Mt 4

Is porobalil Jesús yuj nak diablo

(Mc 1.12-13; Lc 4.1-13)

1Cax max ilaytok Jesús yuj Yespíritu Dios bay jun tz'inan tx'otx', yet chi yak'lej nak diablo yikban Cham yin yobtakil.

2C'am tzet max lo' Cham yin cawinak c'ual, c'al cawinak ak'bal. Lajwi tu' max tit is wajil. 3Axa yapni oc nak diablo tu' bay, yuj yak'len yikban Cham yin yobtakil, cax max yaloni:

—Tutun tol C'ajol ach Dios, xan al bay juntzan ch'en ti', tol chi oc ch'en yin lojal, ẍi bay Jesús.

4Axa tak'wi Jesús, max yaloni:

—Chi yal yul tx'an Un Tz'ibbilcan axca ti': Man asannejok yuj loj chi je' jiquisbi; palta chi je' c'apax jiquisbi yuj masanil k'anej chi yal Dios, ẍi yul tx'an Un Tz'ibbilcan tu', ẍi Cham bay.

5Max lajwi tu xin, cax max ilaytok yuj nak diablo bay jun conob tol asan Dios ay yet, a ton conob Jerusalén, cax max ilay ajtok yuj bay chon templo. 6Max yalon nak bay axca ti':

—Tutun tol C'ajol ach Dios, xan k'okto wal aytok a ba cayti', yujtol chi yalcan yul tx'an Un Tz'ibbilcan axca ti':

Ok chektek Dios eb is yángel yet watx' chach taynelayi. Ok ach quetzlay aj yuj eb, yet watx' c'am cha chipil akan yin ch'en, ẍi yul tx'an Un tu', ẍi nak tu' bay Cham.

7Axa tak'wi Jesús axca ti':

—Palta chi yal c'apax yul tx'an Un Tz'ibbilcan tu' axca ti': Manchak e yak' porobal, Cham Jajawil co Diosal, ẍi yul tx'an Un, ẍi Jesús bay.

8Axa yilaytok yuj nak diablo tu' bay chon jun tzalan caw wal can ayajok, cax max c'oli tx'oxontok nak bay Cham masanil mimek conoblak yulyibank'inal ti', c'al tzetak mimek yelapnok bay junjun conob tu'. 9Max lajwi tu xin, max yalon nak bay Cham axca ti':

—Masanil juntzan chin tx'oxtok ayach ti', ok wak' ayach, ta chach ay jajan ayin, cax chalon a ba ayin, ẍi bay.

10Axa yalon Jesús bay axca ti bian:

—Ach Satanás, elan in c'atan, yujtol chi yal yul tx'an Un Tz'ibbilcan axca ti': Iek ay e ba bay Cham Jajawil co Diosal. Asan Cham che yak' serbil, ẍi tx'an, ẍi Jesús bay.

11Axa yel Satanás tu' c'atan Jesús, cax max toji, cax max jayoc eb ángel ul yak'on serbil Cham.

Max el yich tx'oxon el Jesús yopiso

(Mc 1.14-15; Lc 4.14-15)

12A yet max yaben Jesús tol ayoc Juan yul preso, cax max toj bay Galilea. 13Majxa cajay bay Nazaret, palta axa bay Capernaum max cajayi. A jun conob tu' a bay ti a' mar ay. Bay tilak tx'otx' yet Zabulón, c'al tx'otx' yet Neftalí, a tu' ay. 14Axca ton ti' max uji, yuj yunen el tzet max yal cham chekbej Dios chi yik Isaías, tol max yal axca ti':

15A ti a' mar ay tx'otx' yet Zabulón c'al tx'otx' yet Neftalí,*fn* bay k'axepal ec' a' miman Jordán: A bay tu' ay jun conob chi yik Galilea, junej ay yetok eb man israelok.

16A jun conob tu' cajan xol k'ekk'inal, ok yil jun miman sakk'inal; ok chaw jun sakk'inal tu' bay eb cajan ec' xol k'ekk'inal tol ay is may, ẍi tx'an Un Tz'ibbilcanok.

17Maxc'al apni oc Jesús bay jun lugar tu xin, cax max c'oli yalon el k'anej Dios bay eb anima, max yalon bay eb axca ti': Naek e ba yin e yobtakil, yujtol a Cham Yajaw bay satcan, toxa ok txecloj wal aj is yikbej, ẍi bay eb.

Max yawtej Jesús canwan txaywom

(Mc 1.16-20; Lc 5.1-11)

18Lanan yec'jab Jesús ti a' mar bay Galilea, cax max yilon yin Simón, cham chi yik Pedro yetok jun yuẍtak chi yik Andrés. Lanan txaywi eb bay tu', yujtol txaywom eb.

19Axa yalon Jesús bay eb axca ti':

—Tzaklojanek cuywok wintak, cax ok wak'on e yopiso. Axca che yut e mitx'on no txay ti', caytu' ok e yut e yiontek eb anima ayin, ẍi Cham bay eb.

20Max bekxac'al can eb is txim yet jun bek tu'. Yuj cuywi eb, xan max tzakloj eb yintak.

21Max beytoj janic'xa, axa max yilon yin cawanxa yuẍtak c'apax ba, a ton Jacobo yetok Juan, eb c'ajol Zebedeo. Ayoc eb yul barco yetok is mam. Lanan sayon yil eb is txim, yet max awtelay eb yuj Jesús. 22Yet-xac'al c'apax jun bek tu', max bekcan eb is barco c'al is mam eb tu', cax max oc eb cuywomok Jesús.

Chi cuywaj Jesús xol xiwil anima

(Lc 6.17-19)

23Bay masanil yulak yet Galilea max ec' Jesús yetok eb. Max ec' Cham cuywaj yulak nail bay chi wajbaj ba eb israel yin culto, cax chi yaloncan el watx' abix, tzetbil chi yun yoc eb yul k'ab Cham aj satcan. Max jaycan c'ul masanil mactxel ya'ay yuj tzanc'al tzet ilya'il yuj Cham. 24Masanil anima yul yet Siria max aben k'umal Jesús, xan max yi jay eb eb ya'ay yuj tzanc'al tzet ilya'il bay Cham. Yetok eb ayoc espíritu yob yin, yetok eb chabil oybinak sat yuj, c'al eb sicbinak el is mimanil, max ilaytek eb masanil bay, cax max jaycan c'ul eb masanil yuj. 25Xiwil anima aj Galilea max tzakloj yintak Cham, c'al eb aj Decápolis, eb aj Jerusalén, c'al eb aj Judea, yetok eb aj k'axepaltok a' Jordán.

Currently Selected:

Mt 4: ATBYK89

Highlight

Copy