Sof 1
1
Is c'ual yowal c'ul Jehová
1A ton wal jun k'anej ti' max yal Jehová bay Sofonías yet ayoc Josías, c'ajol Amón, yin reyal bay Judá. A Sofonías tu', c'ajol Cusi, cax is yitxiquin Gedalías, yichmam c'apax yayji Amarías c'al Ezequías.
2A wal caw Jehová chi alon axca ti': Ok wak' lajwok masanil tzet yetal ay bay sat tx'otx' ti'.
3Ok wak' lajwok eb anima yetok no no', no tz'iquin, c'al yetok no txay. Ok wak' lajwok yobtakil yetok eb yobtakwom, cax ok wion el eb anima sat tx'otx' ti'.
4Ok waoc yailal yin conob Judá, yetokc'al yin masanil eb cajan bay Jerusalén. Cax ok wak'on lajwok ay ayilal chi oc bay dios Baal bay conob ti'. C'amxa bay ok txeclojcanok; toltax c'apax bi eb sacerdote ok in jo c'ayok.
5Cax ok wak'on lajwok eb chi ajtok bay yibanlak na txajlok bay waycan, yetok eb chi ay jajan yin quin yak'on binajok; palta chi yak' binaj c'apax is diosal chi yik Milcom.
6Ok wak'on c'apax lajwok eb chi pojil ba win, a ton eb c'am chi jayoc ayin Jehová in, yin ul k'anlen is nabal.
7Numayanek in satak ayin Jehová Yajaw in ti', yujtol a c'ual yowal in c'ul cawilxa ay. Mayal in watx'nej el no xajanbal yet junc'ulalil. Mayal c'apax in sic'can el mac awtebil low wuj.
8A yet jun c'ual tu', ok wawal oc yailal yiban eb yajaw yayji, yetokc'al yiban eb c'ajol rey, yetokc'al yiban juntzanxa eb chi yaoc pichil eb tx'ok conobal.
9Ok wa c'apax oc yailal yiban eb comonc'al chi oc yulak na, a ton eb chi yak' noj yatut is patrón yuj beyomal chi yi eb yuj mak'wajwomal, c'al yuj etnewomal.
10A yet jun c'ual tu', ok ablay yoc aw bay puertail yet no txay, bay yet is cab makan conob. Cax miman ok yun bil pojtok bay tzalanlak.
11Awjanek, mac ex cajan ex bay jun makan bay ay txonbal, yujtol masanil eb txonjom ok cam eb, masanil eb chi ak'on tumin majanil, ok lajwok el eb.
12A yet jun c'ual tu', ok in saywal wil Jerusalén axca chi yun saylay yetok tzektebalej junok tzet yetal chi c'aytok. Ok waoc yailal yiban eb anima c'am tzet chi na' tinani', cax chi yalon eb yul yet axca ti': A Jehová, tok ay tzet yetal chi paktzej ayon yin watx'il, tamwal yin yatakilal, ẍi eb.
13Yuj tu' xan a jantak is beyomal masanil, ok ilay ec'ok, c'al yatut eb ok uchlay ayok. Ok watx'nej aj eb yatut, palta manxanak eb ok cajay yul. Ok yaw eb is yuva, palta manxanak eb ok uq'uen vinoal an, ẍi Jehová.
14Cawilxa ay jun c'ual yet yowal c'ul Jehová, caw wal miman yayji ocok. Cawilxa ay, yelc'ulalxac'al jayocok. Abek, a wal yet jun c'ual tu', toltax a eb soldado caw wal tec'an waayi, ok ok' eb yuj xiwc'ulal.
15A wal yet jun c'ual tu', c'ual wal yowal c'ul Cham, yailal, c'al cusc'ulal. A yet tu', ok uchchajtok conob, tz'ininixac'al ok yuncanok. A yet tu' ok k'ekbok, k'ekk'olinakxac'al ok yunej. Moyanxac'al ok yunej. Caw wal pim ok yun yoc ewan.
16A yet jun c'ual tu', c'ual xulay trompeta yuj owal c'al yel yaw eb soldado yak'on owal yin conob tol ayoc is murallail, c'al can ay aj is torreal.
17Chi yalon Jehová axca ti': Ok wawal oc eb anima yin bilc'ulal, xan lajanxac'al ok yun yec'jab eb axca yec'jab eb c'amc'alta' chi ilwi, yujtol max oc wal yobtakilal eb in satak. A is chiq'uil eb, toxac'al ok pulcan ay axca aej; axa is mimanil eb, toxac'al ok aj can bulan axca tza' no no', ẍi Cham.
18Tamwal yuj is plata eb anima, tamwal yuj ch'en yoro eb, ok colchaj eb yet jun c'ual yowal c'ul Jehová tu'. Yujtol a yowal c'ul Cham ok ak'on lajwok masanil nacionlak. Yin wal jun bekal ok lajwok ay masanil eb cajan bay yulyibank'inal ti', axca chi yun junok tzet yetal yuj k'ak'ej.
Currently Selected:
Sof 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
