Ro 4
4
Co cuybanilok yayji Abraham
1A cham jichmam Abraham, ¿tzet max yun yeloc cham yul sat Dios che na'? 2Watx' cham yul sat Dios, palta man yujok tzet watx' max el yunen yul yet, xan watx' cham yul sat Dios. K'inalok ta yuj tu', tekan chi je' maynen ba cham. Palta tinani' maj je' maynen ba satak Dios. 3Yujtol chi yal yul tx'an Un Tz'ibbilcan axca ti': Axa yaon oc Abraham yin c'ul tzet max yal Dios bay, xan watx' max yun cancan yul sat Cham, ẍi yul tx'an. 4A tinani', k'inalok ta chon mulnaj bay junok anima, cax chi co chaon co tojol, a co tojol tu', man sabalok, palta tol jecxa nak aj mulnajil tu'. 5Palta a Dios, caxc'al c'am tzet chi jun bay, tatol chi jaoc yin co c'ul, watx' on yul sat. Caytu' chi yun junjun yobtakwom yul sat Dios, tatol chi ya wal oc eb yin c'ul. 6A cham rey David, max yalcan elok, tol watx' yet eb mac bay chi al-lay yuj Dios tol watx' eb yul sat. Man yujok tzet watx' chi el yunen eb, xan chi yal Dios axca tu'. 7Max yalcan cham David tu' axca ti':
Tzalojc'ulal yet mactxel max jolayc'ay is yec'nakilal cax max tancan el is mul yiban.
8Tzalojc'ulal yet mactxel c'am chi oc is yobtakil mulok yuj Cham Jajawil, ẍican cham David tu'.
9A jun tzalojc'ulal chi yal ti', man asannejok eb ayoc circuncisión yin ay yet. A jun tzalojc'ulal tu' yet c'apax eb man ocnakok jun yechelej tu' yin. Mayal wal ayex, tol a Abraham max yaoc Dios yin c'ul. Asan yuj tu' xan yalnak Dios tol watx' yul sat. 10Palta naektek, ¿bak'ini yalnak Dios axca tu'? ¿Tom ak'bilxa circuncidar Abraham tu' yet tu'? C'amak, manto ak'lay circuncidar yet tu'. 11Palta c'ojanc'ulalto ocnak jun circuncisión tu' yin. A jun tu' chi tx'oxon tol watx' cham yul sat Dios yet manto ak'lay circuncidar, asan yuj max yaoc Dios yin c'ul. Yuj tu', mamej yayji cham bay jantak eb man ak'bilok circuncidar, tatol chi yaoc eb c'ul yin Dios. A ton eb tu', watx' eb yul sat Dios axca Abraham tu'. 12Yetok c'apaxok mamej yayji cham bay eb ak'bil circuncidar. Chi yal elapnok, eb c'am chi yaoc jun circuncisión tu' yipok c'ul. Palta chi yaoc eb c'ul yin Dios, axca max yun Abraham tu' yet manto ak'lay circuncidar.
Max yak'can Dios ti' bay mac chi yaoc c'ul yin
13Yak'nakcan Dios ti' bay Abraham, yetok bay eb yinatil, tol ok yak' yulyibank'inal ti' bay eb. Man yujok max yikej cham ley Dios, xan max yak' ti' bay, palta asannej yuj max yaoc Dios yin c'ul, xan watx' cham yul sat. 14K'inalok ta asan bay eb ayoc yin ley tu' ok yak' Dios yulyibank'inal ti', nabac'al mi chi jaoc co c'ul yin chi yal tu', cax mi chi tancan el tzet albil yuj tu'. 15Yujtol a jun ley tu', chi awi oc yailal yiban anima. K'inalok ta c'am jun ley tu' tinani', c'am mac chi oc yobtakil bay ley tu'.
16Yak'nakcan Dios ti' bay Abraham, yujtol max yaoc Dios yin c'ul. Axca ton tu' chi yun txecloj elok, tol asan yuj is watx'c'ulal Dios, xan yak'nakcan is ti'. Yuj tu', a ayon yinatil on Abraham on ti', ay c'apax jalon jet co masanil yin yetok. Man asannejok eb chi yikej jun ley tu' ay yalon yet yin, palta ay c'apax jalon jet yin co masanil ayon chi jaoc co c'ul yin Dios axca Abraham tu'. Yujtol axca tol co mam yayji Abraham tu' yul sat Dios, yujtol a yin Dios max yaoc c'ul. 17Axca yaloncan Dios yul tx'an Un: Ok ach wacan oc is yichmamok xiwil nacionlak, ẍi Cham bay Abraham. A Dios chi ak'on ictzoj aj eb camnak. Asan tol chi yala' cax chi pitzc'oj juntzan tzet yetal tol c'amtac'a.
18A yunnak Abraham junel, c'am junok tzet yetal max je' yak'on yip is c'ul, palta max yaoc Dios yin c'ul. A tzet yalnak Dios bay, a' max yaoc yipok c'ul. Yuj tu', max oc yichmamok xiwil nacionlak axca max yut yaloncan Dios bay, yet max yalon axca ti': Axca ton waycan tu' ok yun bisil eb enatil, ẍi bay. 19A Abraham tu', janic'xanej man 100 abilok max yila'. Yojtak tol caw wal ichamxa. Yojtak c'apaxok tol caw wal ixnamxa xal Sara. Axca wal tol c'amxa bak'in ok aljok junok yuninal eb, palta ac'ala' yaon oc cham yin is c'ul tzet max yal Dios bay. 20A yet max yak'on Dios ti' bay, cax man cabc'ulaltakok max yut yabeni. Caw wal tol max yaoc yin c'ul. Caw wal tec'an is nabal. Max yal watx' k'anej bay Dios, 21yujtol yojtak cham sic'libil, tol chic'al je' yuj Dios yunen axca yalon bay. 22Yuj wal tu' xan watx' max yun cancan Abraham tu' yul sat Cham.
23Tz'ibbilcan yabixal yul tx'an Un, tol watx' cham yul sat Dios, yujtol max yaoc cham yin is c'ul. Palta man asannejok yuj cham xan max tz'ibelaycanok. 24Palta tol ayon jun chon al-lay c'apaxok. Yuj tu' xan chi yal Dios tol watx' on yul sat, tatol chi jaoc co c'ul yin. A Cham ak'nej pax ictzoj aj Cham Jajawil Jesús xol eb camnak. 25Max alay oc Jesús yul k'ab camich yuj co yobtakil. Lajwi tu', max ictzoj pax ajok, yuj joccan watx'il satak Dios yuj.
Currently Selected:
Ro 4: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989