-nuui è ŋɔsí-sãai ƃá kala kula pere kɔ́lɔŋ dîa. 29Dárei ŋí kélee a kûla Ŋ̀wála-wâla kélee Yâwɛɛ yêei. Da fa wɔ́lɔ fɛ̀ɣɛ.
Currently Selected:
Azaya 28: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
