Mt 22
22
Yabixal jun nupayil
(Lc 14.15-24)
1Max yaltek Jesús junxa abix ti' bay eb axca ti':
2Ok waltek ayex tzet chi yun yeloc eb anima chi oc yul k'ab Cham aj satcan. Ay jun rey max yaoc k'inal jun is c'ajol yet max nupayi. 3Maxc'al chail yich jun k'in tu', cax max chekontok eb is chekbej toj yawten eb awtebilxata'a. Palta maj jay eb t'inanc'alta' jay bay jun k'in tu'. 4Yuj tu xin, max yalon bay juntzanxa is chekbej axca ti': Asek, al bay eb awtebilxac'alta' wuj tu', tol watx'xa yayji loj ok lo eb cayti'. Mayal wak' ak'lay cam jayc'on wacax, caw bak'ech. Caw watx'xa yayji masanil, xan as alek bay eb, tol chi tit eb yin aymanil bay jun nupayil ti', ẍi cham rey tu' bay eb. 5Max toj eb chekbej tu' toj yaloni, palta majc'alta' yikej eb awtebil tu' jayi. Ay jun tol max toj yilcan yawoj bay is tx'otx'. Ay junxa max toj yilcan is negocio. 6Axa juntzanxa eb xin, max mitx'laycan eb chekbej cham rey tu' yuj eb, ya' max ec' eb yuj eb, masantac'al max yal cam eb. 7A yet max yaben aj cham rey tu', caw wal max tit yowal cham. Yuj tu' xan max chektok cham juntzan eb is soldado, yuj yak'lay cam juntzan anima tu', cax max nislaycan tz'a conob eb. 8Max lajwi tu xin, max yalon cham bay juntzanxa eb is chekbej axca ti': Watx'xa yayji masanil tzet t'inan chi k'anabax yuj jun nupayil; palta a eb awtebil tu', man mojok eb jayi. 9Yuj tu xin, asek yulak calle. Jantakc'al mac che yil yin, che chektek bay jun k'in ti', ẍi bay eb. 10Max toj juntzanxa eb chekbej tu' yulak calle xin. Xiwil mac bay max yal eb. Aylaj eb yob, aylaj eb watx' max jayocok. Jun bek max noj jun na bay ayoc k'in tu'.
11Axa yoctok cham rey tu' yul na, yuj yilon eb max jay tu'. Axa max yilon cham tol ay jun winak c'am oc pichilej yet nupayil tu' yuj.*fn* 12Xan max yal cham bay: Ach amigo, ¿tzet yuj xan comonc'al chach octek bay k'inal nupayil ti'? Ilab tol c'am oc a pichil yet nupayil, ẍi cham bay. C'amxac'al tzet max yal nak. 13Axa yalon cham rey tu' bay juntzan eb is moso ayic' yetok bay tu': C'alek yakan jun winak ti', c'al is k'ab, cax che yion ajok, chi toj e k'okoncan eltok xol k'ekk'inal yina. A bay tu' ok ok'ok, cax ok natx'atx'ok ye yuj yail, ẍi cham. 14Chi yal elapnok jun abix ti', tol xiwil mac awtebil yuj Dios, palta jaywannej mac sic'bil elok, ẍi Jesús bay eb.
Ch'en tumin chi k'anlay yuj yajaw
(Mc 12.13-17; Lc 20.20-26)
15Catatu' bian, max beson el ba eb fariseo tu'. Max naobtanen eb yin Jesús, yuj yak'len eb yikban yayc'ay Cham yuj junok tzet yetal chi yala', cax chi yak'on queja eb yaloni. 16Yuj tu' xan max chektok eb jaywan is cuywom bay Jesús, yetok jaywan eb is partido Herodes.*fn* Max bet yalon eb axca ti':
—Meẍtol, jojtak sic'libil tol yelc'al chala'. Jojtak c'apaxok, tol yelc'al chot c'apax cuywaj a ba yin jun beybalej chi yochej Dios. Cax jun lajanc'al chot pax a c'ul yin anima, yujtol lajanc'al yelapnok eb yul a sat. 17¿Tzet cachi ach ti'? A ch'en tumin chi k'anlay el ayon yuj cham yajaw bay Roma, ¿ay mi leyal chi jak'a', ma c'amak cha na'? ẍi eb bay.
18Palta yojtakxa Jesús tol man watx'ok tzet lanan naon oc eb yin. Yuj tu' xan max yal bay eb axca ti':
—Ayex ti' caw wal cabsat ex. ¿Tzet yuj xan che yak'lej in e yikban ayc'ayok? 19Tx'oxek ch'en tumin chi ak'lay bay cham yajaw tu' ayin, ẍi bay eb.
Axa tx'oxon eb jun denario ch'en tumin tu' bay. 20Axa k'anlen bay eb tu':
—¿Mac ay yechel sat ayoc yin ch'en ti'? ¿Mac ayoc is bi yin ch'en? ẍi bay eb.
21—A ton yechel cham yajaw bay Roma, c'al is bi cham, ẍi eb.
—Ak'ek tzet yetal yetc'alta' cham yajaw tu' bay xin, axa tzet yetal yetc'alta' Dios, ak'ek c'apax bay, ẍi bay eb.
22A yet max yaben eb juntzan tu', toc'al max c'ayaj c'ul eb. Axa yel eb c'atan Cham tu' cax max toj eb.
Eb chi aloni tol maj ictzoj aj eb camnak
(Mc 12.18-27; Lc 20.27-40)
23Ac'aloc yet jun c'u tu', ay juntzan eb saduceo max apni oc bay Jesús. A eb chi aloni tol c'am chi ictzoj aj eb camnak. Yuj tu' max k'anlej eb bay Cham axca ti':
24—Meẍtol, max yalcan Moisés yul tx'an Un max tz'ibejcan axca ti': Ta ay junok winak c'amto yuninal chi eli, cax chi cami, yowalil a junokxa yuẍtak chi ioncan aj yistzil nak camnakxa tu', cax chi el yuninal yetok ix, axca tu xin, chi yiil nak yinatil yuẍtak tu', ẍican Moisés. 25A junel, a co xol on ti', ay ukwan winak yuẍtakc'al ba. Max oc yetbi nak babel winak, palta max camtok nak. C'am junok yuninal nak max elcanok. Axa nak tzunan yintak nak tu', a' max ioncan yistzil. 26Palta max campax nak uẍtakejal tu', ac'ala' c'am junok yuninal nak max elcanok. Ac'ala' caytu' max yun nak yet is yox, masantac'al max yal yilen eb nak yukwanil ix ix tu', ac'ala' max yun eb nak. 27Lajwi camtok eb nak yukwanil xin, axa cam c'apaxtok ix ix tu'. 28A yet ok ictzoj aj eb camnak tu xin, ¿mactet junok eb nak ukwan ti' ay yistzil ix ix tu' sic'libil? Yujtol max yilejc'al eb nak ix yukwanil, ẍi eb.
29Axa yalon Jesús bay eb saduceo tu' axca ti':
—Ayex ti' che yak' c'aytok e ba, yujtol man e yojtakok tzet ẍi tx'an Un Tz'ibbilcanok. Tamwal e yojtak c'apax jantak yipal Dios. 30Yujtol a yet ok ictzoj aj eb camnak, tok okto yilej ba eb. Tok ayto mac ok yatok cutz'in alibejal, yujtol axcaxac'al eb ángel bay satcan caytu' ok yun eb. 31Mantoc'al e yojtakok paxok, tol ok ictzoj pax aj eb camnak. ¿Tom c'amto che yil yul tx'an Un Tz'ibbilcanok yuj tzet albilcan yuj Dios, bay chi yal axca ti': 32Ayin ti' is Diosal in Abraham, Isaac, c'al Jacob, ẍi canok. Yuj tu' xan jojtak tol maj c'ayil eb, yujtol max yalcan Dios tol is Diosal eb yayji?
33A yet max yaben eb anima juntzan ti', caw wal max c'ayaj c'ul eb.
A jun chekbanilej ec'ban yelapnok
(Mc 12.28-34)
34Axa yet max yaben eb fariseo tol maj je' paktzen eb saduceo bay Jesús, max wajban oc bulan ba eb yin. 35Ay jun xol eb tu' caw meẍtol yin ley Moisés. Max yochen max yikbaj ayc'ay Jesús, cax max tz'akonnaj k'anlej bay Cham axca ti':
36—Meẍtol, ¿mactet junok chekbanil yul ley Moisés ec'ban yelapnok yintak masanil? ẍi bay.
37Max yalon Jesús:
—Camc'ulnejek Cham Jajawil co Diosal yin masanil e c'ul, c'al yin masanil e yanimail, c'al yin masanil e nabal, ẍi. 38A ton jun chekbanil ti' ec'ban yelapnok yintak masanil. 39Ay junxa chekbanilej txenxanej man lajanok yelapnok axca jun ti', tol chi yal axca ti': Che ya'ilnej e yet animail, axca che yut e ya'ilnen e ba junjun ex, ẍi. 40Ta chi jikej cab chekbanil ti', axca wal tol lanan jiken masanil chekbanil Dios, c'al masanil jantak tzet tz'ibbilcan yuj eb is chekbej, ẍi bay.
A Cristo, C'ajol Dios
(Mc 12.35-37; Lc 2.41-44)
41Wajanto ec' eb fariseo tu', cax max k'anlen Jesús bay eb:
42—¿Tzet che na' yin Cham Cristo? ¿Mac ay yinatil che na'? ẍi bay eb.
—Yinatil David, ẍi jun bay.
43—Palta a David tu', ak'bil yal yuj Yespíritu Dios tol a jun Cristo tu', Yajawil David yayji. Chi yal axca ti':
44Max yal Dios Jajawil bay Cham Wajawil axca ti':
Ayan chotan bay in watx' k'ab ti',*fn* masantac'al ok wacan oc eb ajc'ul oc en yalan akan, ẍi Dios bay Cham Wajawil, ẍi David.
45Xan caytu' max yut yaloncan David, tol a Cham Cristo is Yajawil yala'. Yuj tu' txequel tol man asannejok tol yinatil David yayji Cham, ẍi bay eb.
46C'am junok eb max je' paktzen tzet max yal Jesús. Yuj tu' xan yettaxc'al tu', c'am junok mactxel chi tec'baj ba k'anlen junokxa tzet yetal bay.
Currently Selected:
Mt 22: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989
