Danîa 12

Ŋ̀elei gbɛɛ-ŋa tãi

1Ŋ̀âla-taa-kelai kɛ̀ zĩ̂ai su-kulai Dania mai, è ŋɔ́nɔ mò m̀a ǹyɛɛi, “Tãi tí ma, Makɔɔ nyii gáa a Ŋ̀âla-taa kéla-ŋai láa túɛ-ƃelai dɔnɔi nyii a ínûai maa kɔ̃ɔi, a pâi pâi. À pà, mɛni kpânaŋ a pâi kulâi ǹûai dîa. A pâi kɛ̂i a mɛni kpânaŋ nyii da fé tá kɛ́ ní é síɣe ǹɔii-ŋûŋ-ŋai kɔ́ɔ pîlaŋ tãi mai. Kɛ́lɛ maa tãi tí ínûai nyii-ŋai dílaa pɔ̃yɛ̂i gɔlɔi sui da pâi ŋuŋ ma ƃô sɔlɔ ƃôi. 2Zaa-ƃelai dámaa da pâi dímu siɣêi saa yêei. Da-ŋa da pâi kɛ̂i wɔ́lɔ-wɔlɔ fulu-laa ŋãa-nɛ̃ɛ kulâi. Ƃaa kûla-maa a pâi sɛ̂lɛnii da-ŋa dîa dí ŋumɛ wɔ́lɔ-wɔlɔ da wɔlɔ-wɔlɔ. 3Dáre-ƃelai da pâi kɛ̂i fôloi yɛ̂ɛ ŋ̀ele-kɔlɔŋ kolei, diai da tɔ̃yâ mɛni kɛ́-pere lɛ̀ nûa dîai, dí kɛ́ fòlo yɛ̂ɛ bɛ́mɛlɛŋ-kao pɛlɛɛ-pɛlɛɛi wɔ́lɔ-wɔlɔ da wɔ́lɔ-wɔlɔ.

4“Kɛ́lɛ yá Danîa, ífe niî m̀ɛnii ŋí duŋ tòo. Gɔlɔi lá-tɛ í zɔ̃ɔŋ tóo é lɛ́ɛ la zu maa tãi é seri. Núu támaa da pâi wɛ̂lii dí m̀ɛnii kɔ́lɔŋ kɛ̂i. Da pâi dítãi dámaa lánîi m̀ɛnii ŋí ma.”

5Nya ƃe ńyãa Danîa, ŋá Ɣâla-taa kela da kpɛ́ni feerɛ kàa tɔɔ̂-ni ya-lee kɔlɛ. Dɔnɔ è kɛ̀ m̀éla dɔnɔ ma, gbéli kɛ́ ƃò m̀éla tɔnɔ ma. 6Ŋ̀âla-taa-kelai nyii m̀aa è kɛ̀ a ŋ̀iriɛɛ a seɣe kôle nenɛ fɛfɛɛ gɛ́ ƃò tɔɔ̂ni ǹyái-ŋua perei, m̀arâŋ-nuui m̀arê kɛ̀ ǹyɛɛ mai, “Ɣele ɣɛɛlu ƃé a lɛɛ m̀ɛni kpɔ̂lu-ŋai ŋí kélee kpɛɛ-ŋa é lɛ́ɛ pâi serîi?”

7Ŋ̀âla-taa-kelai nyíi m̀aa è kɛ̀ a ŋiriɛɛ a seɣe kôle nenɛ fɛfɛɛ, gɛ́ ƃò ǹyái ŋûa-perei, ŋá gàa é ǹyée tɛ́-ɣelêi é vóo a Ŋ̀wɔ́lɔ-wɔlɔ Ɣalai ǹyɛɛi, “A lɛ̀ɛ nɔ́ a kóraŋ saaƃa da gbûra diai Ɣâla ŋɔnûai paâi díkpɛɛ-ŋa tãi kɛ́ seri. Ǹyaŋ nyíŋi kélee ŋàa-see a pâi kɛ̂i.”

8Ŋá ŋ̀óo m̀ɛni, kɛ́lɛ fé ŋ̀á káa ní. Nya ƃe ŋá m̀arê kɛ̀ ńyɛ̃ɛ mâi, “Ŋánuu-namui, lé ƃe pâi kulâi nyíŋi sui?”

9È zu tòo ǹyɛɛ ḿâi, “Lí yɛ̂ Danîa. M̀ɛnii ŋí káa a loo mɛ̂ni. Núu da fé pâi mɛni kɔ́lɔnîi é pîlaŋ mà é lɛ́ɛ la zu maa tãi é seri. 10Núu támaa da pâi maa wâa-laa sɔlɔ ƃôi, pɔ́ɔ é kpɛ́ɛ dîa, dámaa maa é fáleŋ. Kɛ́lɛ zɔnyɔ̂ŋ-ƃelai yée a pâi kɛ̂i nɔ́ sɔnyɔ̂ŋ su. Da fé pâi wɔ́lɔ m̀ɛnii kɛ̂i ŋ̀á kâai. Kɛ́lɛ dáre-ƃelai nɔ́ ƃé pâi m̀ɛnii ŋá kâai kɛ̂i.

11“É kúla ŋ̀ele kélee sala kula mɛ̂ni-ŋai kpera tãi ma da tãi a pâi zɛŋ nyɔ́mɔɔ kɛ́tɛi seêi la Ŋ̀âla-pɛrɛ Kɛ́tɛi mui, ɣele kûu wála tɔnɔ, ŋuŋ feerɛ pôlu buu lɔ́ɔlu mɛi náaŋ (1,290) a pâi tɛɛ̂i. 12Lûwa káa diai dîa da pâi lɛɛ̂i dílaa-lai su ŋ̀ele kûu wála tɔnɔ ŋuŋ saaƃa pôlu buu saaƃa káo lɔ́ɔlui (1,335) é tɛɛi.

13“Yá Danîa, lɛɛ nɔ́ ílaa-lai su. Ya pâi saâi. Kɛ́lɛ ya pâi ímu siɣêi a ŋ̀elei gbɛɛ-ŋa tãi í ífela-fei sɔlɔ ƃó.”

Currently Selected:

Danîa 12: KWB

Highlight

Copy