Miq 6
6
Chi yak' Dios yowalil tzet yob chi yun Israel
1Ajan wan ach Jehová, cax chalon is mul conob Israel satak tx'otx' witzlak, cax yabokab tx'otx' tzalanlak yul a nuk'.
2Yabokab witzlak, c'al cimientoal yich tx'otx' tx'otx', tol ok al mul a conob, cax ok ak'on owal yetok eb israel.
3Ex Israel, chi cam wal e yaben tzet chi yal Jehová. Chi yal Cham axca ti': Tak'wanek ayin, ex in conob. ¿Tzet max ex yun wetneni, ma tzet max ex wutej?
4Ilab ayin max ex wieltek bay Egipto, max ex in colon eltek bay ayex oc mosejal. Ayin max in chektok Moisés, c'al Aarón yetok María, a ton eb max ex ikbani.
5Ex in conob, naektek tzet yetal nabil yuj Balac reyal Moab, axa is paktzebal max yak' Balaam is c'ajol Beor. Naek c'apaxtek tzet max uj bay nan xol Sitim yetok Gilgal, cax che naontek, tzet max ex wut in coloni, ẍi Jehová.
A tzet chi yochej Jehová bay eb anima
6Chi k'anlej eb israel axca ti': ¿Tzet ok jak' bay Jehová yet ok on oc yin ayilal bay, a ton Cham Dios Axac'al Ocok? ¿Ok mi on oc satak Cham yetok no calnel jun abil is k'inal, yet chi jak' tz'a no' yin xajanbalil?
7¿Ok mi wal tzalojbok aj Jehová, ta chi jak' junok mil no icham calnel yin xajanbalil, yetok junok lajoneb mil nuk' aceite tol chi bey yakan? ¿Ma xin, ta chi jak' co babel unin yin xajanbalil yuj co yobtakil? ẍi eb.
8Chi paktzej is chekbej Dios: Ex wet conob, mayal yal Jehová tzet yetal tol watx' yul is sat, c'al tzet yetal tol chi yochej Cham ayon, a ton juntzan ti': Tojol chi jut co ba, ayokab co camc'ulal yin eb jet animail. Yin yaynakilal yikem chi jut co ba bay Cham co Diosal, ẍi is chekbej Dios.
9Lanan yawji Jehová bay is conob; chi yalon Cham axca ti': Aj nabal mac chi cam yaben yin yaynakilal. Jayokab e nabal yuj yailal, ayokab welapnok yul e sat, ayin tol chi waoc yailal tu'.
10¿Tom ok tok c'ayc'ulal wuj tol a bay yatut eb yobtakwom, xiwilxa beyomal wajan ec'ok tol max yi' eb yin yobtakil, yetok c'apax juntzan echbal man tz'akanok, tol yajbil wuj?
11¿Tzet ok yun wak'on mimanc'ulal yiban juntzan anima ti', tol a echbal man tz'akanok chi k'an eb?
12A juntzan beyom xol conob ti', elk'om eb, etnem anima eb. Jantak ex cajan ex bay jun e conob ti', lek'ti ex.
13Yuj wal tu' xan ok waoc e yailal. Ok ex wak' lajwok ay yuj e mul.
14Ok ex lowok, palta man ok noj e c'ul, ac'ala' tit e wajil. Ok e wajaj e tzetak yetal, palta man ok colwaj jabok e yetok. Ta c'uxan ayto wal tzet ok colchaj el e yuj xin, axa yin owal ok wak' lajwok ayok.
15Ok e yaw e yawoj, palta c'am jabok tzet ok e wajajok. Ok e tec' e yolivo, palta man ok e k'an jabok aceite. Ok e tec' e yuva, palta man ok e yuc' vino.
16Yujtol che yikej tzet yetal max yal Omri, c'al Acab is c'ajol, cax che beybalnenxac'al is beybal eb max beybalnej. Yuj tu' xan ok wak' jayoc yailal c'al buchwal k'anej e yiban. Caytu' ok yun e yaben yail q'uixwilal satak eb acaw in conob, ẍi Jehová.
Currently Selected:
Miq 6: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
