Miq 1
1
Is beyc'ulal Dios yiban Samaria
1A ton wal juntzan k'anej ti' max yal Jehová bay Miqueas aj Moreset yet max ec'c'al Jotam, Acaz, c'al Ezequías yin reyal bay Judá. A Cham max tx'oxon yila', tzet ok yun Samaria c'al Jerusalén. Yuj tu' xan max yalil Miqueas axca ti':
2E masanil ex conoblak, abek juntzan ti'; chi cam wal e yaben e masanil ex cajan ex bay yulyibank'inal ti': A Jehová Cham Yajaw, a wal bay is templo ok yalaj Cham e mul.
3Ok eltek Jehová bay cajan ec'ok, cax ok bey tit yiban jolomlak witz.
4Ok uljoktok witzlak tu' yalan yakan, axcaxac'al chi yun yuljitok ixcab xol k'ak'ej. Masanil jobelak ok pojchajtok, axca wal chi yun yay nan tx'otx' yuj a' elom aej.
5Ok yun juntzan ti', yujc'al wal is pitalil eb yinatil Jacob, yuj mulej bay yul is makbej Israel. ¿Baytal chi txecloj is tenomtakil eb yinatil Jacob? A bay conob Samaria. ¿Baytal chi txecloj is ayilal eb aj Judá bay is comon diosal? A bay Jerusalén.
6Yuj wal tu' xan chi yal Jehová axca ti': Ok wak' lajwok ay jun conob Samaria ti', toxac'al ok aj can bulan is pojiltakil. Jakanxac'al ok yuncan axca bay chi je' yawlay uva, atac'al bay yulak jobe ok in k'okcan aytok is ch'enal jun conob ti', cax ok txeclojcan ajtek is cimientoal yich.
7Coc'xac'al ok yuncantok juntzan yechelej. Ok wak' lajwok juntzan comon dios tu'. Masanil juntzan yelbubal yul templo ok tz'acantok. Yujtol a yetok tumin yet ajmulal watx'nebil. Ac'ala' tzet c'am chi tz'a'i, yin ajmulal ok tokcan juntzan tumin tu' junelxa, ẍi Jehová.
Is cusc'ulal Miqueas
8Yuj wal tu' xan chin ok' yuj cusc'ulal. T'iran in elok, c'amoc in xanab chin ec'jabi. Toxac'al chi el waw axca junok no ok, ma axca junok no yune' avestruz.
9Yujtol a is yas Samaria, majxa anchajok. Mayal tzakay c'apaxtok Judá yuj yailal tu', masantac'al max apni oc bay ti' conob Jerusalén, a ton is conobal eb wet conob.
10C'am che yal juntzan ti' bay eb cajan bay Gat. C'amokab chex ok' satak eb. Ayanek telan xol pokok yuj e cusc'ulal tu' bay Bet-le-afra.*fn*
11Axa ayex cajan ex bay Safir, asek can preso, t'iran ex elok. Yinxac'al q'uixwiltakil chex ilaytok. C'amxa jabok chi eltek eb cajan bay Zaanán. Ay ok'il bay Bet-esel, c'amxa mactxel ok oc e yetok.
12A eb cajan bay Marot, chi mak jay eb colwal yujtol mayal apni yailal bay ti' conob Jerusalén yuj Jehová.
13Axa ayex cajan ex bay Laquis, caw wal pit ex axca eb israel. A yuj e pital tu' xan max oc mul eb aj Sión. Aek oc e chej yin carruaje yet owal.
14Junelnej che yalxac'al can toj e ba bay Moreset-gat. A jun conob Aczib, axca iom aytek satej ok yun bay eb reyal Israel.
15Max yalon Jehová e yin ayex cajan ex bay Maresa: Ok watok jun mactxel ok ex ak'on ayc'ayok, axa jun mac binajbil xol eb israel, ok tok c'ubaj el ba bay yulak nach'en bay Adulam.
16A wal ayex ti' tzukek el xil e jolom yuj cusc'ulal, yujc'al juntzan e yuninal tol ay wal e camc'ulal yin. Cak t'irinakxac'al chi yuncan e jolom tu', axca jolom no xulem. Yujtol a eb e yuninal tu' ok ilaytok eb yin presoal, ẍi Jehová.
Currently Selected:
Miq 1: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
