Mt 7

C'am chi je' co beyc'ulnen junok mactxel

(Lc 6.37-38,41-42)

1Manchak e beyc'ulnej junok mactxel, yet watx' manchak ex beyc'ulnelay yuj Dios. 2Yujtol ta che beyc'ulnej junok mactxel, axca wal che yut e beyc'ulnen tu', caywal tu' ok yun e beyc'ulnelayi. Yuj tu xin, xan a e yechbal che yak'balnej, a ok ak'balnelay pax ayex. 3K'inalok ay junok e yet animail chi toj junok c'ajil k'alem yul sat. Ayexxa xin, k'inalok ay pax junok patzab ayoctok yul e sat.*fn* Ta c'am che yiltek tol ay te' ayoctok yul e sat, ¿tom ato wal jab k'alem ayoctok yul sat e yet animail tu' ok e yiltek? 4Ta ay junok te patzab ayoctok yul e sat xin, tok ok je' e yalon bay e yet animail axca ti': Jilto wali, jieltek jun c'ajil k'alem ayoctok yul a sat tu', tok quex chi bay. 5Palta tatol caytu' che yut e yaloni, cabsat ex. Iek eltek jun te patzab ayoctok yul e sat tu' babelal. Catatu bian, ok je' e yilon e yion eltek jun c'ajil k'alem yul sat e yet animail tu'.

6A juntzan tzet yetal yet Dios, lajan axca ch'en perla.*fn* Yuj tu xan maj je' jak'on bay eb tol c'am jabok yelapnok Dios yul sat, yujtol lajan eb axca no tx'i' caw ow, cax tojolc'al tit jin. Ay eb xin, lajan axca no txitam tol toc'al chi tec'tok tzet chi alay ay bay.

K'anek, sayek, awjanek octok ti puerta

(Lc 11.9-13; 6.31)

7K'anek, cax ok yak'on Dios ayex. Sayek, cax ok ilchaj e yuj. Awjanek octok ti puerta, cax ok jaklay ayex. 8Yujtol tzanc'al mactxel chi k'anoni, chi cha'. A mac chi sayon ec'ok, chi ilchaj yuj, axa mac chi awji octok ti puerta, chi jaklay bay.

9Ilab tinani', a yet chi k'anon e yuninal lobej ayex, ¿xin ta a junok ch'en che yak' bay? 10Ma xin, a junok txay chi k'an ayex, ¿xin ta a junok labaj che yak' bay? 11Ti pax wal yob ex, palta e yojtak che yak' tzet yetal watx' bay e yuninal. Akxam wal co Mam ayic' satcan, ok yak' tzet yetal watx' bay eb chi k'anon bay.

12Che yochej tol watx' chi yut ba eb e yet animail ayex, yuj tu xan watx'okab che yut e ba bay eb, yujtol caytu' max yun cheklay co beybalnen yuj ley Moisés tz'ib yayjicanok, c'al yuj tzet tz'ibbilcan yuj eb chekbej Dios payxa.

Jun yaliẍ puerta

(Lc 13.24)

13A yul jun yaliẍ puerta chex oqui, yujtol ay junxa puerta miman sat, cax miman c'apax sat beal, palta a bay c'aybanilal chi apni jun be tu', cax xiwil anima chi toj yul. 14A pax jun puerta yaliẍ sat tu xin, yaliẍ c'apax sat beal, yuj tu' xan jaywannej eb chi toj yul, palta a ton jun tu' chi apni bay k'inalej.

A co beybal, lajan axca sat te'

(Lc 6.43-44)

15Xe yilc'al e ba bay eb chi yaloc ba chekbejok Dios, yujtol a yet ok jay eb ayex, caw manso ch'an ok yut ba eb axca no calnel, palta ti tol yob tzet chi naoc eb e yin axca wal junok no ok caw ow. 16Ok e yojtaknej el eb sic'libil yuj tzetak yetal chi el yunen eb, axca jojtaknen el junok te te' yuj sat. Ilab tinani', tokwal uva sat junok q'uix chi yak'a', ma higo sat junok q'uix chi yak'a'. 17Masanil te te' watx', watx'c'al sat te' chi yak'a'. Axa masanil te te' yob, yobc'al sat te' chi yak'a'. 18Xan a te te' watx', maj je' tol yob sat te' chi yak'a'. Tamwal te te' yob, maj je' tol watx' sat te' chi yak'a'. 19-20Yuj tu xin, a eb chi yaloc ba chekbejok Dios tu', ok e yojtaknej wal el eb sic'libil yuj tzetak yetal chi el yunen eb. Masanil te te' tol man watx'ok sat chi yak'a', chi k'aklay aj te', cax chi k'oklaytok te' xol k'ak'ej tz'a'ok, cayton tu' ok utlay eb man watx'ok beybal.

Man masanilok anima ok oc bay satcan

(Lc 13.25-27)

21Man masanilok eb: Mamin Wajaw, ẍi ayin, ok oc yul k'ab Cham aj satcan. Asannej eb chi iken yochwan co Mam ayic' satcan tu', asannej eb tu', ok ocok. 22A wal yet ok jay jun c'ual tu', xiwil eb ok alon ayin axca ti': Mamin Wajaw, caw wal max on ec' jalon el a k'anej. Yetok ekbej max jion el espíritu yob yin eb anima. Yetok c'apax ekbej, xiwil milagro max el juneni, ẍi mi eb. 23Palta jichan ok yun in tak'wi bay eb axca ti': C'amc'al bay max ex wojtaknej el junelok. Elanekc'al in c'atan, yujtol asannejc'al yobtakil max el e yuneni, quin chi, ok in tak'wok bay eb.

Yowalil chi jikej tzet chi yal Jesús

(Mc 1.22; Lc 6.47-49)

24Tzanc'al mactxel chi aben in k'anej, cax chi yikeni, lajan axca junok winak jelan. A jun winak tu', a yiban ch'en max watx'nej yatut. 25Max jay jun miman yax nab, cax max el sequecok elom aej. Max jay c'apax jun miman cak'ek', cax max low yin jun na tu, palta maj telc'ojok, yujtol c'anani toj xe' yiban ch'en. 26Axa eb chi aben in k'anej, palta c'am chi yikej paxok, lajan eb axca junok winak c'am is nabal. A jun winak tu', a yiban pok max watx'nej yatut. 27Max jay jun miman yax nab, cax max el sequecok elom aej. Max jay c'apax jun miman cak'ek', cax max low yin jun na tu', axa telc'oj tu', max etaxxac'al ayok, ẍi Jesús bay eb.

28Axa yet max lajwi k'anjab Jesús bay eb anima tu xin, toxac'al chi c'aycan aj c'ul eb yuj jun cuybej ti'. 29Yujtol a yet lanan k'anjab xol eb, max txecloj elok tol ay ton yikbej Cham man lajanok cuywaj axca eb meẍtol yin ley Moisés.

Currently Selected:

Mt 7: ATBYK89

Highlight

Copy