Nah 2
2
1Ex aj Nínive, a mactxel ok ex ak'on lajwok ayok lanan tit e yin. Ajokabtok e taynemal bay can, yin makoj be. C'alek oc e yespada yin e nan. Wajbajek oc masanil e soldado.
2Caxc'al max elk'anelay is tzet yetal Israel yuj eb ajc'ul, xan lajanxac'al max yuncan axca an uva c'amxa is k'ablak. Palta a Jehová ok yi wal aj can is mimanbilal eb yinatil Jacob junelxa, axca yet yalantok.
3Cakxac'al yili is makbal julbalej eb ajc'ul chi tit e yin, cakxac'al yili is pichil eb soldado ayocok. Watx'xa yayji eb yet chi oc eb yak'on owal. A is carruaje eb, toxac'al chi jopopi; c'amxa chi oc wanaj is chej eb.
4Tx'okxa toj is carruaje eb yulak calle, xuyuyixac'al yec' yinlak txonbal; lajan wal yili axca junok tzektebalej tol ayoc is k'ak'al, lajanxac'al yec' eb axca rayo.
5Chi yawtej cham reyal Nínive eb is chekbej; palta toxac'al chi telc'ojtok eb tita. Chi toj lemnaj eb bay murallail conob. Lanan watx'ji is colbalba eb.
6Chi jakchaj juntzan puerta tilak a' aej, chi ay weknaj despacho.
7Chi ilaycantok xal reina yin presoal; ajun eb ix is chekbej xal chi tojcan yetok. Toxac'al chi ok' eb axca no cuajte', cax chi mak'on eb txamc'ul yuj cusc'ulal.
8Axca chi yun yel a' aej bay wajan ec'ok, caywal tu' ok yun yelaj masanil eb cajyom bay Nínive. Okto el aw, ok al-lay axca ti': Ocanek waanok, meltzojanek, ẍi. Palta c'amxa mactxel chi cha yabej.
9Ok al-lay bay eb ajc'ul: Iektok ch'en plata, iektok ch'en oro, yujtol a is beyomal conob Nínive, c'am lajubal, ẍi.
10Mayal uchlay lajwok Nínive, tz'ininixac'al max yuncanok. Caw wal chi pax yip eb cajyom bay yuj xiwc'ulal. Toxac'al chi bilaj yakan eb masanil. C'amxa mac ayto yip. Sakxa yili sat eb yuj xiwc'ulal.
11¿Tzet max on jun conob Nínive ti', tol axca wal nach'en no coj yayji, bay ayic' no' yetok yune'? A no coj tu', yetok yune', watx'xac'al yayji no' chi yabej; tok ayto mactxel chi xibteni.
12A no coj tu' max mak' cam is chibej, cax max pojon ec' no' yin no txutxej yetok no yune'. Caw wal nojnakxac'al yul is nach'en no' tu' yuj chibej.
Lajwinak ay Nínive yin junelnej
13A wal caw Jehová, Cham Yajaw yin Masanil chi aloni: Ayin wal oc ajc'ulal e yin ex aj Nínive: Ok wak' tz'a e carruaje yet owal; mubxac'al ok wutcantok. Ok in mak' cam masanil e soldado, cax ok wak'on lajwok masanil tzet yetal elk'anebil e yuj ayic' bay e tx'otx'al. C'amxa bay ow ok yut k'anjab ba eb e chekbej, ẍi Cham.
Currently Selected:
Nah 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
