Zia-ƃelai Kɛ́-mɛni-ŋai 10

Pitɛ da Kɔniliɔ

1Nalôŋ tɔnɔ è kɛ̀ Sɛsɛria. Ǹáa ƃé kɛ̀ a Kɔniliɔ. È kɛ̀ a lɔii maa kpɛ́-ƃela mɛi-nuu. È kɛ̀ Etele lɔii maa kpɛ́ nuu kpului tɔnɔ láa túɛ. 2Ǹalôŋ ŋí è kɛ̀ kpɔ́ a Ɣâla mɛni kɛ́-nuu. Da ŋɔpɛ́rɛi mu-ƃelai kélee dí yào Ɣâla ma. È kpɔŋ-maa támaa tɛ̀ɛ nûa pɔ́. A kâa Ɣâla fɛ̀li a ɣele kélee. 3Zĩa è tɛ̀ɛ la a folo-maa-laa tɔnɔ da. Ɣâla-taa-kela tɔnɔ è pà bɔ́ zĩai su é dóli, ǹyɛɛ mài, “Kɔniliɔ.” 4Kɔniliɔ kɛ́ɛ a ŋ̀ɛ́i kpamo mài, è yào, ǹyɛɛi, “Lé ƃe, Kúnuu-namui?”

Ŋ̀âla-taa kelai ǹyɛɛ mài, “Íɣâlai a ífɛli-wooi mɛni da íkpɔŋ-maai kɛ́ pere maa mɛni. A gbɛtɛ a gɛ́ɛ é íwoo su too. 5Nûa tɛɛ lônii ma Zapa a gɛ́ɛ dí Samaŋ tóli nyíi ǹáa kpeli ƃa Pitɛi. 6Gáa Samaŋ ŋɔpɛ́rɛi lá yúo kɔlɛ ma, nyíi gáa a zua-kɔlɔ paa-nuui.” 7Ŋ̀âla-taa kelai liɛɛ, nyíi lòno Kɔniliɔ pɔi, Kɔniliɔ e ǹyee-mu-ƃelai veerɛ tòli da Ɣâla-mɛni kɛ́-kɔkuluƃa tɔnɔ nyíi è gùla ǹyee-mu-ƃelai sámai. 8M̀ɛni-ŋai ŋí kélee su kúlaa mi dîɛi, è dítɛ̀ɛ Zapa.

9Díkɛɛ liî a bôlu ma ɣelei dí lɛ̀ɣɛ Zopai, Pitɛ è tɛ̀ bɛ́rɛi tôŋ su a volo tɛ́ɛ ŋuŋ-mai a gɛ́ɛ e Ɣâla fɛli. 10Puru è gɛ̀ kpɔ́ a ŋ̀ánaa gɛ́ ŋ̀wɛli é sɛŋ da mii. Díkɛɛ ŋɔmii-sɛŋ kpɛtɛ̂i, zĩa è tɛ̀ɛ la, 11é ŋ̀ele-kɔlɔŋ kàa ǹá ƃóɔɔ, sɛŋ da é kúla naa gɛ́ yèŋ ǹɔii ma yɛ̂ɛ seɣe su kɛ́tɛ. Zɛŋ ŋí kɛ́ɛ yenîi, ŋ̀óli è kɛ̀ ma náaŋ gélee tɛ́ɛ ŋ̀elei su-pere, zu kɛ́ ƃo ma yɛ̂ɛ kpɔ̂lɔ. 12Sua sîi kélee è kɛ̀ zɛŋ ŋí su, ɣâla-sãa, tɔara-sãa, da ŋɔni-ŋa. 13Nya ƃe wóo è pà bɔ́, ǹyɛɛ mài, “Pitɛ, ímu siɣe í da paa í mii.” 14Kɛ́lɛ, è mò mà, ǹyɛɛi, “Vé ti, Kúnuu-namui, kpɛ́ni fêi, fé niî mii-sɛŋ da kélee mii ní nyíi ƃâa fé ma, maa fé waa níi.” 15Nya ƃe ŋ̀óoi è ŋɔ́nɔ pà bɔ́ a veerɛ ɣelei, ǹyɛɛ mài, “Sɛŋ nyíi kélee Ɣâla a maa waai, ífe ziɣe a sɛŋ ƃâa fé mai.” 16Nyíŋi è kɛ̀ a tãi saaƃa. Nya ƃe zɛŋ zua sîi-ŋai dí kɛ̀ zui, è tɛ̀ kpɔ́ pôlu a maa félaa ŋ̀ele-kɔlɔŋ su.

17Pitɛ kɛ́ɛ kɛ̀ gíli ŋá siâi zĩai ŋí su-kúlai mai, ǹûai Kɔniliɔ dítɛ̀ɛi dí pà dí tɔ́ɔ gónaŋ lá. Dí Samaŋ ŋɔpɛ́rɛi mare-kɛɛ kɛ̀, dí lí naa. 18Dí mare-kɛ̂ɛ kɛ́ à kɛ̀ Samaŋ, nyíi da dòli a Pitɛi, è kɛ̀ naa. 19Pitɛ kɛ́ɛ gíli ŋá siâi zĩai ŋí su-kulâi mai, M̀ɔlêŋ è mò mà, ǹyɛɛ, “Tɔɔ, núu saaƃa káa íkɔ̂rii. 20Ímu siɣe í pîlaŋ, ka dîa-ni ka lí í kpera íkili ŋá siâi kpɛni-kpɛni, kpɛ́ni fêi, ńyãa ƃé dítɛ̀ɛ.” 21Nya ƃe Pitɛ è pìlaŋ é lí ǹûai ŋí pɔ́-naa Kɔniliɔ è dítɛɛi, ǹyɛɛ dîai, ǹyɛɛi, “Ńyãa ƃa ǹúui ka gɔ̂rii. Ká pà lé mɛni ma?” 22Dîyɛɛ mài, “Kɔniliɔ, nyíi gáa a ǹɔii ma kpɛ́-ƃelai mɛi-nuui, ƃé kútɛ̀ɛ. Gáa a núu lɛ́lɛɛ, gɛ́ yao Ɣâla ma. Ƃaa kɛ́-maa káa Zûu-ŋai yêei m̀ɛni ma. Ǹyaa ƃé Ɣâla-taa-kela maa waa è mò mà a gɛ́ɛ é ítoli ŋɔpɛ́rɛi lá é íwoo mɛni.” 23Nya ƃe è lì a dia bɛ́rɛi mu é dílaâi kula. Bôlu ma ɣelei è mù-siɣe da dîa-ni dí lí. M̀arâai da-ni dí kùla Zapai da dîa-ni dí li máŋ. 24Ɣele ƃɔ́ɔi dí sèri Sɛsɛria. Kɔniliɔ è kɛ̀ dímaa kpɛnîi. E ŋɔnûai ŋá tɛ̀ gîe ma da ŋɔwɛli kɛ́-maa-ƃela kpîŋ-ŋai. 25Pitɛ lɔ́ɔ bɛ́rɛi mui, Kɔniliɔ è gàa é pɛ́lɛ gɔ́ɔ mu é vɛli. 26Kɛ́lɛ, Pitɛ è mù-siɣe è dɔ̀ɔ, ǹyɛɛ mài, “Ímu siɣe í tɔ́ɔ. Ńyãa máŋ ŋ́gaa a núu-kpune.” 27È lɛ̀ɛ lônoi bɔ́, dí lɔ́ bɛ́rɛi mu. È núu támaa kàa díŋa tɛ́ɛ ma. 28Pitɛ è mò dîa, ǹyɛɛi, “Káa kpîŋ ka gɔ́lɔŋ berei vé la dɔ̂ŋ lá-wooi ma a gɛ́ɛ Zûu-nuu da lɔii da kpɛni su-ƃela dí nɛ̃ɛ, kpaa máŋ é dínaa káai. Kɛ́lɛ, Ɣâla a ǹɛ ḿâ a gɛ́ɛ fé núu kélee sìɣe a ǹúui ƃâa fé mai, kpaa máŋ a ǹúui maa fé waa níi. 29M̀ɛni ƃé dí ŋ́orɛ̂ dîɛi, fé sîa too ní, ŋá pà. M̀ɛni ma, ká ńdòli lé mɛni ma?”

30Kɔniliɔ ǹyɛɛ mài, “Fólo saaƃa tɛ̂ɛi pôlu ma, ŋá kɛ̀ Ɣâla fɛlîi ŋápɛrɛi mu a vólo maa láai a tãi kɛ́ɛ ŋí nɔ́. Nalôŋ tɔnɔ è kɛ̀ tɔ̂ɔni ŋ́ɛi tuɛ ŋɔseɣei kɛ́ folo. 31Ǹalôŋ ŋí è mo ḿâ, ǹyɛɛ, ‘Kɔniliɔ, Íɣâlai a ífɛli-wooi mɛni da gbɔŋ mâai yâ gɛ̂i maa tuŋ. A pá ífɛli-wooi su-toôi. 32M̀ɛni ma, worɛ̂ tɛɛ Zapa Samaŋ pɔ́-naa ǹáa kpéli ƃa Pitɛi. Gáa zua-kɔlɔ paa-nuui Samaŋ ŋɔpɛ́rɛi lá yúo kɔlɛ ma.’ 33Nya ƃe ŋá íworɛ̂ tɛ̀ɛ kpɔ́ a maa félaa, ǹyaŋ í gɛ̀ kpɔ́ a ǹɛ́lɛɛ í pa. M̀aa mɛni ma kúkelee kúkaa ƃɛ́ Ɣâla ŋɛ́i-tuɛ a gɛ́ɛ kú m̀ɛni-ŋai mɛni Ɣâla a m̀ó yâi.”

Pitɛ è lòno Kɔniliɔ ŋɔpɛ́rɛi mu

34Pitɛ è pɛ̀lɛ lônoi, ǹyɛɛi, “Tɔ̃yâ ma, ŋá gɔ́lɔŋ a gɛ́ɛ Ɣâla fa núu su ɣɛɛ. 35Kɛ́lɛ, ǹúui kélee à yâo Ɣâla ma lɔii kélee sui, gɛ́ tûa-pere lɛ́lɛɛ kɛi, Ɣâla a ǹyée sèe maa nuui mu. 36Ŋ̀orɛ̂-wooi è dɛ̀ɛ Eezuɛ-ŋai pɔ́ naai, ǹyaa ƃa lii-sêe maa mɛni ƃóɔɔ Zîsɛ Kôrai sârai, nyíi gáa a Duŋ Lɛ́lɛɛi. Ǹyaa ƃé gáa a núu kélee ǹâmu. 37Ká ŋ̀orɛ̂-wooi kɔ́lɔŋ nûa mò Zuda gwaa kéleei. Gɔ́ɔ è pìlaŋ Galalii Zɔ̂ŋ ŋɔɣâla-woo ƃóɔɔi é pîlaŋ batâi mɛni ma pôlu ma. 38Ɣâla è lɛ̀ a M̀ɔlêŋ Maa waai pù Nâzarɛ Zisɛi kponôi é wála-wala tɛ̀ɛ bɔ́. È kɛ̀ liî a mɛni lɛ́lɛɛ kɛ́ɛ, gɛ́ diai ƃàlo Dɛ̂ƃele è kɛ̀ díkponôi, kpɛ́ni fêi, Ɣâla è kɛ̀ bôlu. 39Kúkaa a sêre-ŋa mɛni-ŋai ŋí kélee mɛni ma è gɛ̀ Zûu-ŋai dílɔii su da Zerusâlɛŋ. Dí bàa a zɛlɛŋɔɔ wúru ma. 40Kɛ́lɛ, Ɣâla è Zisɛi ŋí mu sìɣe saa yêei a ŋ̀ele kûui zaaƃa ɣelei é ǹɛ́ ǹûai dîa. 41Vé ǹɛ́ ní núu kélee ma, kɛ́lɛ, è ǹɛ kûa, kúai è kúlɛ̀ a sêre-ŋai. Kwa dîa-ni kú kúlaa mìi gîe ma ŋɔmu-siɣeɛɛ saa yêei pôlu ma. 42È kúkɛ̀ a gɛ́ɛ kú Ɣâla woo ƃó ǹûai dîa kú ŋɔ́nɔ Zîsɛ maa sere-faa kɛ́ a gɛ́ɛ ǹyaa ƃé Ɣâla è zèe a gɛ́ɛ é kɛ́ a m̀ɛni ŋá-tee-nuui vúlu-ƃelai da zaa-ƃelai mɛni ma. 43Ɣâla ŋɔlóno kɛ́-ƃelai kélee da m̀aa sêre-faa kɛ̀ a gɛ́ɛ ǹúui à làa lai zu mɛni a pâi lɛɛ̂i ŋɔsɔnyɔ̂ŋ mɛni ma ǹyaa Zîsɛ láai sârai.”

Zɛ̃tai-ŋai dí M̀ɔlêŋ Maa Waai sɔlɔ ƃô

44Pitɛ kɛ́ɛ niî mɛni-ŋai ŋí ƃôi, diai m̀ɛnii, M̀ɔlêŋ Maa Waai è pà dípɔ. 45Zûu-ŋai laa-la è kɛ̀ díyêei, nyíi-ŋai da Pitɛ-ni dí pâi, díla è kpàla dîa, kpɛ́ni fêi, M̀ɔlêŋ Maa Waai è pà Zɛ̃tai-ŋai pɔ́ máŋ a sama-sɛŋ. 46Dí díkàa lônoi a sîi-woo da kpɛni-ŋa díkɛ díwoo mɛni, díkɛ Ɣâla ŋɔkɛ́tɛ-laai maa mɛni ƃo. Nya ƃe Pitɛ è mò, ǹyɛɛi, 47“Ǹûai ŋí dia máŋ daâ M̀ɔlêŋ Maa Waai sɔlɔ ƃó nɔ́ yɛ̂ɛ berei kú zɔlɔ ƃò lai. Núu da a pɔ̂ri kúkperâi a gɛ́ɛ kúfe díbatâi kɛ a yá?” 48Nya ƃe è díbatâi kɛ̀ Kúnuu-namui láai su. Dí m̀are kɛ́ a gɛ́ɛ è lɛ́ɛ naa a ɣele kûu kpɛ́-kpɛɛ.

Currently Selected:

Zia-ƃelai Kɛ́-mɛni-ŋai 10: KWB

Highlight

Copy