Zɛnɛse 32

Zeeka è gbîŋ kpɛ̀tɛ a gɛɛ é Isɔɔ káa

1Zeeka ǹyaa máŋ è lì, da Ɣâla ŋɔkéla-ŋai dí koyâŋ. 2Tãi è díkàa lai, è mò ǹyɛɛi, “Ɣâla ŋɔkɔ-kuluƃa-ŋai ká ŋí.” Mɛni ma è gwaai tí ma sèe a Maɣanaiŋ (zu-kulai ƃa ƃûu feerɛ).

3Nya ƃe Zeeka è kéla-ŋa tɛ̀ɛ tuɛ ǹîa Isɔɔ pɔ́ naa Sɛi lɔii-kpiniŋ su Idɔŋ lɔii su. 4È mò dîa ǹyɛɛi, “Ka lí ká mó ḿɛi-nuui Isɔɔ ma, íyee mu-nuui Zeeka ǹyɛɛi, ‘Ŋa lɛɛ Laƃaŋ pɔ́ naa a ŋɔ̃ya a lɛɛ la zu tãi ŋí a seri. 5Niŋa káa ńyêei, soo-fáleŋ-ŋa, ƃála-ŋa, tíi kɛ́-sinaa da tíi-kɛ-nɛyaa. Nya ƃe ŋá ŋ́oo tɛɛ̂i ípɔ naa yái íkaa a ŋámɛi-nuui a gɛɛ ŋá gáa à kɛ̀ ílii lâai ḿɛni ma.’ ”

6Nya ƃe géla-ŋai dí pà pôlu Zeeka pɔ́ díyɛɛ mai, “Kú lì ílîa Isɔɔ pɔ́ naa, ǹyaŋ gáa pâi ílaa koyânii. Kɛ́lɛ da núu ŋuŋ náaŋ (400) ƃé pâi.” 7Zeeka è nâa kɛ̀ yaôi kpɔ́ a ŋánaa. È ŋɔnûai ŋá kɔ̂lɛ da ŋɔƃála-ŋai, ŋɔtaa-tulɛ-ŋai é pɛ́lɛ ŋɔsoo-fáleŋ-ŋai dîa gîei feerɛ. 8È mò ǹyɛɛi, “Isɔɔ à pà ǹúu-kpului dɔnɔ pɔ́ à bàa, gbèlii a pâi lɛɛ̂i.”

9Nya ƃe Zeeka è mò ǹyɛɛi, “Óo ńâŋ Eberaɣɛ̃ɛ da Aise Díɣâlai, Óo Yâwɛɛ, í mò ḿâ yɛ̂ɛi, ‘Lí pôlu ílɔii su ínuu-suui pɔ́, ŋa pâi mɛni lɛ́lɛɛ kɛ̂i yɛ̂.’ 10Ḿaa fé nɛ̃ɛ ní a gɛɛ ŋá íwɛli-kɛ-maa kpanaŋɔɔi da ísãa-laai da sɔlɔ ƃó. Kpɛ́ni fêi, ŋásia-wurii nɔ́ ƃé ŋá Zɔdiŋ Ya-leei tîyeŋ la. Ǹyaŋ ŋa nâa kɛ́ a núu-kpulu feerɛ. 11Kpera yɛ̂ ŋgúla ǹîa Isɔɔ yêei, kpɛ́ni fêi, ŋa yaôi mà, va lâ pá la é kúkelee kúpaa kwa nɛyâai da dílônii. 12Kɛ́lɛ í mò yɛ̂ɛi, ‘Ŋa pâi mɛni lɛ́lɛɛ kɛ̂i yɛ̂, ŋá ísuui táma yɛ̂ɛ Yúo su ŋãya, nyii núu fa pɔ̂ri ǹônoi.’ ”

13Nya ƃe è nyii naa a gbínii tí, é sama-sɛŋ kula ŋɔsãâi su ǹîa Isɔɔ mɛni ma. 14È ƃoli-saa ŋuŋ feerɛ (200) sìɣe, ƃoli-sirɛ buu feerɛ, ƃála-saa ŋuŋ feerɛ (200) da ƃála-sirɛ buu feerɛ, 15É soo-fáleŋ kɔ̃ɔ-lee buu saaƃa síɣe da dílônii, da niŋa-saa buu náaŋ é pɛ́lɛ niŋa-sirɛ puu ma, da wɛlɛ-sôo-saa buu feerɛ é pɛ́lɛ zirɛ puu mâ, 16È dítɛ̀ɛ ǹyée mu-ƃelai pɔ́ díkpulu mâ ǹyɛɛ diai, “Ka tɔɔ ńduɛ, ká daa-tulɛ-ŋai tɔ́ɔ díkpulu mâ, ká díloai lɛ́ɛ.” 17È mò daa-tulɛ-kpului maa-ŋuŋ túɛ-nuui mâ ǹyɛɛi, “Ǹîa Isɔɔ à íkàa, à ímarê kɛ̀ ǹyɛɛ íkaa gbɛ̂ɛ pɔ́ naa, íkaa liî mí, kpaa máŋ gbɛ̂ɛ pɔ́ɔ ƃa daa-tulɛ-ŋai ŋí ítuɛi, 18Mó ma yɛ̂ɛi, ‘íyee mu-nuui Zeeka pɔ́ɔ ƃa dîa. Díkaa a sama-sãa ŋɔmɛi-nuui Isɔɔ mɛni ma. Gáa máŋ kúpôlu.’ ” 19È mɛni tɔnɔi ŋí ƃò máŋ daa-tulɛ-kpulu-ŋai túɛ-ƃelai kélee dîa tɛi-tɛi ǹyɛɛ diai, “Isɔɔ à kákàa, ka mɛni tɔnɔi tí ƃó mà, 20kâai, ‘íyee mu-nuui Zeeka kpîŋ káa kúpôlu.’ ” Kpɛ́ni fêi, è mò ǹyɛɛi, “Tãi da ŋa pâi ǹíi ŋá yenîi a zama-sãai ŋá dɛ̀ɛ ńduɛi. Naa pôlu mà ŋà lì ŋà gàa, tãi da a pâi ǹyée seêi ḿu.” 21Nya ƃe dí lì a daa-tulɛ-ŋai dúɛ, ǹyaa kpîŋ é nyii mûui su a maa kpinii tí.

Zeeka-ni dí kɔlɔ mâ kɔ̀ Pɛniɛ

22Maa kpínii tí è mu sìɣe da ŋɔnɛyâa feerɛi, ŋɔyée mu-nɛyâa feerɛi, da ŋɔnîa-pɛlɛɛ puu káo tɔnɔi, é Zabɔ tíyeŋ a dia gbáyai ŋá. 23Nya ƃe è dítɛ̀ɛ ǹyái pôlu é pɛ́lɛ ǹyée-ŋa-sãai kélee mà. 24Nya ƃe Zeeka ǹyaa tɔnɔ è lɛ̀ɛ naa.

Da nalôŋ tɔnɔ dí lɛ́ɛ kɔlɔ mâ kɔ̂i é lɛ́ɛ la zu ɣele é ƃɔ́. 25Tãi nalôŋ è gàa la a gɛɛ ǹyée fé tɛ̀ɛ ní Zeeka mai, è zòŋ a ŋ̀wɛ́rɛ tɔɔ̂i, ǹyaŋ ŋ̀wɛ́rɛ tɔɔ̂i-kao è sìɣe gbulɔ̂ŋ ŋá tãi dí kɛ̀ gɔlɔ mâi kɔ̂i lai. 26Nalôŋ ǹyɛɛ, “Tɔɔ ŋá lí, kpɛ́ni fêi, ɣele a ƃɔ́.”

Kɛ́lɛ Zeeka è mò ma ǹyɛɛi, “Fé pâi ílɛɛ̂i naa í lí, fɛ̂ɛ í lûwa tòo ḿâ.”

27Nalôŋ ǹyɛɛ mai, “Ílaa ƃa gbɛ̂ɛ?”

Zeeka ǹyɛɛ ma, “Ńaa ƃa Zeeka.”

28Ńyɛɛ ma, “Dífe pâi ŋɔ́nɔ wɔ́lɔ ítôlii a Zeeka fɛ̂ɛ Eezuɛ, kpɛ́ni fêi, ya kɔ́ Ɣâla pɔ́ da núu-kpune, ǹyaŋ íyee a tɛ́ɛ dîa.”

29Nya ƃe Zeeka è marê kɛ̀ ǹyɛɛ mai, “Kpera yɛ̂ ílaa lɛ́ mâ.”

Kɛ́lɛ è mò ǹyɛɛi, “Ƃa ńaa mare-kɛɛ kɛ̂i lé mɛni ma?” Nya ƃe è lûwa tòo ma nàa.

30Mɛni ma Zeeka è gwaai ŋí mâ tòli a Pɛnuɛ ǹyɛɛi, “Kpɛ́ni fêi, kwa Ɣâla kú kúŋɛi pù gîei, ǹyaŋ ŋáfulu-laai è lɛ̀ɛ ńyêei.” 31Vóloi è kɛ̀ toôi ma tãi è kɛ̀ tɛɛ̂i la Pɛnuɛi, gɛ́ nɛmu, kpɛ́ni fêi, ŋ̀wɛ́rɛ è kɛ̀ sôlii. 32Mɛni ma é síɣe tãi tí mâ é tóo sâa ma, Eezuɛ-ŋai dífa sua tóloŋ-kao koyânii luu mii, kpɛ́ni fêi, nalôŋ è lɛ̀ɣɛ Zeeka tóloŋ-kao koyânii luui ma.

Currently Selected:

Zɛnɛse 32: KWB

Highlight

Copy