Azaya 16
16
Môa-ƃelai dílii too-pôlu kɛ-naai
1Môa-ŋai dí ƃála-lônii tɛ̀ɛ a laoi-laa sãa Zerusâlɛŋ taa-leei láa túɛ-nuui pɔ́. Dí lì a zãai ŋí Sila taa-leei su vɛ̃ɛ-kpâlaŋ su Zãiyɔŋ Yeei ma. 2Môa-ŋai da pâi kɛ̂i tɛ̂i díkɛ yèŋ Ano Ya-leei ma kɔlɔ kpɛɛ dîa yɛ̂ɛ ŋɔni-ŋa ƃé nûa da dítaa kúla díseêi fé ŋɔ́nɔ mà.
3Diai lì a ǹaoi-laa sãai ŋí, da pâi m̀ôi Zerusâlɛŋ ma dîyɛɛi, “Ye dɔ̃yâi ƃó kûa í kúlia-woo ƃó. Ye íninîŋ pɛlɛ kúmɛi yɛ̂ɛ wolâ wuru a fólo ŋɔzìzi sòŋ nyii va pɔ̂ri tɛɛ̂i ǹáa su. Kúkaa a kɔpû-ƃela. Ye kúloo ƃɛ́i nûa dífe ǹaa kɔ́lɔŋ. 4Ǹɛɛ naa kúnûai dílɛɛ ílɔii ŋí ma. Dímaa kɔ̃ɔ ǹúu nyɔ́mɔɔ-ŋai yêei é lɛ́ɛ la zu díkelee díkpɛɛ ɣele ma.”
Môa-ƃelai lúaŋɔɔ da mɛni su kara mɛni-ŋa a pâi kpɛɛ̂i. Ǹyaŋ diai kélee ǹɔii su karâi, dífe ŋɔ́nɔ pâi kɛ̂i ɣele ma. 5À kɛ̀ tí, núu tɔnɔ a pâi kulâi Gâloŋ Deeƃé ŋɔsuui su é kɛ́ a kâloŋ Môa-ŋai mɛi. Ŋɔkâloŋ-laai kɔ́ɔ a pâi pîlanii a wɛli-kɛ́-maa kpanaŋɔɔ. A pâi ŋɔnûai mɛi kâai a tɔ̃yâ da teniŋ-ƃô pere. A pâi gɛ̂i tɔ̃yâ-laa mɛni kɛ́ ƃò naa núu kélee mɛni ma.
6Zuda ƃelai dí m̀o dîyɛɛi, “Môa-ŋai yoŋkaai, dísu-mɛni kɛ́tɛ. Kɛ́lɛ díyoŋka tua-ŋai da dísu-mɛni kɛ̂tɛi káa nɔ́ kpɛ́ni-kpɛni.”
7M̀ɛni ma, tɔɔ Môa-ŋai dí gbêɣei tóo. Tɔɔ núu kélee é gbêɣei tóo Môa-ŋai mɛni ma. M̀ii-sãa lɛ́lɛɛ-ŋai díkɛ̀ miî Kîɛ-Arisa taa-leei sui, maa mɛni kíli a tòo díŋa, da pâi wɔ̂lɔi a zu-kɛ́tɛ. Da pâi kɛ̂i lii-too pôlu su-kɛ́tɛ su, 8kpɛ́ni fêi, Ɛsibɔŋ da Sima taa-lee-ŋai su a kara. Ŋwã̂ai da kâa gùla gbɔmɔ ƃâ-ŋai su daa-lêe-ŋai ŋí sui, da kâa ǹúu láa túɛ-ƃelai ŋuŋ su kɛ̀ wúlee. Gbɔmɔ kpâlaŋ-ŋai ŋí díƃûu ƃò, díkpɔlɔ é seri kwaa ma kôya ma kɛ́ɛ yɛ̂ɛ Zazɛ taa-leei ma. Díƃûu ƃò díkpɔlɔ da-ŋa dí lí vóloi kulâi-pere fɛ̃ɛ-kpâlaŋ su-pere. Da-ŋa dí lí Ǹyúo-saai ḿa voloi liî pere. 9Ŋa wɔ̂lɔi Sima kpɔmɔ-kpâlaŋ mɛ̂ni ma yɛ̂ɛ berei ŋá wɔ̀lɔ la Zazɛ mɛni mai. Ŋa wɔ̂lɔi Ɛsibɔŋ da Ele-alɛ mɛ̂ni ma, kpɛ́ni fêi, sí-sãa da fé ŋɔ́nɔ kpɛtɛ̂i naa. Lii-nɛ̃ɛ kula-wôo fé ŋɔ́nɔ tɛ̂i naa. 10Núu da fé ŋɔ́nɔ lii-nɛ̃ɛ kulâi gbâlaŋ-ŋai ŋí da ŋá. Núu da fa mii-sãa da kélee sɔlɔ ƃô naa. Lii-nɛ̃ɛ mɛni da kélee fé ŋɔ́nɔ naa gbɔmɔ kpâlaŋ-ŋai da ŋá. Núu da fa ŋɔ́nɔ lii-nɛ̃ɛ wule da tòo naa. Sí-sãa ƃá-kula mɛni da fé ŋɔ́nɔ naa. Yâwɛɛ a gélee kpéra. 11Ŋa nyîɣɛi Môa mɛni ma, ŋ́gɛ maloŋ too maa wɔ̂lɔ kɛ̀ Kîɛ-Arisa mɛni ma. 12Môa-ŋai da pâi kɛ̂i mɔ̃lɛ̂i díkɛ pà díyee maa waa-ŋai ma da díɣâla fɛli kwaa-ŋai ma a gɛɛ dí díɣâlai fɛ́li. Kɛ́lɛ dífe pâi mɛni lɛ́lɛɛ sɔlɔ ƃôi naa.
13M̀ɛnii ká ŋí Yâwɛɛ è wɔ́lɔ mò é pîlaŋ Môa-ŋai dîai. 14È m̀o ǹyɛɛi, “Ŋa pâi Môa-ŋai dítɔɔ-sãai kélee su-karâi díyêei kóraŋ saaƃa yée mu. Naa-ƃelai gbulu-lôŋ nɔ́ ƃé ŋa pâi fâai ma dílɛɛ ɣele ma. Kɛ́lɛ wála-wala laa da kélee fé pâi kɛ̂i díyêei.”
Currently Selected:
Azaya 16: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
