Tɛsɛlôniɛŋ Maa-ŋuŋ 3
3
1Mɛni ma tãi lii-kpele fe ŋɔnɔ kɛ́ ni la kúyêei a gɛ́ɛ ku kɛ́ káŋɛi pôlui, è kɛ̀ a kúnîa-mɛni a gɛ́ɛ kúfeerɛ ku lɛɛ pôlu Atɛŋ. 2Ku kúƃarâŋ Temete tɛ̀ɛ, nyíi gáa a Ɣâla yée-mu-nuu Kôrai ŋɔtuŋ lɛ́lɛɛi ƃó mɛni mai. Ku dɛ̀ɛ a gɛ́ɛ e kálaa-lai kpanaŋ e kalia-woo ƃo 3a gɛ́ɛ mɛni-kpɔ̂lu-ŋai ŋí fe kásiɣe pere ma. Káa kpîŋ ka gɔ́lɔŋ a gɛ́ɛ fɛ̂ɛ nyíŋi-ŋai dí kɛ́ a kúa. 4Tãi ku kɛ̀ la kákɔlɛi, ku mò kàa nàa tuɛ a gɛ́ɛ kwa pâi mɛni-kpɔ̂lu kâai; yɛ̂ɛ berei nɔ́ a kɛ́ lai, ǹyaŋ káa kpîŋ ka gɔ́lɔŋ. 5Nyíŋi mɛni ma tãi lii-kpele fe ŋɔ́nɔ kɛ́ ni la ńyêei, ŋá núu tɛ̀ɛ naa a gɛ́ɛ ŋa kálaa-lai kaa, kpɛ́ni fêi, ŋa kɛ̀ yáôi a gɛ́ɛ tãi da zu-kɔɔŋ-nuui a kákponôi kɔɔ̂ŋ a gɛ́ɛ tãi da kútii-kɛɛi a pâi kɛ̂i kpɛni-kpɛni.
6Kɛ́lɛ, Temete a nàa kula kápɔ naa a pá kúpɔ a tuŋ lɛ́lɛɛ kálaa-lai mɛni ma da káwɛli-kɛ-maai. A ŋɔ́nɔ m̀ó kûa a gɛ́ɛ kúmaa mɛ̂ni káa nɔ́ kákili ŋá a tãi kélee, ká kɛ́ ŋ̀wɛli ká kúkaa yɛ̂ɛ berei kwa ŋ̀wɛ̂lii la a gɛ́ɛ ku kákaâi. 7Nyíŋi mɛni ma, ŋánûa, kúkpaaŋ kélee da kúmɛni-kpɔ̂lui kélee su, kálaa-laai a kúŋaa nɛ̀nɛ kámaa-mɛni ma; 8ǹyaŋ kúkaa nâa fulu-laa su, à kɛ̀ kákaa Kúnuu-namui kponôi. 9Kwa Ɣâla sɛɣɛ̂i fè kámɛni ma, nii-nɛɛi kélee gáa kúkponôi kámɛni ma Ɣâla ŋɛi mɛni ma. 10Kwa Ɣâla fɛ̀li kámɛni ma é kúla kúlii su a kpini da folo a gɛ́ɛ kwa kaa-ni ku kúŋɛi pu gîei, zɛŋ ve kálaa-lai sui, ku dɛɛ kápɔ.
11Mɛni ma Kúnâŋ Ɣâla ǹyaa kpîŋ da Kúnuu-namui Zîsɛ Kôrai dí kútenîŋ tɔ̀ɔ kâa; 12Kúnuu-namui e káwɛli-kɛ-maai ƃɔ̀lɔ a zu kɛ́tɛ kákîe-ni mɛni ma da ǹúu-kpeli-ŋai yɛ̂ɛ berei ku káwɛ̀li lai, 13a gɛ́ɛ é kálii su kpanaŋ kámaa e waa kásɔŋ fè kɛ̀ kâa Kúnâŋ Ɣâla ŋɛi a tãi Kúnuu-namui Zîsɛ da ŋɔnûai da kɛ̂ pâi lai.
Currently Selected:
Tɛsɛlôniɛŋ Maa-ŋuŋ 3: KWB
Highlight
Share
Copy
Want to have your highlights saved across all your devices? Sign up or sign in
© 2012 Bible Society in Liberia
