Mt 10

Max siq'uil Jesús eb lajcawan

(Mc 3.13-19; Lc 6.12-16)

1Catatu' max yawtentek Jesús eb is lajcawan cuywom, cax max yak'on yikbej eb yin iojcan el espíritu yob yin anima. Max yak'on c'apax can yikbej eb yin ak'oj jay c'ul anima yin tzanc'al tzet ilya'il, c'al yin tzanc'al tzet yailal.

2Tixtakc'al yoc is bi eb lajcawan ti': Simón, a ton chi al-lay Pedroal, yetok jun yuẍtak chi yik Andrés, Jacobo yetok c'apax jun yuẍtak chi yik Juan. A eb cawan tzunan ti', c'ajol Zebedeo eb. 3Ay jun chi yik Felipe, ay jun chi yik Bartolomé. Ay jun chi yik Tomás. Ay jun chi yik Mateo, a ton jun tekom el tojlabal yet yalantok. Ay junxa chi yik Jacobo, c'ajol Alfeo. Ay jun chi yik Tadeo. 4Ay junxa chi yik Simón, a ton ayoc yetok eb cananista yet yalantok. Ay jun chi yik Judas Iscariote, a ton max aon oc Jesús yul k'ab camich.

Max chektok Jesús eb lajcawan yuj toj yal-lay el is k'anejal

(Mc 6.7-13; Lc 9.1-6)

5Max cheklaytok eb lajcawan ti' yuj Jesús, palta a yet c'amto chi toj eb, max yalon juntzan chekbanilej bay eb axca ti': Manchak ex ec' bay juntzan lugar bay cajan eb man israelok. Tamwal bay juntzan conoblak yul yet Samaria. 6Asan bay eb c'aynakto tok xol eb jet israelal chex eq'ui. Yujtol axca wal junok calnel chi c'ayic'ok, caywal tu' yayji eb. 7Chi ec' e yalilok tol a Cham Yajaw bay satcan toxa ok txecloj wal is yikbej. 8A eb ya'ay yuj lepra, che yican el jun ilya' tu' yin eb, c'al jantak eb ya'ay yuj tzanc'al tzet ilya'il. Che yictzonejcan aj eb camnak, cax che yioncan el espíritu yob yin anima. Toc'al chi wak' jun ikbej ti' ayex, xan manchak e k'an e tojol bay eb bay ok e yak'balnej tu'.

9C'amc'al jabok tzet che yi' chex toji. Xe yita ch'en oro, ma ch'en plata, tamwal junok centavo che yi', 10tamwal e moral yuj e lobej yul e be. Asan e pichil ayocok chex toji. C'am che yi' junokxa mojan e xanab, tamwal e k'okoch. Chi wal juntzan ti ayex, yujtol masanil mulnajwom moj chaon is gasto.

11A yet chex apni bay junjun conob c'al bay junjun aldea, a bay yatut junok mactxel watx' is beybal chex ayji, masantac'al chex toj bay junokxa lugar. 12A yet chex apni oc bay junjun na: Ayokab oc junc'ulal Dios e yetok, quex chi bay eb. 13Ta moj eb chaon junc'ulal Dios tu', ok jay yiban eb. Ta man mojok eb, man ok jay yiban eb. 14Ta c'am chex chalay yuj eb, cax c'am chi cha eb yab tzet che yala', che tziccan el pokokal e yakan,*fn* chex el bay yatut eb tu', c'al yul conobal eb tu'. 15Wal yel chi wal ayex, a yet ok jay jun c'ual beyc'ulal, miman yailal ok cha' eb maj ex chaon tu', yintak eb anima aj conob Sodoma c'al Gomorra.

A yailal ok jay yiban eb yet-xa Cristo

16Ilabi, chex in chektok xol anima axca calnel xol no ok. Yuj tu', jelanc'al che yut e ba axca wal junok labaj caw jelan. Palta manso che yut e ba axca no paloma. 17Che yilc'al e ba xin, yujtol ay eb ok ex iontok satak yajaw, cax ok ex mak'lay yuj eb yulak nail wajayil eb jet israelal yin culto. 18Toltax satak eb mimek yajaw ok ex yitok eb, c'al satak eb rey, palta wujc'al. A bay tu xin, ok je' e yaloncan el wabixal, c'al bay eb man israelok. 19A yet ok ex ilaytok satak eb yajaw tu', manchak ex oc il yuj tzet ok e yala', yujtol a yet jun bek tu', a Dios ok ak'on nachaj el e yuj tzet ok e yala'. 20Mayexnak ok ex k'anjabok, palta tol a Yespíritu co Mam Dios ok majanen e ti' cax ok k'anjab el e yin.

21A yet jun tiempoal tu', ay eb uẍtakejal ok yaoc yuẍtak yul k'ab camich. Ay c'apax eb mamej ok yaoc yuninal yul k'ab camich. Ay bay xin, ok yak'lej eb uninalej owal yetok is mam c'al is txutx, cax ok yaon oc eb is mam c'al is txutx tu' yul k'ab camich. 22Masanil anima ok tit yowal e yin wujc'al; palta a mac ok techaj yuj masanil, ok colchajok. 23A yet yob chi yut ba eb ayex bay jun conob bay ayex ec'ok, elanek ajok, cax chex toj bay junokxa conob. Wal yel chi wal ayex, c'amtoc'al chi lajwi e yec' bay masanil conoblak eb jet israelal, cax ok in jay pax junelxa ayin Chekbilintek yuj Dios xol eb jet animail ti'.

24C'am junok cuywom ec'ban yelapnok yintak is meẍtol. C'am c'apax junok mosejal ec'ban yelapnok yintak is patrón. 25Tatol lajan junok cuywom yetok is meẍtol, watx' ton axca tu' chi yunej. Cay c'apax tu' junok mosejal yetok is patrón. Ayin ti', axca tol aj na in, axa ayex ti' xin, axca tol uninalej ex. Ay mac chi aloni tol Beelzebú in. Toltax chi al-lay win axca tu', akxa ta e yin ayex ti'.

Asan bay Dios chon xiwi

(Lc 12.2-7)

26Yuj tu', manchak ex xiw bay anima, yujtol masanil jantak tzet makan ay tinani', ok txecloj ajok. Yetok jantak tzet ewanc'uan yayji, ok ak'lay ojtaknelay elok. 27A juntzan tzet chi wal ayex yin ewantakil, alek el masanil bay anima. Yetok juntzan toc'al chin saj e yabej, alek el yulak calle. 28Manchak ex xiw bay eb chi je' ex yak'on camok, yujtol tok ok je' yak'on cam eb e yanimail. A bay Dios chex xiwi, yujtol chi je' yuj Cham ex yak'on camok, c'al yaontok e mimanil c'al e yanimail bay infierno.

29Iek eltek e nabal yin no coq'uiẍ tz'iquin, no' chi txonlay cac'on yin centavo. C'am junok no' comonc'al chi cami, ta c'am chi el yin c'ul co Mam Dios. 30-31Ayex ti', caw yel miman e yelapnok yintak no'. Toltax xil e jolom bisbil masanil yuj. Yuj tu' xan manchak ex xiwi.

Eb c'am chi q'uixwi yalon oc ba yetok Cristo

(Lc 12.8-9)

32Tzanc'al mactxel c'am chi q'uixwi yalon el satak anima tol wet-xa, ok waloc eb wetok satak co Mam Dios. 33Palta a eb chi alon satak anima tol man wetok, satak co Mam Dios ok waloni tol man wetok eb.

Ay mac ok yak'lej aj owal yujc'al Cristo

(Lc 12.51-53; 14.26-27)

34Manchak e na' tol ak'oj junc'ulal max quin jay xol anima bay yulyibank'inal ti'. Man yujok yoc junc'ulal xol eb xan max in jayi. Palta yuj caklen aj ba eb. 35Max in jayi, yuj caklen aj ba nak winak yetok is mam, c'al yuj caklen aj ba ix uneej yetok is txutx c'al yuj caklen aj ba ix alibej yetok yalib. 36Yuj tu xan axac'al oc eb junnej nail yayji tu', ok caklej aj ba.

37A mac yelxac'al chi camc'ulnej is mam c'al is txutx wintak, man mojok yoc wetok. Ac'ala' c'apax eb yelxac'al chi camc'ulnej is c'ajol ma is cutz'in wintak, man mojok eb yoc wetok. 38A mac c'am chi tzakloj wintak, cax c'am chi yal c'ul chi yab yail wuj, caxc'al camich yin curus, man mojok yoc wetok. 39A eb asannej is cawil chi ya'ilnej yulyibank'inal ti', ok c'ayil is k'inal eb yin tojbalk'inal. Axa eb ok bek c'ulok cam wuj xin, a ton eb tu' ok cha k'inalej tol ayc'al yin tojbalk'inal.

Eb ok chaon paktzil bay Dios

(Mc 9.41)

40A eb chex chaoni, ayin chin is cha' eb. A eb chin chaon tu', lanan c'apax chaon eb Cham max quin chekontek. 41A mac chi chaon junok chekbej Dios, yuj wal tol a Dios cheknej, axca paktzil jun chekbej Dios tu' ok yi', cay c'apax tu' yet jun chi chaon tu' ok yi'. A mac chi chaon junok mactxel tol watx' is beybal, yuj wal tol watx' is beybal, axca paktzil jun watx' is beybal tu' ok yi', cay c'apax tu' yet jun chi chaon tu' ok yi'. 42Tzanc'al mactxel chi saon junok vaso siquila' yuc' junok eb in cuywom, yuj wal tol in cuywom, caxc'al a bay junok eb c'am wal yelapnok chi salayi, wal yel ok cha' paktzil a' siquila' tu',*fn* ẍi Jesús.

Currently Selected:

Mt 10: ATBYK89

Highlight

Copy