Gn 41

Coc'alnebil el wayich cham rey yuj José

1Axa yet mayal ec'tok cab abil, ay jun c'ual max oc is wayich cham rey.

Max yila' tol lecan oc bay ti a' miman aej chi yik Nilo. 2A yul a' tu', a tu' chi ajol ukc'on no wacax caw wal watx', caw wal bak'ech, cax chi low no' xol ac'un bay is ti a' tu'. 3A yintak no' max ajol ukc'onxa no wacax caw wal baktakxac'al, yobxac'al yili no', max toj no' is cawilal no bak'ech tu'. 4Max oc ijan no baktak tu' chion aytok no bak'ech tu'. Max lajwi tu', cax max el wayan cham rey.

5Max way pax aj cham rey tu' junelxa. Max yilon cham tol ay jun liman yakan ixim trigo max ch'ibi, tol ukeb wal is k'ab, cax ukeb wal is jolom tol caw wal watx', nojnak wal el yuj is bak'. 6Max yilon pax cham yintak ixim babel tu' max elpaxtek ukebxa jolom trigo caw wal c'am is bak', naba takin soquinak, caw wal c'am is watx'il. 7A ukeb jolom trigo caw wal soctak tu', a' max c'uxon aytok ixim ukeb caw wal ay is bak' tu'.

Axa yet max el wayan cham rey max nachaj el yuj, tol wayich max yunej. 8Axa yet max sakbi xin, caw wal tacnak el is c'ul cham yuj is wayich tu'. Max chekon yawtelaytek masanil eb chi je' naon el k'anej bay Egipto c'al eb tz'akan ay c'ul yaloni, axa c'oli yalon cham rey is wayich tu' bay eb; palta tamwal junok eb tu', chi je' yalon tzet wal yelapnok is wayich cham tu'. 9Axa jun mac chi ak'on is vino cham rey, max alon bay cham axca ti':

—Ato tinani' chi tit yul in c'ul ay jun in faltail max oqui. 10A yet max tit owal win yetok nak yajaw yilomal watx'ji ixim pan, co cawanil, max on aoc yul k'ab cham yajawil eb chach tayneni, max on tojcan yul preso. 11Ay jun ak'bal max oc co wayich on co cawanil, junjunc'al co wayich on tu' ayc'al yelapnok. 12A bay tu', ayic' jun nak ach'ej tol hebreo, tol is chekbejben cham yajawil eb nak chach tayneni. Max jalon co wayich on bay nak, caw wal watx'c'al max yun yalon el nak co wayich on tu'. 13Axca wal yalon nak tu', caywal tu' max yun yelocok. Ilab tol max in meltzoj pax yin in mulnajil junelxa, axa junxa nak ajun wetok tu xin, max aj t'unan is mimanil nak, ẍi jun yak'omal vino cham rey tu'.

14Axa cham rey max chekon ilay eltek José yul preso. Yinxac'al aymanil max bet ilay eltek, cax max yak'on tzuklay el is xil, max q'uexon el is pichil, axa toj satak cham rey tu'. 15Max yalon cham rey tu' axca ti':

—Ay wal jun in wayich. C'am wal junok eb nak ay cayti' chi je' nachaj el yuj tzet yelapnok. Max wab wal a k'umal tolab chi nachaj el oj tzet yelapnok wayichej, ẍi cham rey tu'.

16—A jun tu' man yulok wet chi nachaj el wuj, palta tol a Dios ok alon tzet yelapnok a wayich tu' yet chi oc a watx'ilok, ẍi José.

17Cax max c'oli yalon cham rey is wayich bay José:

—Max wil wali tol lecan in oc bay ti a' Nilo. 18A yul a' tu', a tu' max ajol ukc'on no wacax caw wal watx', caw wal bak'ech, chi low no' bay is ti a' tu'. 19Tzakan yaj pax ul ukc'onxa no wacax baktakxac'al, yobxac'al yili no'. C'am bay max wil junok wacax yobxac'al yili axca no' tu' bay Egipto ti'. 20A ukc'on no baktakxac'al tu', a no' max chion aytok no' ukc'on bak'ech babel max ajol tu'. 21A yet max lajwi no bak'ech tu' chion aytok no' baktak tu', ac'ala' max yuncan no', c'am wal jabok max bak'echbi no'.

Lajwi tu xin, max el in wayan. 22Max tit pax in wayan, max oc pax junxa in wayich. Max wiloni ay jun liman ixim trigo tol ukeb wal jolom max yak'a', caw wal nojnak yuj bak'. 23Max lajwi tu' max el pax ul ukebxa is jolom, palta caw wal toc'al soctak, c'am is watx'il. 24Axa ixim soctak tu', max c'uxon aytok ixim watx' ay is bak' tu'. Max wal in wayich tu' bay eb nak naom el k'anej ti' yaloni, palta c'am wal junok eb nak chi je' nachaj el yuj tzet chi yal elapnok, ẍi cham rey tu'.

25Max yalon José bay axca ti':

—Mamin rey, a cab a wayich max a wayichnej tu', junnej tzet chi yal elapnok. A Dios chi ak'on a wayichnej tzet nabil yuj. 26A wal chi yal elapnok no ukc'on wacax bak'ech tu', ukeb abil chi yala'; ac'ala' ukeb jolom ixim trigo caw wal watx', ac'al oc tzet chi yala'. 27A pax no ukc'on wacax baktak cax yobxac'al yili, tol tzunan max ajol tu', ac'ala' ukeb abil chi yala'; c'apax ixim ukeb jolom trigo caw wal naba soctak c'am is bak', ukeb abil wajil chi yala'. 28A tzet max wal ayach ti', axca ton tu' yelapnok a wayich tu'. A Dios max ak'on a wayichnej tzet nabilxa yuj. 29Ok jay ukeb abil tol caw wal watx' ok yun sat awoj bay Egipto ti'. 30Lajwi tu xin, cax ok jay ukeb abil wajil. A yet tu' c'amxa mac ok naontek jantak sat awoj max yak' sobra bay Egipto ti' yin ukeb abil yet yalantok, yujtol a wajil tu' ok etnen cantok conob ti'. 31Caw wal mimek wajil ok yunej. C'amxa bay ok txecloj janic'okxa tzet max yak' sobra yet jun tiempoal watx' tu'. 32Cab wal max yun yoc a wayich tu' yet watx' chi nachaj el oj sic'libil tol nabilxa yuj Dios tol ok yun yin aymanil.

33Yuj tu xin, watx' tatol cha say junok winak tol caw jelan, cax tol aj nabal. A' chaoc yajawilok yul nación ti'. 34Cax cha sayon c'apax jaywanokxa eb nak chi oc yajawilal cax chi toj eb bay masanil yul nación wajon aj yet is so' makan sat awoj chi yak' bay tx'otx' ti' yin junjun abil, masantac'al chi tz'aknaj ukeb abil tol caw ok yak' sat awoj. 35A masanil jantak chi yak' sobra chi wajbaj aj eb nak tu', cax chi yak'on eb yul a k'ab, cax chi c'uay bay junjun conob bay yul yet Egipto ti', yet watx' ay lobej eb anima. 36A masanil tzet chi c'uaycan tu', a' ok lo' eb anima yet chi jay ukeb abil wajil tu', yet watx' c'am mac chi cam yuj wajil, ẍi José.

Max oc José yin yajawil bay Egipto

37A jun tzet max yal José tu', caw wal max cha c'ul cham rey c'al masanil eb ayoc yin yajawilal yetok. 38Max yal cham rey tu' bay eb axca ti':

—Xin tawal ayto bay chi chaloj junokxa winak juj tol ayoc espíritu yet Dios yin axca jun nak ti', ẍi cham rey.

39Max yalon cham bay José axca ti':

—C'am mac jelan c'al tz'akan ay is nabal axca ach ti', yujtol a Dios chi ak'on ojtaknej el masanil juntzan ti'. 40Ach chach occan yajawilok bay in despacho ti'. Masanil anima ok yikej bay tzet ok ala'. Asanxanej in, miman welapnok entak yujtol rey in. 41Ayin chach waoc yin gobernadoral bay masanil yul yet Egipto ti', ẍi cham.

42A yet max yalon cham jun k'anej tu', cax max yion el cham is colk'ab yin is k'ab bay ayoc sello, cax max yaon oc yin is k'ab José. Max chekon cham tol chi alay oc is pichil José tu', tol caw wal watx', cax chi alay oc junok cadena naba oro yin is nuk'. 43Axa cheklay yalay ajtok yul carro, a ton jun yet is cab yet cham rey, axa chekon cham tol chi cheklay el eb anima yul be yet chi ec' José tu'. Axca tu' max yun cancan José tu' yin gobernadoral c'al yilomalok yul masanil conob Egipto.

44Lajwi tu' max yalon cham rey bay José axca ti':

—Ayin ton rey in, palta c'am junok mactxel chi je' bili yul in conobal ti', ta manak ach chala', ẍi cham.

45Safnat-panea max yak' cham rey tu' yik José, max yak'on cham mojay José tu' yetok ix Asenat, is cutz'in jun cham chi yik Potifera, sacerdote yayji cham yul conob chi yik On. 4630 abil is k'inal José yet max ilaytok bay satak cham rey.

Max lajwi tu xin, axa tak'lican José tu' bay cham rey cax max toj yulak masanil conoblak yul yet Egipto. 47A yin ukeb abil xiwilxa max yak' sobra masanil sat awoj. 48A masanil ixim trigo max yak' sobra yin ukeb abil tu', max c'uaycantok ixim trigo chi el bay yul is makbej junjun conob yuj José. 49Axcaxa yarenail ti a' mar, cayxac'al tu' yili trigo max wajbaj aj José; xiwilxa trigo, xan max bek yecheni, c'amxa chi je' yion is cuenta yin.

50A yet c'amto chi chaoc miman wajil tu', cawanxa yuninal José yetok yetbi, a ton Asenat. 51A nak babel unin Manasés*fn* max yak' yika'; max yaloni: A Dios max ak'on toj c'ayc'ulal wuj masanil yatakilal max eq'uel wiban c'al cusc'ulal yuj eb ayto wuj in ba yetok, ẍi. 52Axa nak yet is cab unin, Efraín*fn* max yak' yika', max yaloni: A Dios max yak' eb wuninal bay jun tx'otx' tx'otx' ti' bay max wab yail ti', ẍi José.

53Max lajwi ukeb abil tu', yet xiwilxa watx'il max yun sat awoj bay Egipto. 54Axa wal chaon oc ukeb abil wajil tu', axca wal max yun yalon José. Max ayc'ay mimek wajil c'apax yul masanil nación ay is cawilal Egipto tu'. Axa masanil yul makbej Egipto, ay tzet chi lo eb anima. 55A yet max c'oli jayoc wajil bay Egipto tu', xiwilxa yapni oc eb aj Egipto tu' bay cham rey. Max yalon cham rey tu' bay eb: Asek bay José. A masanil tzet chi yala' a' che yikej, ẍi bay eb.

56Masanil yul yet Egipto tu' ayxa wajil; cax max jakon José masanil c'una' bay wajan ec' jantak trigo, max txonon ixim bay eb aj Egipto tu', tol chi tec'al aj can wajil. 57Masanil juntzanxa nacionlak max jayoc bay Egipto manoj trigo bay José. Masanilxac'al bay ay wajil, c'amxa tzet chi lo eb anima.

Currently Selected:

Gn 41: ATBYK89

Highlight

Copy