Sof 1
1
Naa ruponiik i ruq'ijil noq naa ruye'em i rujosq'iil i QaJaaw Dios
1Re' i QaJaaw Dios je' wili i xuq'or reh i Sofonías: Noq xwihik chi reyil Judá i Josías rak'uun i Amón. Eh re' i Sofonías rak'uun i Cusi, re' Cusi rak'uun i Gedalías, re' i Gedalías rak'uun i Amarías, re' i Amarías rak'uun i Ezequías.
2Re' i QaJaaw Dios je' wili xuq'or: Re' hin naa nusacham kiwach chu'nchel i
xa chib'ih jariik wilkeeb' wach ak'al.
3Eh naa nusacham kiwach
i tinamit, taqe i chikop,
taqe tz'ikin kirupinik pan taxaaj,
taqe i kar wilkeeb' pam palaw.
Eh naa wo' nusacham kiwach
i yiib' wach kina'ojb'al, inki.
4Eh je' wo' chik wili i xuq'or:
Re' hin naa nuye'em taqe panti' k'axik i aj Judá,
je' wo' taqe i aj Jerusaleem.
Naa wo' nusacham kiwach i ruqox i kitiyoox Baal.
Naa wo' nusacham kiwach taqe
i k'amal kib'eeh aj tiij kikamanik chikiwach taqe re'.
5Eh naa nusacham kiwach taqe i kijohtik
chinaah i kipaat chulooq'jiik i q'iij, i poh, taqe ch'umiil.
Re' keh inkixuk'aa' kiib' chupahqaljiik
i rotob'il i kitiyoox Milcom, eh inkiq'or wo' i nub'ihnaal i hin.
6Eh naa nusacham kiwach taqe inkikanaa' nunimjiik,
taqe i ma' nkikapaaj ta nusik'ariik
ni xata chik inkipahqaaj kina'ojb'al weh, inki.
7Re' taq i hat matchoqik taq chik, chayohleej taq wach i QaJaaw Dios,
ruum re' reh xailook' chik i ruyeew chaloq i ti' k'axik.
Re' reh je' jinaj mayiij i naa ruye'em noq naa rukansam taq aatinamiit
i ki-ixowinik taq awach.
8Noq naa nuq'asam panti' k'axik i nutinamiit,
naa nuye'em taqe chutojariik i kimahk i k'amal kib'eeh.
Eh naa nusacham kiwach i rak'uun rixq'uun i kireey,
je' wo' taqe inkikoj itz'ihy inkikoj i ma' kinimanik ta weh.
9Eh naa nuye'em taqe i pan
ti' k'axik taqe aj war,
je' wo' taqe inkinujisaj chi xa chib'ih jariik i rupaat i ki dios
ruuk' taqe i xankelq'aaj chaloq, ruuk' chukuj q'orik, inki.
10Re' i Dios je' wili xuq'or:
Chupaam taqe i q'iij re' re' kow naakik'erem
kichii' chi chii' puerta ink'ayjik wii' kar.
Eh naa rib'irjiik chaloq i wilik wii' i rukab' ookb'al,
chi xa kichoqik chik noq naa kik'uliik iloq naah taq yuuq' i nixowanik kiwach.
11Naa taq ak'erem aachii' chi oq'ik i hat i wilkaat taq ma' najt ta ruuk' i ye'aab' Mactes,
ruum naa kikanteesjiik taqe i aj k'aay wilkeeb' taq chaxilak,
je' wo' chu'nchel i kich'aqwik wach tumiin.
12Eh chupaam taqe i q'iij re' re',
re' hin je' na naa nuqopom nuq'aaq'
chi kisik'ariik yiib' wach kina'ojb'al ar Jerusaleem.
Eh naa taqe nuye'em chutojariik i kimahk,
re' keh xa ch'iklik chik kik'ux, je' rukab' noq intuqlujik i vino, je' wili inkiq'or:
Re' Dios xama' xta wo' i neerub'an qeh, inki taqe.
13Xanaah re' naa ruq'uchariik i chib'ih keh,
naa wo' ruyojariik i kipaat.
Eh re' i kipaat naa kiyejaam xama' naa ta wo' kipatinik chupaam,
re' i ki uuva naa kitikim xama' naa ta wo' kuk'em keh i riis, inki Dios.
14K'ahchi' chik ruponiik i q'iij chi re' i QaJaaw Dios naa ruye'em
taqe panti' k'axik i yiib' wach kina'ojb'al.
Eh xiik' naa ti' kiil i naakik'ulum chupaam i q'iij re' re',
nik' ta naq kowiil i winaq xanaa wo' roq'iim ruum i naakik'ulum
15Chupaam taqe q'iij re' re', re' i QaJaaw Dios
naa ruk'uhtaam i rujosq'iil chikinaah taqe re'.
Eh jinaj ti'kiil k'uxliis, jinaj yot'oj ánima,
jinaj tukinik wachiis, ruum i rusachariik kiwach,
naa ruq'equumriik paam i taxaaj, ruum i q'eq suutz',
naa ruq'equumriik wach i q'iij.
16Eh naakixulem chaloq i kituun i naa kichaliik chi q'aq'inik,
chikinaah taqe i tinamit kotimaj kiij chi tz'aq,
eh wilik kinajt naah tz'aq ko'lemb'al kiib'.
17Eh naa nuye'em taqe panti' k'axik i aj Judá, i aj Jerusaleem,
naa kikahniik chi je' taqe mutz'wach,
xak'ul chik naa kojiik chusik'ariik aha' naa kiko'leem kiib',
ruum i kimahk chi nuwach, naa ruchihkiik pampooq i kikik'eel,
eh re' i kiti'jolal naa rukahniik chi xa tz'aq tz'aq chik,
xa je' chik rusaa' wakax, inki.
18Eh chupaam i q'iij re' re' ni xata naq re' i ki plata, i ki oro
naa ruko'liniik keh chuwach i rujosq'iil i QaJaaw Dios.
Ruuk' i rujosq'iil jumehq'iil naa rusacham kiwach
chu'nchel i k'achareel wach ak'al,
je' rukab' i rub'an i xaq q'aaq'
noq i ruk'at chu'nchel i xa chib'ih jariik.
Currently Selected:
Sof 1: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
