Zac 8
8
Ok cha Jerusalén watx'c'ulal junelxa
1A Jehová Cham Yajaw yin Masanil max alon jun k'anej ti' ayin axca ti': 2Caywal ti' chi yun walon ayin Jehová in. Caw wal ay yowal in c'ul yuj tzet chi utlay Sión. 3Ok in meltzoj bay Jerusalén, yet chin cajay bay tu' junelxa. Axca tu xin, a Jerusalén tu' ok yik Conob Ikem junelxa. Axa in tzalan ayin Jehová Yajaw in yin Masanil, ok yik tzalan asannej in ay wet. 4Eb icham winak, c'al eb ixnamil ix, ok ay chotan eb junelxa bay txonbal bay Jerusalén. Yinxac'al k'okochej ok ec' eb, yujtol caw wal icham animaxa eb. 5Axa txonbal, nojnakxac'al el yuj eb winak unin, c'al eb ix unin chi sakchi bay tu'. 6A yet tu', a eb anima aycan bay yul in conobal ti', toxac'al ok c'ayaj c'ul eb yilon jun ti'. A pax ayin xin, man ok c'ayaj in c'ul wiloni. Ayin ton Jehová in chi wal juntzan ti'. 7Ayin ok in col in conob bay yul is k'ab juntzan nación bay yetc'ulal bay chi ajol c'u, c'al bay yayubc'u, 8axa wiontek eb cajay bay Jerusalén ti' junelxa. A eb ok oc in conobok, ayinxa ok in oc is Diosalok eb. Ok in yajawbok yin eb yin tojolal, axca max yun waloni, ẍi Cham. 9A ton jun ti' chi yal Jehová Cham Yajaw yin Masanil: Tec'bajek e ba, ayex tol lanan e yaben juntzan k'anej maxax yalil eb in chekbej yettax max ay yich ca watx'nelay in templo, ayin Jehová Yajaw in yin Masanil. 10A yet yalantok jun c'ual tu', c'am bay chi tit tojol eb nak mulnajwom, c'al tojol no chej chi mulnaji. Yujc'al eb ajc'ul, xan c'am junc'ulal xol eb chi eltok ec'jabok, yujtol ayin max waoc juntzan eb ajc'ulal yin juntzanxa. 11Palta axa tinani' xin, ayin wal caw Jehová Yajaw in yin Masanil chi wala', tol manxa ok wun yin eb chi cancan bay jun conob ti', axca max wun yet yalantok tu'. 12Yinxac'al junc'ulalil ok ayjok eb. A is yuva eb, caw wal ok yak' sat. A is tx'otx' eb, yelxac'al ok yak' sat awoj, axa satcan ok ak'on yal ak'bal. Ayinxa ok wak' masanil juntzan tu' bay eb anima chito can bay jun conob ti'. 13Axca max yun e binaj ayex Judá ex ti', c'al ayex israel ex ti', yin is catab eb conoblak, axa tinani' xin, ok ex in colilok, cax ok ex binaj yin watx'ilal. C'amc'al jabok chex xiwi, asan tol che tec'baj e ba, ẍi Cham.
14Ayin ton Jehová Yajaw in yin Masanil chi wala': Max in na' waon oc yailal eb e yichmam yet max tx'emontek eb wowal. A tzet max in na' tu', max wunej. 15Cay c'apax tu' tinani' xin, max in na' tol a watx'ilal ok wun bay Jerusalén c'al bay Judá. Yuj wal tu', xan c'am chex xiwi. 16A ton wal juntzan ti' yowalil ok e yun ayex ti'. Asanc'al tzet yetal yel ok e yal-lej ayex junjun ex. Beyc'ulnejek yin tojolal, yet watx' ay junc'ulal e xol. 17Manchak e yak'lej yobc'ulalil e yin, tamwal che yak' e ti' yin lek'tial ayex junjun ex. Ayin wal caw Jehová in chi wala', tol caw wal c'am chi wochej masanil juntzan beybalej tu', ẍi Cham. 18Max k'anjab Jehová, Cham Yajaw yin Masanil ayin axca ti': 19A c'ajbanc'ulal chi oc yet is can xajaw, c'al yet is so', yet is suk, c'al yet is lajoneb xajaw, ok yutcan aj ba yin tzalojc'ulal, c'al yin k'in yuj eb yinatil Judá. Yuj tu', camc'ulnejek tojolal c'al junc'ulal, ẍi Cham. 20A Jehová, Cham Yajaw yin Masanil chi yal axca ti': Oktoc'al tit anima bay juntzanxa mimek conoblak, yet ok jayoc bay Jerusalén. 21Axca tu xin, a junok conobal ok yal bay junokxa: Tonek, ok co k'anek bay Jehová, Cham Yajaw yin Masanil, yet chi yak' is watx'c'ulalil ayon, ẍi eb. Axa juntzanxa eb ok yal eb axca ti': Ok on tok c'apax ayon ti', ẍi eb. 22Catatu' xin, xiwil nacionlak, c'al conoblak xiwil yipalil ok jayoc bay Jerusalén, yet chi ul oc yin ayilal bay Jehová, Cham Yajaw yin Masanil, c'al k'anon eb watx'c'ulal Cham yiban. 23A yet tu', lajonwan eb tx'ok conobal ok oc nic'an yin is pichil junok Israel, cax ok yalon eb axca ti': Chi jochej chon oc e yetok, yujtol max jabej tol a Dios ayoc e yetok ayex ti', ẍi eb, ẍi Jehová.
Currently Selected:
Zac 8: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
