Zia-ƃelai Kɛ́-mɛni-ŋai 4
4
Pitɛ da Zɔ̂ŋ díkaa ǹúu kpaya-kpayai ŋɛ́i-tuɛ
1Pitɛ da Zɔ̂ŋ dí kɛ̀ niî lônoi ǹûai pɔ́, zâla láa soŋ-ƃelai da Ŋ̀âla-pɛrɛ kɛ́tɛi mɛi káa ƃelai láa túɛ-nuui, Sâdusii-ŋai dí kùla díŋɛi. 2Dí kɛ̀ a dílii ŋwánaa, kpɛ́ni fêi, Pitɛ da Zɔ̂ŋ dí kɛ̀ sɛŋ lɛ̂i ǹûai dîa díkɛ lòno Zîsɛ sârai é pîlaŋ m̀u-siɣe saa-yêei ma. 3Dí dísòŋ díŋɛi é lɛ́ɛ dîa a gɛ́ɛ ɣele é ƃɔ́, kpɛ́ni fêi, è kɛ̀ a ɣele-wulii. 4Kɛ́lɛ, diai dí ŋ̀óoi mɛ̀nii, dámaa è làa la. Diai làa lai dî kɛ̀ yɛ̂ɛ núu wála lɔ́ɔlu.
5Bôlu ma ɣelei dímɛi-ƃelai, dínuu-pɔlɔ-ŋai da díkɔlɔ pɔ̃yɛ-ƃelai dí díŋaa tɛ́ ma Zerusâlɛŋ. 6Zâla láa soŋ-nuu kɛ́tɛi Ɛnaa máŋ è kɛ̀ naa, Kaifa, Zɔ̂ŋ, Alezaŋda da Zâla Láa Soŋ-nuu kɛ́tɛi ŋɔnuu-suui su-ƃelai kélee. 7Dí Pitɛ da Zɔ̂ŋ tɔ̀ɔ dísama, dí dímarê kɛ́, dîyɛɛ dîai, “Le wála-wala, kpaa gbɛ̂ɛ láai su ƃé ka nyíŋi kɛ̀ lai?” 8Pitɛ láa è kɛ̀ a vɛ́ɛ a M̀ɔlêŋ Maa Waai. È mò dîa, ǹyɛɛi, “Káai a ǹúu-mɛi-ƃelai da ǹúu pɔlɔ-ŋai, 9à kɛ̀ su-kɔ̂ɔŋ à sâa pà kúpɔ é pîlaŋ mɛni lɛ́lɛɛ kɛ́ɛ ma kɔɔ-pu-nuu mi, pere sîi lé-kɛɛ su ƃé ǹalôŋ ŋí è ƃalo lai, 10tɔɔ é kɛ́ a kákelee kákɔlɔŋ mɛni da Eezuɛ-ŋai kélee a gɛ́ɛ Nâzarɛ Zisɛi Kôrai nyíi ka gbàmo wúru su-tíyeŋɔɔ mai, Ɣâla è m̀u sìɣe saa yêei, ǹáai su ƃé ǹalôŋ ŋí káa tɔ̂ɔni la káŋɛi a m̀áloɔɔ. 11Zisɛi ŋí káa a gɔnii nyíi
káai a bɛ́rɛ tɔɔ-ƃelai ká káŋɛi nàɣiŋ mɛi.
Ǹyaa ká a kɛ́ a bɛ́rɛi sonôŋ su-kɔnii gbîŋ-kpiŋ. 12Ǹyaŋ ƃálo-laa fa kûla núu da kpɛni yêei, kpɛ́ni fêi, láa da kpɛ́ni kélee fé naa ǹɔii ma ƃé nyíi dɛɛ̂i nuu-kpune ƃálo-laa sɔlɔ ƃo zui.”
13Ǹúu Pɔlɔ-ŋai kɛ́ɛ da gáa a gɛ́ɛ berei máŋ Pitɛ da Zɔ̂ŋ dífe kɛ́ díkɛ̀ lônoi a líi-kpele perei, dílaa è kpala dîa. Dí nâa gɔ́lɔŋ a gɛ́ɛ dí kɛ̀ Zîsɛ pôlu-ƃelai da. 14Dí ǹalôŋ ŋí kàa a máloɔi, gɛ́ ƃò tɔ̂ɔni Pitɛ da Zɔ̂ŋ kɔlɛ. Kɛ́lɛ dífe pɔ̂ri ní mɛni da ƃôi é pîlaŋ ma. 15M̀ɛni ma, dí mò dîa a gɛ́ɛ dí kúla gbɔŋ su, dí pɛ́lɛ ŋuŋ ma pìlaŋ kɛ̂i é pîlaŋ m̀ɛnii ŋí. 16Dí mò, dîyɛɛi, “Lé ƃé kwa pâi gɛ̂i a ǹûai ŋí? Zerusâlɛŋ-ƃelai kélee da nâa gɔ́lɔŋ a gɛ́ɛ ŋɛi-kɛ-maa kɛ́tɛi ŋí è kɛ̀ dísârai, nyíi kúfa pɔ̂ri zîa toôi. 17Kɛ́lɛ, a gɛ́ɛ m̀ɛnii ŋí fé lì kwaa kôya ma ǹûai sáma, kwaa dímaa yao a gɛ́ɛ dífe lono núu da kélee pɔ́ ŋɔ́nɔ Zîsɛ láai su.” 18Dí dítòli dí m̀o dîa a gɛ́ɛ dífe ŋɔ́nɔ lòno, kpaa máŋ dí sɛŋ lɛ́ Zîsɛ láai su. 19Kɛ́lɛ, Pitɛ da Zɔ̂ŋ dí díwoo su too, dîyɛɛi, “À kɛ̀ ǹɛ́lɛɛ̂i Ɣâla ŋɛ́i a gɛ́ɛ kú kúwoli tɔɔ kâa é tɛ́ɛ Ɣâla ma, ka ŋ̀á tée. 20Kɛ́lɛ, kúfa pɔ̂ri kperâi lônoi é pîlaŋ m̀ɛnii ma kwa gâai da nyíi kwa mɛnii.” 21Gɛ́ɛ da dímaa yao ŋɔ́nɔi, dí dílɛ̀ɛ naa dí li, dífe pere káa ní a gɛ́ɛ dí tɔ̂ŋ kpɛ́ dîa, kpɛ́ni fêi, ǹûai dí kɛ̀ naa, ǹúui kélee díkɛ Ɣâla láa ma tɛ̂i ŋɔfólo-laai mɛni ma, 22kpɛ́ni fêi, ǹúui dí màlo a ŋ̀ɛi-kɛ-maai ŋí, ŋɔpɔlɔ-pɔlɔ-laa è kɛ̀ a dɛ́ɛ kóraŋ buu náaŋ ma.
Ǹaa-laa-ƃelai dí Ɣâla fɛ̀li a gɛ́ɛ díkɛ a dílii-kpeleɛɛ díɣâla-fɛliɛɛi su
23Díkɛɛ da Pitɛ da Zɔ̂ŋ ŋuŋ ma ƃói, dí lì díƃarâai pɔ́-naa dí m̀ɛnii kélee ƃò dîa zâla láa soŋ-ƃela kpaya-kpayai da ǹúu pɔlɔ-ŋai dí mò dîai. 24Nya ƃe díkelee Ɣâla fɛ̀li gîe ma dîyɛɛi, “M̀ɛi-nuui, yá ƃé ŋ̀elei kpɛ̀tɛ, ǹɔii, ǹyái da dísu sãa kélee. 25Í lòno kúnâŋ Deeƃé, íyee-mu-nuui pɔ́ M̀ɔlêŋ Maa Waai sârai, yɛ̂ɛ mài,
‘Lé mɛni ƃé Zɛ̃tai-ŋai dí dílii ŋwàna la,
ǹûai dígbã mɛni folo-ŋai mɛni mai?
26Ǹɔii kaloŋ-ŋai dí tɔ̀ɔ nàa kɔlɛ,
nuu-tuɛ-ƃelai dí díŋaa tɛ́ gîe ma,
a gɛ́ɛ dí kɔ́ Ǹúu-namui pɔ́ da Ŋɔkôrai.’
27Tɔ̃yâ ma daai ŋí su Ɛɛlɔ, Pɔ̃ŋtiɛ Pâle, Zɛ̃tai-ŋai da Eezuɛ-ŋai dí díŋaa tɛ̀ gîe ma a gɛ́ɛ dí kɔ́ íyee-mu-nuu maa waai Zîsɛ pɔ́ nyíi í nɛ̀i. 28Dí díŋaa tɛ̀ ma a gɛ́ɛ dí m̀ɛnii kɛ́ í gbɛtɛ a íwala-walai nàa túɛ a gɛ́ɛ é kɛ́i. 29Kúnuu-namui, dímaa yaoi káa nâa, í wála-wâla tɛɛ íyee mu-ƃelai pɔ́ a gɛ́ɛ dí íwooi ƃó kpɔ́ a lii-kpele pere. 30Íyee sã̀a í nûa ƃálo, í ŋɛi kɛ́-maa-ŋa da mɛni kpaya-kpaya-ŋa kɛ́ Íyee mu-nuu maa waai Zîsɛ Kôrai láai sui.” 31Ɣâla fɛ́liɛɛ dîɛi, ƃɛ́i dí kɛ̀ a díŋaa tɛ́ɛ naa gîe mai naa è tùmo díkelee kpɔ́ dílaa è fɛ́ɛ a M̀ɔlêŋ Maa Waai dí Ɣâla ŋɔwóoi ƃó a lii-kpele pere.
Ǹaa-laa-ƃelai kɔ̃liŋ è kɛ̀ a díkîe-ni pɔ́ɔ
32Nàa-laa-ƃelai dí kɛ̀ zu tɔnɔ da dímɔ̂leŋ. Núu tɔnɔ da kpîŋ fé m̀ó ní a gɛ́ɛ zãâi kɛ̀ ǹyêei, bɔ́ɔ è kɛ̀ a da, kɛ́lɛ, díkɔ̃liŋ kélee è kɛ̀ a díkîe-ni pɔ́ɔ. 33Zia-ƃelai dí Kúnuu-namui Zîsɛ ŋɔmu-siɣe saa-yeei maa sêre-faa kɛ̀ a wála-wala-laa. Ƃɛlɛ-sêe kɛ́tɛ è kɛ̀ díkelee dîa. 34Núu da kélee fé kɛ́ ní dísama nyíi sɛŋ mɛni gbaaŋ è kɛ̀ a doɔɔ mai. Diai kélee lɔii è kɛ̀ díyêei da pɛrɛ-ŋai, dí díkɔ̀lɛ dí pá a zɔ̃ɔ, 35dí bu zia-ƃelai ŋɛ́i. Nya ƃe dí ŋáa kɔlɛ diai dîa kɛ̀ mɔ̃lɛ̂i. 36Zosɛ nyíi zia-ƃelai dí ǹáa sèe a Banaba (zu-kulâi ƃa lii-lɔ-loŋ), nyíi kɛ̀ a Liiva-nuui, bɔ́-taai kɛ́ ƃò a Sapɔrɔi, 37è ŋɔlɔii gbua kɔ̀lɛ, é pá a zɔ̃ɔ é bú zia-ƃelai ŋɛ́i.
Currently Selected:
Zia-ƃelai Kɛ́-mɛni-ŋai 4: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
