Jn 2

Jun nupayil max oc bay conob Caná

1Cabjial lajwi jun tu', max oc jun nupayil bay conob Caná, bay yul yet Galilea. Max bet txutx Jesús bay jun nupayil tu'. 2Max bet c'apax ec' Jesús yetok eb is cuywom, yujtol awtebil eb. 3Max lajwi aj vino, yuj tu' xan max yal is txutx Jesús tu' bay axca ti':

—Mayal lajwi is vino eb, ẍi.

4Axa yalon Jesús:

—Txutx, ¿tzet yuj xan a ayin chala'? C'amto chi ajapnok tiempoal in tx'oxon el wipal xol*fn* anima, ẍi bay.

5Axa yalon is txutx tu' bay eb chi ak'wi serbil tu' axca ti':

—Che yikejc'al masanil tzet ok yal Jesús ayex, ẍi bay eb.

6Ay wakeb ch'en k'uchbal yetc'alta' aej ayic' bay tu'. Chi mi toj oyebok, ma wakebok moc aej yul junjun. Netal ya' eb yet chi tx'ajil eb is tzetak yetal axcata' beybalej. 7Axa yalon Jesús bay eb chi ak'wi serbil tu' axca ti':

—Ak'ek noj juntzan net ti' yetok aej, ẍi bay eb.

8Axa yet max noji, max yalon Jesús bay eb axca ti':

—A tinani xin, letxek ajtek jabok, cax che yak'on bay nak chi ilon lojal nupayil ti', ẍi bay eb.

Axa yak'on eb bay nak tu'. 9A yet max yablen nak yuq'ueni, mayal oc vinoal. Maj yojtaknej el nak baytal max ca tit jun vino tu', axa eb chi ak'wi serbil tu', yojtak eb, yujtol a eb max letxon ajtek. Axa nak chi ilon lojal nupayil tu' max awten nak chi nupay tu'. 10Max yalon bay nak axca ti':

—A is beybal anima, a vino watx' yuq'ui, a chi yak' eb uc'lay yin babelal. A yet mimanxa an chi yuc' eb, catatu' chi ilay eltek vino ay wal chi yal yuq'ui, palta achxa ti', max a yanejcan jun vino watx' yuq'ui, cax tzunanxa cheiltek uc'layok, ẍi nak chi ak'on cuenta masanil tu'.

11A bay conob Caná, yul yet Galilea, a tu' max tx'ox Jesús jun milagro ti'. Babel milagro jun max tx'ox ti'. Cayton tu' max yut tx'oxon elok tol miman is mayk'ak'al, cax max yaon oc eb is cuywom c'ul yin Cham.

12Lajwic'al tu', max toj Jesús bay conob Capernaum. Max toj is txutx, c'al eb yuẍtak c'al eb is cuywom yetok. Max ayji ec' eb jayeb c'u bay tu'.

Max uktelay eltek eb txonjom yul templo Dios

(Mt 21.12-13; Mc 11.15-18; Lc 19.45-46)

13Lananxa jay jun is k'in eb israel chi yik Pascua. Yuj tu' xan max toj Jesús bay Jerusalén. 14A yet tu' max octok yul yamak'il templo Dios. Axa max yiloni, ay eb chi txonwi wacax. Ay eb chi txonwi calnel. Ay eb chi txonwi paloma. Ay eb xin, q'uexoj tumin chi yunej.*fn* 15A yet max yilon axca tu', max watx'nen jun tx'an yuj yoc mak'balok, max yukten eltek eb masanil yul yamak'il templo Dios, yetokc'al no calnel tu', c'al no wacax. Max mak'on el tiẍnaj is tumin eb q'uexom tumin tu' sat meẍa. Max tenon c'apax aj pac'labok meẍa eb. 16Cax max yalon bay eb chi txonon no paloma tu' axca ti':

—Iek el juntzan tz'iquin ti'. Manchak e yut yatut in Mam ti' txonbalil, ẍi bay eb.

17Axa naontek eb is cuywom tu' tzet albilcan yul tx'an Un Tz'ibbilcan bay chi yal axca ti': Caw pitz'an oc in c'ul in ya'ilnen a templo, ẍi.

18Axa yalon eb yajaw bay Judea tu' bay Jesús axca ti':

—¿Tzet milagroal junok cha tx'ox ayon, yet watx' chi jojtaknej elok tol ay alon et onen juntzan ti'? ẍi eb bay.

19Xan max yal bay eb axca ti':

—Ta che yak' lajwok jun templo Dios ti', yin cabjial chi aj pax wuj junelxa, ẍi bay eb.

20Axa yalon eb yajaw tu' bay junelxa axca ti':

—A jun templo Dios ti', 46 abilxa c'oli watx'nelayi. ¿Xin ta chi watx'ji yin cabjial oj ach ti'? ẍi eb bay.

21A templo Dios chi yaltek naon eb, palta titol a is mimanil chi yal paxok. 22Yuj tu' xan a yet max ictzonelay aj xol eb camnak, max naontek eb is cuywom tzet max yala', cax max yaon oc eb yin c'ul tzet tz'ib yayjican yul tx'an Un tu', c'al tzet max yal Jesús bay eb.

Yojtak Jesús beybal masanil eb anima

23A yet ayic' Jesús bay Jerusalén yuj k'in Pascua tu', xiwil mac max yaoc c'ul yin Cham, yujtol max yil eb juntzan milagro max tx'oxo'. 24Palta maj yaoc Cham eb yipok c'ul, yujtol yojtakxa Cham nabal masanil anima. 25Man yowalilok ay mac chi alon bay Cham yuj tzet chi na junok mactxel, yujtol yojtak tzet chi ec' yul co c'ul junjun on.

Currently Selected:

Jn 2: ATBYK89

Highlight

Copy