Sal 16
16
Re' i kooch xiik' naah chihojal
1WaJaaw nuDios, kinacha'jeej tii,
ruum xa awuuk' wo' hat inusik' ko'lb'al wiib'.
2Aweh hat nuq'orom chi je' wili:
Xa re' wo' hat i waJaaw.
Eh ma' awach ta chik jino'q i q'e' atoob' wuuk' chi je' rukab' i hat, kinki.
3Re' taqe korik wach kik'ux chunimjiik i Dios,
i wilik kisantohiil ayu' wach ak'al, re' re' kiye'wik rusuqkiil nuk'ux.
4Eh q'e' ti' i naakik'ulum
taqe ikiloq'inik reh taqe i xa tiyoox.
Eh re' hin ma' jaruuj neenuyeew chi numayiij
i rukik'eel chikop chikiwach taqe i kitiyoox,
ni xata neenuyeew kiloq'il ruuk' nuchii'.
5WaJaaw nuDios, re' hat ti ye'wik weh chib'ih jariik inwaaj.
Eh i nayeew weh chi manlik aawotob'il,
panaq'ab' wilik i nuk'achariik.
6Q'e' holohik xinelik, ruum xiik' naah holwochiil i nuye'aab' xayeew,
eh xiik' naah chihojal i nukooch xayeew weh.
7Eh re' hin naa nuloq'em i QaJaaw Dios, ruum re' reh ink'amwik nub'eeh.
Eh xti rukoj nuna'ojb'al atoob' ta pantaq chaq'ab' wilkiin.
8Re' hin eliik k'ahchi' wilom wach i waJaaw ma' hin ta rukanaam,
xa eliik k'ahchi' kiin rutob'eem, reh chi ma' xta neenyojwik nuk'ux.
9Ruum aj re', re' wánima, re' nuti'jolal, i nukapeb'aal xiik' naah suq kiil kik'ux.
Ruum xa ruuk' chik i Dios naa nuye'em nuk'ux.
10Re' hat waJaaw ma' naa ta akanaam i nuti'jolal panjul, naa la' awuksam chaloq.
Eh ma' naa ta wo' aye'em q'ab' chi
naa ruq'ahiik panjul i ruti'jolal i Santolaj Awak'uun.
11Re' hat naa ak'uhtaniik weh i rub'eeh i juneliik k'acharik.
Eh wilik jinaj i runimaal rusuqkiil nuk'ux,
ruum xa awuuk' wo' hat wilik i rusuqkiil k'uxliis reh juneliik.
Currently Selected:
Sal 16: POK
Highlight
Share
Copy
Want to have your highlights saved across all your devices? Sign up or sign in
Biblia en Poqomchí: Santo Laj Huuj © Sociedad Bíblica de Guatemala 2009.
