Lc 6

Max yaltek Jesús yuj c'ual xewilal

(Mt 12.1-8; Mc 2.23-28)

1A yet jun c'ual xewilal eb yet israelal, max ec' Jesús bay jun be xol juntzan ixim trigo yetok eb is cuywom. A eb cuywom tu', max yiel eb jayeb jolom ixim, max batzon el eb ixim c'uxu'. 2Axa k'anlen el juntzan eb fariseo bay eb axca ti':

—¿Tzet yuj xan che yun mulnajil tol ay yowalil junen yet jun c'ual xewilal ti'? ẍi eb bay eb.

3Axa yalon Jesús bay eb tu':

—¿Tom c'amto bay che yil yul tx'an Un Tz'ibbilcanok tzet max yun David junel, yet max tit is wajil yetok eb ajun yetok? 4Max octok yul templo Dios, yion aj ixim pan yet Dios yayji. Max loon yetok eb ajun yetok tu'. A juntzan pan tu', asan eb sacerdote ay leyal looni.

5—Ayin ti', chi je' walon tzet chi je' el junen yet c'ual xewilal, yujtol Chekbilintek yuj Dios xol eb jet animail, ẍi Jesús bay eb fariseo tu'.

Nak sicbinak el jun is k'ab max watx'jicanok

(Mt 12.9-14; Mc 3.1-6)

6A yet junxa c'ual xewilal, max octok Jesús yul jun nail wajayil eb yet israelal yin culto. Max c'oli cuywaj nan xol eb. Ay jun winak sicbinak el is watx' k'ab ayic' bay tu'. 7Axa eb meẍtol yin ley Moisés yetok eb fariseo, max mak eb yila' ta ok watx'nejcan Jesús is k'ab nak tu' yul c'ual xewilal, yujtol max yochej eb max ilchaj junok tzet max oc is mulok Cham, cax chi yak'on queja eb. 8Palta yojtakxa Cham tzet lanan naon oc eb yin, yuj tu' xan max yal bay nak sicbinak el is k'ab tu' axca ti':

—Ajan wanok, cax chach oc lecan co nan ti', ẍi bay nak.

Axa yaj lecan nak tu'. 9Max lajwi tu xin, max yalon Jesús bay eb axca ti':

—Ay jun tzet ok in k'anlej el ayex: ¿Baytet ay junok ay is leyal junen yet c'ual xewilal che na'? ¿A mi tzet watx' chi je' el juneni, ma a tzet yob? ¿Chi mi je' jak'on jaycan c'ul junok ya'ay, ma co bekon camok? ẍi bay eb.

10Max lajwi tu' max ec' t'ananok Cham xol eb oyan oc yin tu'. Max yalon bay nak axca ti':

—Bitok a k'ab, ẍi bay nak.

Max biontok nak k'ab, cax max watx'ji canok. 11Palta caw max tit yowal juntzanxa eb, axa lajtinen el ba eb tu' yuj tzet ok yut eb Jesús.

Max siq'uil Jesús eb is lajcawan cuywom

(Mt 10.1-4; Mc 3.13-19)

12A yet jun tiempoal tu', max toj Jesús txajlok bay jun tzalan. Jun ak'bal txajc'al max yun bay Dios bay tu'. 13Axa yet max k'inibi aj yet junxa c'ual, axa yawtentok eb is cuywom tu' c'atan, max sic'on el lajcawan xol eb, axa yaon oc yopiso eb tu' yuj yoc eb is chekbejok. 14Tixtak is bi eb ti': Simón, nak max yik c'apax Pedro yuj, yetok jun yuẍtak nak chi yik Andrés, yetok Jacobo, Juan, Felipe, Bartolomé, 15Mateo, Tomás. Ay junxa chi yik Jacobo c'ajol Alfeo, ay junxa Simón c'apax bi, ayoc yin is partido eb cananista yet yalantok. 16Ay jun chi yik Judas, yuẍtak Jacobo, yetok c'apax Judas Iscariote, nak max aon oc Jesús yul k'ab camich.

Jun bulan anima max oc oyan yin Jesús

(Mt 4.23-25)

17Max lajwi tu', axa yaytek Jesús yetok eb is cuywom bay jun tzalan tu'. Palan yayol eb bay jun ac'al. Xiwil anima max tit bay juntzan conoblak yul yet Judea max jayoc eb bay Cham. Ay eb max tit bay conob Jerusalén. Ay c'apax eb max tit bay tilak a' mar, bay Tiro yetok bay Sidón. Max ulic' eb abxalwok bay Cham. Ay eb xin, yuj watx'jican yuj junok is yailal, xan chi ulic' eb. 18A eb ok'bal c'ul yayji yuj eb espíritu yob, max jaycan c'ul eb yuj. 19Chi yochej eb masanil chi ec' oc matxan k'ab yin Jesús, yujtol chi watx'jican eb masanil yuj is yipalil Cham.

Eb watx' yet, c'al eb yob yet

(Mt 5.1-12)

20Axa yec' t'ananok Jesús xol eb is cuywom tu', max yalon bay eb axca ti': A ayex meba ex ti', watx' e yet, yujtol ayex oc yul k'ab Dios.

21A ayex ay e wajil ti', watx' e yet, yujtol ok nojcan e c'ul.

A ayex chex ok' ti', watx' e yet, yujtol ok ex tzewok.

22Wujc'al ayin Chekbilintek yuj Dios xol eb jet animail ti', xan ok chichon oc c'ul eb anima e yin, ok ex yuktej el eb xol, cax ok ex buchlay yuj eb. Wujc'al, xan caw yobc'al tzet ok yal eb e yin, palta a yet caytu' ok ex yut eb axca tu', caw watx' e yet.

23Tzalojanek wal sic'libil, yujtol ay tzet ok e cha' paktzilok bay satcan. Axca chex utlay ti' tinani', cay c'apax tu' max utlay eb chekbej Dios yuj eb anima yet payxa.

24Palta a ayex beyom ex, caw ok'bal ex c'ul, yujtol mayal e yil watx'takil cayti'.

25A ayex nojnak e c'ul ti', caw ok'bal ex c'ul, yujtol ok jay jun tiempoal ok e yak' wajil.

Axa mac ex chex tzew tinani', caw ok'bal ex c'ul, yujtol ok ex ok' yuj cusc'ulal.

26A yet watx' exxac'al yalon anima, caw ok'bal ex c'ul, yujtol caytu' max al-lay yin eb chi yaloc ba chekbejok Dios yuj eb jichmam.

Chi co camc'ulnej eb ajc'ul oc jin

(Mt 5.38-48; 7.12)

27Chi wal ayex mac ex lanan e yacban e txiquin ayin ti', tol che ya'ilnej eb ajc'ulok e yin. Ak'ek watx'c'ulal bay eb chi chichon oc c'ul e yin. 28A eb chi k'anontek yowal c'ul Dios e yiban, axaokabxa watx'c'ulal Dios che k'antek yiban eb. Chex txajli yuj eb chex buchoni. 29Ta ay mac chi mak'ontok jun pac'ok e sat, che yacbajtok jun pac'xa mak'a'. Ta ay mac chi tok'on ec' e jokan pichil, bekek c'apax tok e camiẍ yetok. 30Tzanc'al mac chi k'anon junok tzet yetal ayex, ak'ek bay. A eb chi ion ec' junok e tzet yetal, manchakxa e k'an meltzoj bay eb. 31Che yochej tol watx' chi yut ba eb e yet animail ayex, yuj tu' xan, watx'okab che yut e ba bay eb.

32Ta asan eb chex camc'ulneni che camc'ulnej, ¿xin ta watx' axca tu'? A eb yobtakwom, cay c'apax tu' chi beybalnej eb. 33Yetok c'apaxok, ta asan bay eb watx' chi yut ba ayex, watx' che yut e ba, ¿xin ta watx' axca tu' che na'? A eb yobtakwom, cay c'apax tu' chi beybalnej eb. 34Ta asan bay mac chi ak'on meltzoj e tumin, che yak' majanil, ¿xin ta watx' axca tu'? A eb yobtakwom chi yak' c'apax eb is tumin majanil bay eb yet yobtakwomal, yujtol chi na eb chaon pax junelxa. 35Palta ayex ti xin, camc'ulnejek eb ajc'ul oc e yin. Ak'ekc'al watx'c'ulal. A yet che yak'on e tumin majanil, man e na' e chaon q'uexel. Ta che beybalnej axca tu', caw miman tzet ok e cha' q'uexelok bay satcan, cax chi txecloj c'apax elok tol yuninal exxa c'apax Dios, Cham Axac'al Ocok. Ilab chi tx'ox Cham watx'c'ulal bay eb yobtakwom, eb tamwal chi yal yuj diosal jabok yuj tzet chi cha' bay. 36Ok'okab e c'ul yin e yet animail, axca chi yun yok' c'ul co Mam Dios e yin.

C'am chi je' co beyc'ulnen junokxa mactxel

(Mt 7.1-5)

37Manchak e beyc'ulnej junokxa mactxel, yet watx' c'am chex beyc'ulnelay yuj Dios. Man comonok che yal tol ay mul junok mactxel, yet watx' c'am chi yal Dios tol ay e mul c'apaxok. Joek c'ay yowal e c'ul yin e yet animail, cax ok joon c'ay Dios yowal c'ul e yiban. 38Ak'ek bay e yet animail; ta caytu' ok e yutej, ok yak' c'apax Dios ayex. Axca wal junok tzet yetal tz'akaki chi yun yechelay bay e net teq'ueq'ui chi yunej, bululi chi yunej, c'amxa chi je' pixlay ti' is netal, caytu' ok yut yak'on Dios tzetak yetal ayex. Axca che yut e yak'on bay e yet animail, caytu' ok yut yak'on c'apax Dios ayex.

39K'inalok ay junok mac c'am chi je' yilwi, ¿xin ta chi je' quetzon bey junokxa c'am chi je' yilwi? Chi tok'lejtok ba eb cawanil yul olan. 40C'am junok cuywom ec'ban yelapnok yintak is meẍtol, palta a yet chi lajwi is cuyoj, lajanxa axca is meẍtol tu'.

41K'inalok ay junok e yet animail chi toj junok c'ajil k'alem yul sat. Ayexxa xin, k'inalok ay pax junok patzab*fn* ayoctok yul e sat, ta c'am che yiltek tol ay te' ayoctok yul e sat, ¿tom ato wal jab k'alem ayoctok yul sat e yet animail tu' ok e yiltek? 42Ta ay junok te patzab ayoctok yul a sat xin, tok ok je' alon bay et animail axca ti': Jilto wali, jiiltek jun c'ajil k'alem ayoctok yul a sat tu', tok quex chi. Palta tatol caytu' che yut e yaloni, cabsat ex chi yal tu'. Iek eltek jun te patzab ayoctok yul e sat tu' babelal, catatu bian, ok je' e yilon e yion eltek jun c'ajil k'alem yul sat e yet animail tu'.

A co beybal chi tx'oxon elok tzetbil yili co nabal

(Mt 7.17-20; 12.34-35)

43A te te' watx', c'am junok te yob sat chi yak'a'. Ac'ala' c'apax te yob, c'am junok te watx' sat chi yak'a'. 44Yuj sat junjun te' chi yak'a', xan chi jojtaknej el te' tzet teal te'. K'inalok junok te q'uix tinani', tokwal sat higo chi yak'a'. K'inalok c'apax junok te cak q'uix tinani', tokwal sat uva chi yak'a'. 45A mac watx' is nabal, watx' tzet chi el yuneni, yujtol asan tzet yetal watx' ay yin is nabal. A pax eb yob is nabal xin, yob c'apax tzet chi el yunen eb, yujtol asan tzet yob ay yin is nabal eb, yujtol a tzet ay yin co nabal, a' chi jala'.

Yowalil chi jikej tzet chi yal Jesús

(Mt 7.24-27)

46¿Tzet yuj xan, Mamin Wajaw quex chi ayin, palta c'am che yikej pax tzet chi wala'? 47Ok waltek ayex tzet ok yun yeloc eb chi abxalwi ayin, ta chi yikej eb tzet chi wala'. 48Lajan ok yun yeloc eb axca junok winak chi watx'nej yatut. Chi jupanej tx'otx' masantac'al chi ayapnok bay tx'otx' caw sat,*fn* cax chi yaon ay yich. Chi lajwi watx'ji yuj xin, chi c'oli yeq'uel elom aej yinlak, chi aj can a', ow chi yun mak'on oc ba a' yichlak, palta c'amc'al jabok chi bili, yujtol caw wal watx' yay yich. 49Palta a eb c'am chi yikej pax tzet chi wal bay, yet chi xew yabxalwi ayin, lajan eb axca junok mactxel toc'al chi chotbaj ay yatut sat tx'otx'. C'am yich chi yatok yul tx'otx'. Chi lajwi watx'ji tu', chi c'oli yeq'uel elom aej yinlak jun na tu', chi aj can a'. Ow chi yun mak'on oc ba a' yichlak. Ayman chi telc'oj jun tu', cax chi etax ayok, ẍi Jesús bay eb.

Currently Selected:

Lc 6: ATBYK89

Highlight

Copy