Zia-ƃelai Kɛ́-mɛni-ŋai 27
27
Pɔ̂ɔ e yá ŋá-keleŋ sìɣe Luŋ mɛni ma
1Tãi e nâa kpɛ̀tɛ la a gɛ́ɛ ku yá ŋá-keleŋ siɣe ku li Etele, dí Pɔ̂ɔ da pelesinɛi da kpɛni-ŋa tɛ̀ɛ kɔkuluƃa-kpului, da kâa dòli a Agɔtɔɔ, m̀ɛi-nuui pɔ, nyíi da kâa dòli a Zûliɔi. 2Ku pìli yá ŋá-keleŋ su, nyíi kùla Adulamatuŋ. Géleŋ ŋí è kɛ̀ nâa mu siɣêi a gɛ́ɛ é lí Eesia-keleŋ-pîlanii-ŋai dîa díkaa ǹyái koo mai. Nya ƃe, ku pìli nâa ǹyái ŋá kúkɛ li. Kwa Ɛresitakɔ-ni ƃé kɛ̀ pâi, nyíi kɛ̀ a Masadonia-nuu Tɛsɛlonaika-lɔii sui. 3Bôlu ma-ɣelei ku sèri Sidɔŋ; Zûliɔ e Pɔ̂ɔ sòŋ a ǹɛ́lɛɛ naa, e ǹɛɛ naa a gɛ́ɛ é lí ŋɔwɛli-ƃelai pɔ naa dí maa-mɛni kɛ́. 4Ku kúlaa naai, ku pìlaŋ Sapɔrɔ mu-pere, kpɛ́ni fêi, ku kɛ̀ vãai ŋɛi nyɔ́mɔɔ ma-pere. 5Tãi ku Sɛlisia da Paŋfîlia-yai tiyeŋ lai, ku pà Maira, nyíi kɛ̀ a Lasia taa-leei. 6Nàa ƃe gɔkuluƃa-kpului mɛi-nuui è yá ŋá-keleŋ kàa naa, nyíi kùla Alezaŋdura gɛ li Etele. Nya ƃe e kúpìli zu. 7Géleŋ e sìa a maa tinaŋɔɔ a ɣele kûu támaa. Ku mɛni-soli kàa ziai ŋí su é lɛ́ɛ la zu ku seri Sinaidɔ kɔlɛ ma. Vãai fe kúlɛɛ ni naa ku li a bere sã́ai, nya ƃe ku pìlaŋ Kulîi, Saamone kɔlɛ ma. 8Ku kúlaa naai, ku ŋɔ́nɔ mɛni-soli kàa ǹyái ŋá, é lɛ́ɛ la zu ku pá kwaa da ma, nyíi da kâa nâa toli a Fɛɛ Éevɛ̀ŋ, Lasia-taai kɔlɛ ma.
9Tãi támaa e nâa tɛ̀ɛ, ǹyá-ŋa-siai e kɛ́ a mɛni kpɔ̂lu-sia, kpɛ́ni fêi, zɔnyɔ̂ŋ su mɛni lɛ̀ɛ kûui ŋɔsuŋ-ŋá tée tãi è nâa tɛ̀ɛ. Nya ƃe Pɔ̂ɔ e dília-woo ƃò, 10ǹyɛɛ diai, “Nûa, ńaâi la a gɛ́ɛ ziai ŋí a pâi kɛ̂i a mɛni kpɔ̂lu-sia da mɛni su-karaa támaa. Zãâi da géleŋ dia tɔnɔ nɔ́ fei, kɛ́lɛ, kúfulu-laai.” 11Kɛ́lɛ, kɔkuluƃa-kpului mɛi-nuui e ŋ̀óli tɔ̀ɔ géleŋ-kɛ-nuui ma da géleŋ-namui a gbanaŋɔɔ é tɛ́ɛ Pɔ̂ɔ ma. 12Kpɛ́ni fêi, géleŋ-pîlanii fe kɛ́ ni a ǹɛ́lɛɛ a gɛ́ɛ ku tãi támaa siɣe naai, ǹúui dámaa-ɣele dí kúlia-woo ƃo a gɛ́ɛ ku kúla naa, ɣele da ku seri Fonɛ ku tûa naa. Fonɛ káa a kéleŋ-pîlanii Kulîi mɛni ma, nyíi ŋ̀ɛi tínaŋɔɔ̂i voloi kulâi-pere, kɔɔ-yee da laa-mii-yee mɛi-perei.
Fãa kɛ́tɛ è tɛ̀ɛ ǹyái ŋá
13Vãa su-saai siɣeɛ seɣai, dí kɛ̀ gâai a gɛ́ɛ dímɛni-kpɛtɛɛi a pâi lɛɛ̂i ma. Nya ƃe dí géleŋ fùloŋ dí tɛɛ a Kulîi kɔlɛ ma-pere. 14Kɛ́lɛ, nàa fe tûa ni díkɛ píli fãa su kpanaŋɔɔ su, nyíi da káa dòli a Voloi-kulai pere kwara-perei, gɛ̀ siɣe zîŋ ma-pere. 15Géleŋ soŋɔɔ vãai mii, ve ŋɔ́nɔ pɔ̂ri ni siâi, kpɛ́ni fêi, è kɛ̀ vãai ŋɛi nyɔ́mɔɔ ma-pere. Nya ƃe ku vãai lɛ̀ɛ naa e li a géleŋ ƃɛi-pere è kɛ̀ liî lai. 16Kúkɛɛ yenîi ǹya-tiŋ kwára, nyíi da kâa dòli a Kɔɔdai, kú mɔ̃lɛ a dámaa a gɛ́ɛ kú géleŋ-loŋ kpulɔ̂ŋ géleŋ kɛ́tɛi ma. 17Ŋ̀iriɛɛ kûɛi, dí ɣɛli tɛ̂ɛ géleŋ kɛ́tɛi mu dí ŋ̀iri. Dí kɛ̀ yaôi a gɛ́ɛ tãi da, da pâi liî ŋɛyãai ma da kɛ̂ ma Seyɛti. Nya ƃe dí géleŋ ŋɔfãa-seɣei ŋá yèŋ dí nàa ǹɛɛ naa e li. 18Bôlu ma-ɣelei vãai kɛ́ɛ nɔ́ niî a zu kpanaŋɔɔi, dí pɛlɛ zãâi da kúlaa ma géleŋ su díkɛ bili ǹyái su. 19Ŋele-kuui zaaƃa-ɣelei ku zãâi kpéli-ŋai da-ni kùla a kúyee kúa kpîŋ ku bili ǹyái su. 20Vãai è kɛ̀ tɛɛ̂i kpɔ́ a dámaa, kúfa fólo kàa kpaa máŋ pɛmɛlɛŋ-kao ɣele kûu támaa yee mu. A gɛɛ kwa pâi ƃálôi, maa-kili è kùla kúŋa.
21Ɣele támaa kɛ́ɛ a tɛɛ dífe mii-sɛŋ mii, Pɔ̂ɔ é síɣe e tɔ́ɔ dísama, ǹyɛɛ diai, “Ńûa, kâi pɔ̂ri káwoli tɔɔ̂i mâ a gɛ́ɛ káfè kùla Kulîi káfe lâa mɛni-kpɔ̂lui ŋí káa la da mɛni su-karaai. 22Ŋa nàa môi káa a gɛ́ɛ ka kálii kpéle; kpɛ́ni fêi, núu da kélee fe pâi ŋɔfúlu-laai lánîi kásama, fɛ̂ɛ nɔ́ géleŋ. 23Kpɛ́ni fêi, Ɣâla, nyíi bɔɔ ƃa ńyãai, nyíi ŋɔ́nɔ ŋa vɛlii, ŋɔkélai e tɔ̀ɔ ŋ́ɛi sâa gbínii su, 24ǹyɛɛi, ‘Pɔ̂ɔ, ífe yào; fɛ̂ɛ nɔ́ í tɔ́ɔ Gâloŋ Siizɛ ŋɛi tuɛ; Ɣâla a diai kélee lɛ̃wo tɛɛ ípɔ ka dîa-ni kákaa géleŋ sui.’ 25Mɛni ma, ka kálii kpéle ŋánûa, kpɛ́ni fêi, ńaâi a Ɣâla a gɛ́ɛ mɛni-ŋai kélee da pâi kɛ̂i yɛ̂ɛ berei e mò la ḿâi. 26Kpɛ́ni fêi, géleŋ a pâi pûi a kúa tîŋ tɔnɔ su.”
27Kɛ́lɛ, tãi gbínii buu kao feerɛi è seri lai, géleŋ kɛ́ɛ Eêduiya-yai tiyenii a kúai, è kɛ̀ yɛ̂ɛ kpini-sama géleŋ-kɛ-ƃelai díkili-ŋa-siai e mò dîa a gɛ́ɛ da kɛ́ lɛɣɛ̂i lɔii ma. 28Dí ǹyái ŋɔsiŋɔɔ kɔ̀ɔŋ gɛ ƃo a waaŋ buu feerɛ; dí liɛ́ɛ tuɛ-pere a guroi, dí ŋɔnɔ gɔ́ɔ̂ŋ gɛ ƃo a waaŋ puu kao lɔ́ɔlu. 29Dí nâa kɛ̀ yáôi a gɛ́ɛ kúfa lâa tɛ́ la kɔni ŋá. Nya ƃe dí géleŋ kpera-kɔlii ǹáaŋ pìli ǹyái su géleŋ polu-pere a gɛ́ɛ dí kpera naa dí Ɣâla fɛli ŋele-ƃɔɔi mɛni ma. 30Géleŋ sia-ƃelai dí kɛ̀ pâi kulâi géleŋ su díƃarâai tɛ̂i dí li. Nya ƃe dí géleŋ-loŋ yeŋ ǹyái ŋá yɛ̂ɛ ǹyaa ƃe dí kɛ̀ pâi géleŋ kpera-sãai da toôi ǹyái su géleŋ tuɛ-pere. 31Nya ƃe Pɔ̂ɔ e mò kɔkuluƃa-kpului mɛi-nuui ma da ǹɔii maa kpɛ́-ƃelai, ǹyɛɛi, “Fɛ́ɛ ǹûai ŋí dí lɛɛ géleŋ su, à wàla kɛ́ ti káfe pâi ƃálôi.” 32Nya ƃe ǹɔii maa kpɛ́-ƃelai dí géleŋ-loŋ ɣɛli tèe ma e li.
33Ɣele kɛ́ɛ5 pâi ƃɔ́i, Pɔ̂ɔ è lòno díkelee pɔ a gɛ́ɛ dí mii-sɛŋ mii. Nyɛɛ diai, “A nâa kɛ́ a ɣele kûu puu kao náaŋ kakɛ maa-kpɛŋ kɛ̀ káfe mii-sɛŋ mii. 34Mɛni ma ŋa lônoi kápɔ a gɛ́ɛ ka mii-sɛŋ mii; kpɛ́ni fêi, ǹyaa ƃa kákponôi-kpanaŋ, kpɛ́ni fêi, ka ŋuŋ-leɣa dɔnɔ kpîŋ fe pâi kulâi káŋûa.” 35Tãi e nyíŋi ƃô lai, e kpólo siɣe e Ɣâla sɛɣɛi fe díkelee díŋɛi. E nâa zu-ɣale e pɛ́lɛ miɛɛ ma. 36E nâa kɛ̀ ti, díkelee dílii e kpèle dí dílaa mii. 37Kúai kɛ̀ géleŋ sui, ku kɛ̀ a núu ŋuŋ feerɛ pôlu buu lɔ́ɔlu mɛi feerɛ kao lɔ́ɔlu mɛi da. 38Tãi nâa dí dílaa mii la dí pelâi, dí nâa mɔlɔŋ pìli ǹyái su a gɛ́ɛ géleŋ e foɣâŋ.
Ǹyá ŋá-keleŋ e pù
39Ɣele ƃɔ́ɔi, dífe ǹɔii maa kpɛɛ ni, kɛ́lɛ, dí ya-woŋo tɔnɔ kàa sîŋ ŋá kɛ́ ƃo ma. Nya ƃe dí gbɛ̀tɛ díkili ŋá a gɛ́ɛ à kɛ̀ da pɔ̂ri pâi naa a géleŋ. 40Nya ƃe dí géleŋ-kpera-sãai kélee ɣɛli tee ma dí lɛ́ɛ ǹyái su. Dí ŋɛlii fúloŋ máŋ nyíi kɛ̀ géleŋ-sia-sãai mai. Nya ƃe dí géleŋ ŋɔfãa-seɣei maa tɛ̂ dí dínâŋ nya-woŋoi ŋɔsîŋ ma-pere díkɛ li. 41Tãi dí sèri la ǹya-tãaŋ lai, géleŋ e kànaŋ ŋɛyãai ŋá. Duɛ-pere e kànaŋ ŋɛyãai su ve pɔ̂ri ni siâi. Ǹyái e nâa kɛ̀ bôlu-pere lókwâi gɛ́ ŋolo. 42Nya ƃe ǹɔii maa kpɛ́-ƃelai dí gbɛ̀tɛ a gɛ́ɛ dí pelesinɛ-ŋai kélee páa a gɛ́ɛ dífa lâa ǹyái ŋá kɛ́lɛ la dí díyeŋ dí pu; 43kɛ́lɛ, Gɔkuluƃa-kpului mɛi-nuui è kɛ̀ ŋ̀wɛ̂lii e Pɔ̂ɔ ƃalo, nya ƃe e ǹɔii maa kpɛ́-ƃelai dímɛni-kpɛ́tɛɛi kpèra. E mò a gɛ́ɛ diai kélee da pɔ̂ri yá ŋá kɛ́lɛ̂i, dí tóo ǹyái ŋá fulɔi dí li zîŋ ma, 44ǹúui kpeli-ŋai dí sée wuru kpua-ŋa mɛi, kpaa máŋ géleŋ ƃéla kpua-ŋa. Nya ƃe, è kɛ̀ ti, díkelee dí tɛ̀ zîŋ ŋá a díƃaloɔ.
Currently Selected:
Zia-ƃelai Kɛ́-mɛni-ŋai 27: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
