Heb 10

1A is ley Moisés tx'oxbanilej yayji yuj juntzan tzet tzakan jayi, mantonak juntzan acaw tu'. Yujtol a ley tu', c'am chi je' watx'nen oc eb chi yochej chi apni oc satak Dios yuj juntzan xajanbal chi ak'lay junjun abil tu'. 2K'inalok ta chi watx'ji oc eb yuj jun ley tu', xam oc waan juntzan xajanbal tu'. K'inalok ta yel chi sakbi eb yin is yobtakil yuj chi yak' eb xajanbal tu', man xam yobtakwomok eb chi yabej. 3Akxa xin, a juntzan xajanbal eb tu' chi ak'on natek eb is yobtakil yin junjun abil. 4Yujtol a is chiq'uil no toro tu', yetok chiq'uil no ach'ej chiwo tu', c'am chi je' yion el co yobtakil.

5Yuj tu', a yet max ulic' Cristo bay yulyibank'inal ti', max yal bay Dios axca ti':

C'am chochej no no' yin ofrendail tamwal ixim trigo, palta max ak' in mimanil.

6Tokwal ay no no' cha k'an yet chi tz'a yin xajanbalil, tamwal ofrenda yet chi tancan el mulej.

7Yuj tu' xan max wala': Tix in chin jay ti' ach in Diosal, yet watx' chi wun ochwan, axca ta tz'ibelaycan wabixal yul tx'an Un, quin chi, ẍi Cristo.

8A yet babelal max yala', tol c'am chi yochej Dios juntzan xajanbal tu', juntzan no no' chi ak'lay bay tu', c'al juntzan no' chi yak' tz'a eb yuj yion el is yobtakil tu', tamwal chi tzaloj c'ul yetok. Caytu' max yut yaloni, caxc'al chi yal yul ley tol chi ak'lay juntzan tu' bay Dios. 9Max lajwi tu' max yalon pax Cristo axca ti': Tix in ti' ach in Diosal, yet watx' chi wun ochwan, ẍi. Chi yal elapnok, tol ok ul yak' lajwok yopiso juntzan xajanbal tu', yuj yak'on junxa xajanbal q'uexelok. 10Yujtol a Jesucristo max yak' acaw is mimanil yin xajanbalil yin junelnej, axca chi yochej c'ul Dios, xan a yuj jun xajanbal tu', chon can yin watx'il yul sat Cham.

11Masanil eb sacerdote, waan aj eb yin watx'nen eb yopiso junjun c'u. Cac'al ti' yak'on eb juntzan xajanbal tol c'am chi je' yion el co yobtakil. 12A pax Jesucristo xin, junch'an xajanbal yak'nak yuj co yobtakil yin junelnej. Lajwi tu', max toj ay chotan bay watx' k'ab Dios. 13A tu' lanan yechbaneni, masantac'al chi can eb ajc'ul oc yin, yalan yuj Dios. 14Yuj jun xajanbal yak'nak tu', xan tz'aknajnak on el yin tojbalk'inal, yujtol max ilay el masanil co yobtakil jin yuj. 15Chi yak' ba Cham Espíritu Santo testigoal ayon yin juntzan ti', yujtol chi yal yin babelal axca ti':

16Tix ok wut in trato yetok eb yinatil israel yet yajtok tu': ayin wal caw Yajaw in chi wala' tol ok waoc juntzan in chekbanil yin yanimail eb, axca tol ok in tz'ibejcan oc yin nabal eb, ẍi.

17Max lajwi yalon jun tu', cax max yalon pax axca ti': C'amxa bak'in ok in natek is mul eb c'al is yobtakil eb, ẍi.

18Yuj tu', a yet mayal ak'lay lajwok co yobtakil, manxa yowalilok chi jak' junokxa xajanbal yuj co yobtakil tu'.

Co jitzek oc co ba c'atan Dios

19Yuj tu' ex wuẍtak, ex wanab, manchak on xiw joctok bay jun lugar asan Dios ay yet, yujtol yuj chiq'uil Jesucristo chi je' joctok. 20Chi je' co toj yul jun ac' be, a ton jun yet k'inalej max jakcan Cham ayon, yet max ay nic'naj an cortina. A an cortina tu', chi tx'oxtek is mimanil Cristo. 21Ay jun co sacerdote miman yayji ocok ayon yuninal onxa Dios ti'. 22Yuj tu', co jitzektok co ba bay Cham yin masanil co c'ul. Jaek oc Cham yin co c'ul sic'libil, yujtol sakbinebilxa janimail yuj, yet watx' c'amxa xiwc'ulalil ayoc yin yikbomal co nabal yuj co yobtakil, cax sakbinebilxa co mimanil yetok jun acaw sak aej. 23Tec'an chi jut jaon oc yipok co c'ul jun co cuybanil chabil juj. C'amokab co cabc'ulalil, yujtol a Dios, ok yunc'alta' is ti' yak'nakcan ayon. 24Co say tzet chi jut jiptzelen co ba, yet watx' chi aj can co camc'ulal, cax chi watx'jic'al oc co beybal. 25Manchak co bekay co wajban co ba, axca beybal juntzan eb co xol. Yowalil chi jiptzelejek co ba. Jak'ek jip, yujtol lanan jilon juntzan yechel chi tx'oxon tol toxa chi jay c'ual jayubal Cham Jajawil.

26A tinani', jojtakxa jun cuybej caw yel. Yuj tu', ta ac'ala' jaon oc co nabal junen yobtakil, c'am junokxa xajanbal chi je' cam yuj co yobtakil junelxa. 27Ta axca tu', asanxanej jun yailal ay is may chi jechbanej chi yal tu', c'al k'ak' k'ak' chi nilxi, moj wal caw chon xiw yuj. A k'ak' k'ak' tu' ok ak'on lajwok el eb ajc'ul oc yin Dios. 28Ta ay mac c'am chi iken ley Moisés, cax ta ay pax cawanok ma oxwanok testigo chi ilon tol c'am chi yikej, tojol cami, yin c'amxac'al yabenc'ulal. 29Akxa tinani', ta chi jintaknejcan el Cham C'ajol Dios, ta c'am yelapnok chiq'uil Cham yul co sat, ta chi jiel q'uixwil Cham Yespíritu Dios chon camc'ulneni, ¿jantakto ec'ban yailal moj co chaon yintak eb maj iken ley Moisés tu'? Yujtol yuj is chiq'uil Cristo tu', xan yunnak trato Dios jetok. Yuj xan yet onxa Dios tinani'. 30Jojtak tol axca ti' yaloncan Cham Jajawil: Ayin ay walon wet waon oc is yailal eb. Ayin ok wiec' pak bay eb, ẍi. Cax yalnak c'apax axca ti': A Cham Yajaw ok beyc'ulnej is conob, ẍi. 31Caw wal ayxa is may ta chon ayc'ay yul k'ab Cham Dios iquis.

32Palta naektek yet yalantok, yet max e chaon sakk'inal yin e yanimail yin babelal. Caw tec'an e waay nan xol yailal, caw max e yak' e yip. 33Ilab tol ay ex max ex buchlayi, ay ex max ex etnelay satak conob. Ay ex xin, ya yoc max e yab yet max e yilon yoc yailal eb tu'. Jun lajan e yaben yailal yetok eb. 34Caw ok'nak e c'ul yin eb ocnak preso. Yin tzalojc'ulal max techaj e yuj yet max ilay ec' e tzetak yetal, yujtol max e natek tol a ayon ti' ay co tzetak yetal satcan tol ec'ban watx'il, cax tol c'am chi lajwi. 35Yuj tu', manchak e bekay tec'anil e waay tu'. Yujtol yuj, xan ok e cha' mimek paktzebal. 36Yowalil che tec'baj e ba, yet watx' ok je' e yunen masanil tzet chi cha' c'ul Dios, cax ok e chaon tzet yak'nak is ti' yak'on ayon. 37Yujtol chi yal yul tx'an Un axca ti':

Janic'xanej wali, cax chi jay Cham yowalil ok jayok, man ok ec' tiempoal jayi.

38A mac watx' yul in sat, ok ayjokc'al ec'ok yujtol chin yac'al oc eb yin is c'ul; palta ta chi meltzoj eb yintak, maj inxa tzaloj yetok eb, ẍi Dios yul tx'an Un tu'.

39Palta ayon ti', mayonnak chon meltzoj jintak, axca eb chi meltzoj yintak tu', cax chi c'aycan el eb junelnej. Yujtol ayon ti', chi jac'al oc yin co c'ul, yuj tu' chon colchaji.

Currently Selected:

Heb 10: ATBYK89

Highlight

Copy