Heb 2
2
Manchak co bek ilnejek co colbanil
1Yuj tu', yowalil chi jaoc co nabal yin juntzan cuybej abbilxa juj. Ta c'amak, ay is may jab jabil ok on c'aycantok. 2A is k'anej Dios yalnakcan bay eb ángel payxa, toltac'a max yunej. Ay eb max oc is yobtakil, cax max tenon eb tzet chi yala'. Yuj tu', max alay oc is yailal eb axca wal is mojalil. 3Ta max alay oc yailal eb tu', ¿tzet wal ok jut co colon co ba ayon ti', ta chi jiel co nabal yin co colbanil caw miman yelapnok ti'? A wal Cham Jajawil babel alnej yabixal co colbanil ti'. Axa eb max abeni, tx'oxnak el eb, tol yel jun abix ti', cax max yalon eb ayon. 4Ac'ala' c'apax Dios, yak'nak ba testigoal yin jun abix ti'. Tx'oxnak juntzan milagro, c'al juntzan tzet chi c'ayaj co c'ul yuj yet chi jiloni, yet watx' chi tx'oxk'abnej elok tol miman yelapnok jun abix ti'. Ilab c'apax Cham is Yespíritu, chi yak' c'apax ba Cham testigoal yin, yujtol chi yak' Cham jopiso junjun on, atac'ala' tzet opisoal chi yal c'ul Cham chi yak' ayon.
Max occan Jesucristo animail
5Ti wal chi waltek yuj junxa yulyibank'inal tolto ok jayok. A jun yulyibank'inal tu', man yulok k'ab eb ángel ok yak' Dios. 6Yujtol a yul tx'an Un, ay bay chi yal axca ti':
¿Tzet jelapnok ayon anima on ti', xan chon a natek, cax nanon yec' a c'ul yuj co watx'ilok?
7Yaynakil janic'ok yintak eb ángel max con ot a watx'neni. Palta ach max ak' mimanbilal c'al mayk'ak'al ayon. Max ak' jikbej yiban onben.
8Max acan oc masanil tzet yetal watx'nebil oj yul co k'ab, ẍi yul tx'an Un tu'.
Yuj tu', a yet max yaon oc Dios masanil tzetak yetal yul co k'ab, c'am junok tzet yetal tol maj yak' ayon. Asan tol a tinani', c'amto chi jila' ta masanil ayoc yul co k'ab. 9Palta chi jiloc yin Jesús, Cham max utlay yaynakil janic' tiempoal yintak eb ángel yuj Dios, yet max oc animail. Yuj watx'c'ulal Dios, xan max el yin c'ul cam Jesús jujc'al co masanil. Axa tinani' xin, caw ec'ban watx'il max utlay Cham, cax miman yelapnok Cham, yujtol max yab yail camich.
10Watx'nebil masanil tzetak yetal yuj Dios, yet watx' chi txecloj elok tol miman yelapnok Cham. Max cha' c'ul Cham tol a eb is yuninal, ay yalon yet eb bay is tzekekial. Yuj tu' xan moj tol chi tz'aknaj el Jesús yuj yaben yail, yujtol a Cham max tz'unon yich co colbanil. 11Ayon max on oc yetok Dios, junnej co Mam yetok Cham max on aon oc yetok tu', a ton Cham C'ajol Dios. Yuj tu', c'am chi q'uixwi Cham on yalon oc yuẍtakok, ma yanabok. 12Axca tu' yalon bay is Mam yul tx'an Un:
Ok walcan el abixal bay eb wuẍtak, bay eb wanab. A yet ok wajon ba eb, ok ach in bitnej xol eb, ẍi.
13Yalnak c'apax axca ti':
A Dios ok waoc yipok in c'ul, ẍi.
Max yalon c'apax junelxa:
Tix in ti' yetok eb wuninal max yak' Dios ayin, ẍi Cristo yul tx'an Un Tz'ibbilcan tu'.
14Ayon chon oc yuninalok Dios yetok Cristo, cambejal yayji co mimanil ti'. Yuj tu' xan yowalil max oc c'apax mimanil Jesús cambejal axca co mimanil ti', xan a yet max cam Cham, max yak' lajwok jun ayoc yikbej on yak'on camok, a ton nak diablo. 15A yet yalantok, axca tol mosejal jayji bay nak diablo tu', yujtol chon xiw co cami; palta a Jesús colnej on el tinani'. 16Wal yel, man yujok ul colon el eb ángel xan max ulic'ok, palta juj ayon yinatil Abraham on ti'. 17Yuj tu', yowalil lajan max utlay axca ayon uẍtakej on ti', yet watx' chi ok' c'ul jin, cax tojol chi yut yaon oc co ti' bay Dios, c'al yuj yak'on ba yin xajanbalil yuj yion el co yobtakil jin. 18Cax tutun acaw Cham max yab yail yet max ak'lay porobal Cham, xan a tinani' chi je' yoc Cham jetok yet chon ak'lay porobal c'apaxok.
Currently Selected:
Heb 2: ATBYK89
Highlight
Share
Copy
Want to have your highlights saved across all your devices? Sign up or sign in
Kanjobal (Q’anjob’al) © Sociedad Bíblica de Guatemala 1989