Mc 3

Max watx'jican nak sicbinak el is k'ab

(Mt 12.9-14; Lc 6.6-11)

1A yet junelxa max oc Jesús yul jun nail culto eb yet israelal. Ayic' jun nak winak sicbinak el jun is k'ab bay tu'. 2Ay eb max mak yila' ta chi yak'can watx'jok Jesús is k'ab nak yet c'ual xewilal tu', cax chi yak'on queja eb. 3Axa yalon Jesús bay nak sicbinak el k'ab tu' axca ti':

—Ajan wan, ocan lecan co nan ti', ẍi bay nak.

4Max lajwi tu xin, max yalon bay eb anima tu':

—¿Baytet ay junok ay is leyal junen yet c'ual xewilal che na'? ¿A mi tzet watx' chi je' el juneni, ma a tzet yob? ¿Chi mi je' jak'oncan watx'jok c'ul junok ya'ay, ma a co bekon camok? ẍi.

—Tz'inxac'al, ẍi eb. 5Axa yec' t'ananok Cham xol eb tu', max tit yowal. Max cus c'ul yujtol caw pit eb. Axa yalon bay nak winak tu':

—Bitok a k'ab, ẍi.

Max biontok nak is k'ab, axa watx'jican tu'. 6Axa yeltek eb fariseo tu' yina, max lajtinen el ba eb yetok eb partido Herodes, yuj tzet chi yut yak'on cam eb Jesús.

Jun bulan anima max betic' ti a' mar

7Palta max toj Jesús ti a' mar Galilea yetok eb is cuywom. Xiwil juntzanxa anima max tit yulak is makbej Galilea tu' max toj yetok eb. 8Yujtol max yab eb k'umal tol xiwil milagro max yun Jesús, xan xiwil eb max jayoc bay. Ay eb aj Judea, c'al eb aj Jerusalén, yetok eb aj Idumea, c'al eb aj k'axepaltok a' Jordán. Ay c'apax eb max tit cawilal Tiro c'al Sidón. 9Yuj tu' xan max yal Jesús bay eb is cuywom, tol ayxac'al ec' junok barco yuj eb, yet watx' c'am chi witz' ba anima yin Cham. 10Yujtol xiwil eb maxax jaycan c'ul yuj, yuj tu' xan xiwiltoc'al eb ya'ay max jitzoc ba c'atan Cham yuj mitx'on eb. 11A pax eb espíritu yob xin, a yet max yilon eb yin Cham, max ay jajan eb satak, cax max yalon eb yin ipejal axca ti':

—Ach ti' C'ajol ach Dios, ẍi eb.

12Palta max yak' Jesús yowalil bay eb, yet watx' manchak yal eb mactxel.

Max siq'uil Jesús lajcawan is cuywom

(Mt 10.1-4; Lc 6.12-16)

13Max lajwi tu xin, max toj Jesús bay jun tzalan. Max yawten eb max cha c'ul yawteni, axa yapni oc eb bay tu'. 14Lajcawan eb max yaoc yopiso is chekbejok, yet watx' chi ec' eb yetok, c'al yuj chekontok eb toj yalon el k'anejal yet colbanilej. 15Max yak'on yopiso eb yioncan el eb espíritu yob yin anima. 16Tixtak is bi eb lajcawanil ti': Simón, nak max yikcan aj Pedro yuj Cham, 17yetok Jacobo c'al jun yuẍtak chi yik Juan. A cawan eb ti', c'ajol Zebedeo eb. Max yikcan aj eb Boanerges yuj Jesús. A jun biej tu', chi yal elapnok yuninal C'u chi bili.*fn* 18Ay jun chi yik Andrés, ay jun chi yik Felipe, ay jun chi yik Bartolomé, ay jun chi yik Mateo, ay jun chi yik Tomás, ay jun chi yik Jacobo, nak c'ajol Alfeo, ay jun chi yik Tadeo, ay junxa chi yik Simón. A junxa Simón ti', ayoc yin is partido eb cananista yet yalantok. 19Ay junxa xin, a ton Judas Iscariote, nak max aon oc Jesús yul k'ab camich.

Max yal eb tol a nak Satanás ayoc yin Jesús

(Mt 12.22-32; Lc 11.14-23; 12.10)

20Max lajwi tu', max toj Jesús bay jun na yetok eb is cuywom. Xiwil anima max waj pax ba junelxa yin eb, xan majxa je' low Cham, tamwal eb is cuywom tu'. 21A yet max yaben eb yuẍtak Jesús, c'al is txutx, max tit eb; t'inanxa chi ul yitok eb, yujtol mayal oc Cham locoal yalon eb. 22Ay juntzan eb meẍtol yin ley Moisés max tit bay conob Jerusalén, max yal eb axca ti': A Beelzebú, yajawil eb espíritu yob ayoc yin Jesús ti'. Yuj tu' xan chi je' yion el espíritu yob tu', ẍi eb.

23Axa yawtelaytek eb yuj Jesús, max yalontek Cham juntzan abix bay eb: A Satanás tu', ¿tom wal ok yuktej el eb yet espíritual yob tu'? 24K'inalok chi yak'lej aj eb anima owal bay junok mimek conob; a jun conob tu', chi lajwi ayok. 25K'inalok ta ay junok nail anima chi pojchaj yuj owal, chi etax el jun nail anima tu'. 26Cay c'apax ton tu' Satanás xin. K'inalok ta chi pojchaj yetok eb yet espíritual yob, cax chi yak'len owal yetok eb, chi uchchajtok eb, cax chi lajwi yopiso.

27K'inalok ta ay junok winak xiwil yip, c'am junok mac comonc'al ok oc yul yatut, cax chi yelk'anentok is tzetak yetal. Asan ta ay junok chi tzakay pixoncan ay nak xiwil yip tu' bian, catam tu', chi je' yelk'anentok is tzetak yetal nak tu'.

28Wal yel chi wal ayex, tzanc'al tzet yobtakil anima chi oqui, c'al jantak yobtakil chi yal eb yin Dios, ok ak'lay tan yuj Cham. 29Palta tzanc'al mac yob chi yal yin Cham Espíritu Santo, man ok ak'lay tan is yobtakil tu'. Chi oc is mulok yin junelnej, ẍi Jesús.

30Caytu' max yut yalon axca tu', yujtol max yal eb tol espíritu yob ayoc yin.

Is txutx Jesús yetok eb yuẍtak

(Mt 12.46-50; Lc 8.19-21)

31Max lajwi tu xin, max jayoc is txutx Jesús yetok eb yuẍtak. Asan ti na max oc lecan eb. Max yak'on eb awtelay eltek Jesús. 32Axa eb chotan ay cawilal Cham max alon bay axca ti':

—Ayic' a txutx yina, yetok eb oẍtak. Ach ab chach saylay ec' yuj eb, ẍi eb.

33Axa yalon bay eb tu':

—¿Mactxel in txutx che na', mactxel eb wuẍtak? ẍi bay eb.

34Cax max ec' t'ananok xolak eb chotan ay is cawilal tu', max yaloni:

—A ton eb ti', axca in txutx yayji, a ton eb ti' axca wuẍtak yayji. 35Yujtol tzanc'al mac chi iken axca wal chi yochej c'ul Dios, a ton eb tu' axca tol wuẍtak, axca tol wanab, axca tol in txutx, ẍi Jesús.

Currently Selected:

Mc 3: ATBYK89

Highlight

Copy