Kolasiɛŋ 3

1À kɛ̀ ǹyaŋ ka Kôrai-ni ka kámu siɣe saa yêei gîe ma, gɛ̀ ní ka zãâi kɔri nyíi-ŋai díkaa kúmɛi-perei, ƃɛi Kôrai káa naa see ni Ɣâla laa-mii-yee mɛi. 2Ka kákili kɛ́ zãâi dîa díkaa kúmɛi-pere. Káfe kákili kɛ́ ǹɔii su-sãai dîa. 3Kpɛ́ni fêi, ka saa, ǹyaŋ káfulu-laai da Kôrai díloɔɔ̂i Ɣâla kponôi. 4Tãi Kôrai, nyíi gáa a kúfulu-laai, a pâi kulâi lai, gɛ̀ ní káa máŋ ka dîa-ni ka pâi kulâi folo-laa su.

Vúlu-laa pɔlɔi da ninai

5Mɛni ma ǹɔii su-mɛni-ŋai díkaa kákponôi ka dí-páa, dîa ƃa wulu-wulu kɛ́ɛ, mɛni maa liƃiɛ, tua-pere-nyɔŋ maa-sɛŋ wɛliɛ, kili-ŋa-sia nyɔ́mɔɔ, da sɛŋ maa-lii teɛɛ, nyíi gáa a ɣâla da kpɛni fɛliɛɛi. 6Nyíŋi mɛni ma Ɣâla ŋɔlii-ŋwanai káa pâi ǹônii nyíi-ŋai dîa dífa ŋ̀óo mɛnii. 7Káa máŋ ká sìa dísama a tãi da, tãi ká kɛ̀ la mɛni-ŋai ŋí sui. 8Kɛ́lɛ, ka tée nyíi-ŋai kélee dîa máŋ, lii-ŋwana, kpɔara, laa-kara, larâŋ woo-ŋa dí kula kála. 9Káfe lɛ́ɛ kɛ̀ kákîe-ni dîa, kpɛ́ni fêi, ka nâa kákpîŋ tua-pere pɔlɔ-ŋai lɛɛ da dímaa kɔri-pere, 10ka kátûa-pere nina-ŋai siɣe nyíi gbɛtɛɛ̂i a nina, yɛ̂ɛ zɛŋ kélee kpɛtɛ-Ɣalai tua-pere káa lai, a gɛ́ɛ ka gɔ́lɔŋ a ǹɛ́lɛɛ. 11Zɛŋ kpɛtɛɛ ninai ŋí su ŋa-kɔlɛ-mɛni fe núu-sii kélee loai, a nɛ̃ɛ ma kpîŋ é kɛ́ a Gurii-nuu kpaa Zûu-nuu, núu kpɛtɛɛ kpaa ǹúui fe kpɛtɛ níi, ŋɔ̃yâ, Setiyeŋ-nuu, luɛ, da núu ŋuŋ ma ƃoɔ. Kɛ́lɛ, Kôrai ƃa gélee, gɛ ƃo gélee su.

12Káa ƃa ǹûai Ɣâla a kálɛ, a kámaa waa a káwɛli. Mɛni ma, maloŋ-kaa é kɛ́ káyêei, sɔŋ-lɛlɛ, maa-yeŋ, lii-lɛlɛ, da lii-kpele. 13Ka kálii kpele kákîe-ni yêei. À kɛ̀ kásɔŋ à kɛ̀ kákîe-ni koi ka kákîe-ni su-mɛni lɛɛ. Yɛ̂ɛ berei Kúnuu-namui e kasu-mɛni lɛɛ lai, ka gɛ ti máŋ. 14Nyii-ŋai kélee mɛi-ŋɔi ƃa wɛli-kɛ-maa é kɛ́ káyêei, nyíi a mɛni kélee kɛ̀ tɔnɔ a tɔ̃yâ kpîŋ. 15Tɔɔ Kôrai ŋɔlii-sêei é tíi kɛ́ kálii su. Sâpoi ká ti Ɣâla a kátoli la a gɛ́ɛ ká kɛ́ kpono tɔnɔ su. Sɛɣɛi-fei é kɛ́ káyêei. 16Ka Kôrai ŋɔwóoi lɛ́ɛ naa é kɛ́ kálii su a dámaa táre kélee su. Ka sɛŋ lɛ́ kákîe-ni dîa, ka kákîe-ni lia-woo ƃo, wule-woo-ŋa su da Ɣâla-wule-ŋa, kakɛ sɛɣɛi-fei-wule too kálii su Ɣâla ma. 17Mɛni kélee ka gɛ̀ a káwoôi kpaa a kátûa-perei, ka gélee kɛ́ Kúnuu-namui Zîsɛ láai su, ka sɛɣɛi-fei tɛɛ Nàŋ-nuui Ɣâla pɔ zarâi.

Vúlu-laa ninai maa-wɛli-kɛ-maa-tii kɛ́-pere

18Nɛyâa, ka kɛ́ kásinâai mu, yɛ̂ɛ berei gáa la a mɛni lɛ́lɛɛ Kúnuu-namui kponôi. 19Sinâa, ka kánɛyâai wɛli. Káfe lono ŋɛi tɛ́ɛ ɣelêi kɛ̀ dîa. 20Nîa-pɛlɛɛ, ka kákaa-ƃela wóo mɛ́ni mɛni kélee su, kpɛ́ni fêi, gáa a Kúnuu-namui líi láa-mɛni. 21Lóŋ káa-sinaa, káfe kánîa-pɛlɛɛi líi-ŋwana-mɛni kɛ̀, kà gɛ̀ ti, gɛ̀ ní dífii a pâi kpɛɛ̂i. 22Luɛ-ŋa, ka kámɛi-ƃelai wóo mɛ́ni mɛni kélee su, nyíi-ŋai díkaa kámɛi ǹɔii sui. Káfe núu ŋɛi-woo-mɛni kɛ̀ nɔ́ a dia a gɛ́ɛ ka núu líi láa, kɛ́lɛ, ka gɛ́ a kálii kélee Kúnuu-namui ŋɔyao-maai su. 23Kà kɛ̀ tíi kélee kɛ̂i, ka gɛ́ a kálii kélee, yɛ̂ɛ kà kɛ̀ tíi kɛ̂i Kúnuu-namui mi, kɛ́lɛ, núu-kpune fei. 24Ka gɔ́lɔŋ a gɛ́ɛ ka pâi bɔɔ-sɛŋ sɔlɔ ƃôi Kúnuu-namui yêei a káfela-fei. Kákaa tíi kɛ̂i Kúnuu-namui Kôrai mi. 25Kpɛ́ni fêi, mɛni nyɔ́mɔɔ-kɛ-nuui a pâi ŋɔfela-fei sɔlɔ ƃôi a mɛni nyɔ́mɔɔi e gɛ̀i. Su-ɣɛɛ-mɛni kélee fe zu.

Currently Selected:

Kolasiɛŋ 3: KWB

Highlight

Copy