Kɔlɔnikɔ Veerɛi 1
1
Saloma è Ɣâla marê kɛ̀ táre mɛni ma
(Kâloŋ-ŋa Maa-ŋuŋ 3:1-15)
1Deeƃé ǹóŋ Saloma è kɛ̀ kpɔ́ a dɔɔ̂i kpanaŋɔɔ ŋɔkâloŋ-laai su, kpɛ́ni fêi, Ŋɔɣâlai Yâwɛɛ è kɛ̀ bôlu é gɛ́ a núu kɛ́tɛ maa pɔlɔ-pɔlɔɔ.
2Gâloŋ Saloma è lòno Eezuɛ-ŋai kélee pɔ́. È lòno diai kɛ̀ ǹúu wála támaa-ŋai da diai kɛ̀ núu ŋuŋ tɛi-tɛi-ŋai mɛi pɔ́. È ŋɔ́nɔ lòno m̀ɛni-sâa ƃó-ƃelai, Eezuɛ láa túɛ-ƃelai da ǹúu-suu-ŋai mɛi-ƃelai pɔ́. 3Ǹaa kɛ́ɛ tíi, Saloma da ǹûa kélee dí lì Giƃiyɔŋ Ɣâla ŋɔsua kɔlɔ-seɣe-pɛrɛi lá Ɣâla ŋɛ́i tuɛ, Yâwɛɛ ŋɔtíi kɛ́-nuui Mose ƃé wɔ́lɔ dɔ̀ɔ vɛ̃ɛ-kpâlaŋ sui. 4Deeƃé è wɔ́lɔ Ɣâla Ŋɔkpanaŋ-woo-kɛ́ɛ maa Gãlai kùla Kiria-Zeriŋ é pá la é zèe Zerusâlɛŋ, kpɛ́ni fêi, ǹaa ƃé è wɔ́lɔ seɣe-pɛrɛ tɔɔ naa maa mɛni ma. 5Kɛ́lɛ m̀ara ɣala-teƃelei Uɔɔ ǹóŋ Uri ǹóŋ Bezale è wɔ́lɔ dɔɔi è kɛ̀ niî Giƃiyɔŋ Yâwɛɛ ŋɔsua-kɔlɔ seɣe-pɛrɛi ŋɛ́i-tuɛ. Nya ƃe Saloma da ǹûai kélee díkɛ̀ Ɣâla fɛlîi naa. 6Saloma è lì tuɛ-pere m̀ara ɣâla-teƃelei mâ Yâwɛɛ ŋɔsua-kɔlɔ-seɣe pɛrɛi lá Ɣâla ŋɛ́i tuɛ é taa-tulɛ wála tɔnɔ (1,000) pàa naa é díkula a kéreŋ sala ŋ̀âla-teƃelei ŋá.
7M̀aa kpinii tí, Ɣâla è kùla Saloma ŋɛ́i é mó mà ǹyɛɛi, “Ḿarê kɛ́ sɛŋ kélee mɛni ma nyíi ya ŋ̀wɛ̂lii a gɛ́ɛ ŋá dɛ̀ɛ ípɔi.”
8Saloma è Ɣâla wóo su tòo ǹyɛɛ mài, “Ya ńâŋ Deeƃé ŋɛ́i-maloŋ káa kpɔ́ a dámaa. Ya ńɛɛ bɔ́ɔ ŋá a kâloŋ. 9Óo Yâwɛɛ Ɣâla, tɔɔ gono-teei í wɔ́lɔ gɛ̀ ńâŋ Deeƃé yêei ŋ̀aa-see é kɛ́. Yaâ ŋ́gɛ a kâloŋ ǹûai mɛi. Dítâmaai yɛ̂ɛ muluŋ nyíi núu da fa pɔri ǹônoi. 10Ye táre da mɛni-ŋa káa tɛ́ɛ ḿbɔ a gɛ́ɛ ŋá ǹûai ŋí mɛi káa la, kpɛ́ni fêi, fa pɔ̂ri ínûa kpulu kɛ́tɛi ŋí mɛi kâai a kɛ̀ táre da mɛni-ŋá káa fé ńyêei.”
11Ɣâla è mò Saloma ma ǹyɛɛi, “M̀ɛnii ŋí káa a íkpɔɔi kili-ŋa sia. Ífe ḿarê kɛ́ ní tɔɔ-laa, tɔɔ-sãa da ƃaa kɛ́-maa kpaa máŋ í ḿarê kɛ́ a gɛ́ɛ ŋá íkpɔara-ƃelai páa, kpaa máŋ í ḿarê kɛ́ a gɛ́ɛ ŋá ífulu-laai su kôyaa, kɛ́lɛ í ḿarê kɛ̀ a gɛ́ɛ ŋá táre da mɛni ŋá-kaa tɛ́ɛ ípɔ a gɛ́ɛ í ŋánûai ŋá dítɛ̀ɛ ípɔi mɛi káa lai, 12táre da mɛni ŋá-kaa da pâi kɛ̂i a ípɔɔ. Ŋa pâi tɔɔ-laa tɛɛ̂i ípɔ, íkɔ̃liŋ su é kɛ́tɛ, ƃaa kɛ́-maa kɛ́ ƃò nûa yêei ímɛni maa a zu-kɛ́tɛ é tɛ́ɛ diai dîa kâloŋ-laa kɛ̀ ítuɛ-perei, kpaa máŋ nyii-ŋai pâi kâloŋ-laa kɛ̂i ípôlu mai.”
Saloma ŋɔtɔɔ-laai da ŋɔwála-walai
(Kâloŋ-ŋa Maa-ŋuŋ 10:26-29)
13Nya ƃe Saloma è kùla Giƃiyɔŋ ƃɛ́i è kɛ̀ naa Ɣâla ŋɔsua kɔlɔ-seɣe pɛrɛ lá Ɣâla ŋ́ɛi-tuɛi é lene pôlu é lí Zerusâlɛŋ ƃɛ́i è kɛ̀ naa a Eezuɛ-ŋai kélee díkâloŋ. 14Saloma è kɔ́ kɔ́-keleŋ da soo támaa ŋáa tɛ̀ gîe ma. Gɔ́ kɔ́-keleŋ-ŋai kɛ̀ ǹyêei gélee è kɛ a kéleŋ wála tɔnɔ, ŋ̀uŋ náaŋ (1,400), soo wála puu káo feerɛ (12,000). È géleŋ da-ni tɛ̀ɛ daa-lêe-ŋai su é lí a gbéli Zerusâlɛŋ ƃɛ́i è kɛ̀ naai. 15Saloma kɛ́ɛ a kâloŋ, káne da gôo maa mɛni fé kɛ́ ní a ŋ̀wálaa Zerusâlɛŋ. Dí kɛ̀ kpɔ́ a dítamaa yɛ̂ɛ kɔni-kayaŋ. Sakɛmo wuru maa mɛni fé kɛ́ ní a gbanaŋɔɔ máŋ. Sîda wuru è kɛ̀ kpɔ́ a dámaa yɛ̂ɛ Sakɛmo wuru-ŋai kɛ̀ ǹyéei kwárai. 16Saloma è ŋɔsoo-ŋai yà Ize da Kuɛ. Gâloŋ ŋɔpɔni tɔɔ-ƃelai ƃé lì Kuɛ dí díya naa. 17Dí kɛ̀ kɔ́ kɔ́-keleŋ tɔnɔ yâi Ize a káne pãŋ puu-káo lɔ́ɔlu díkɛ soo tɔnɔ yà a káne pãŋ náaŋ. Dí díŋa kɔlɛ gâloŋ-ŋai kɛ̀ Ita-ŋai da Siria-ŋai dîa.
Currently Selected:
Kɔlɔnikɔ Veerɛi 1: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
